Read Shona Union Version 2002 Zvirevo 29 Bible Online

Zvirevo 29 - Shona Union Version 2002 bible

Zvirevo 29

¹Munhu akarairwa kazhinji, achiomesa mutsipa wake, Achaparadzwa pakarepo, kusina chingamubatsira.

²Kana vakarurama vowanda, vanhu vanofara; Asi kana munhu wakaipa achibata ushe, vanhu vanogomera.

³Ani naani anoda uchenjeri, anofadza baba vake; Asi anoshamwaridzana nezvipfeve, anorasha pfuma yake.

⁴Mambo anosimbisa nyika yake nokururamisa; Asi munhu wemitero, anoiparadza.

⁵Munhu anobata wokwake kumeso, Anodzikira tsoka dzake mumbure.

⁶Pakudarika kwomunhu akashata pano musungo; Asi wakarurama achaimba nokufara kwazvo.

⁷Akarurama anoziva kururamisira mhaka dzavarombo; Asi akaipa haanzwisisi zivo.

⁸Vadadi vanopisira guta; Asi vakachenjera vanodzora kutsamwa.

⁹Kana munhu akarurama ane mhaka nebenzi, Iye achatsamwa nokuseka, asi hakungavi nezororo.

¹⁰Vanhu veropa vanovenga akarurama; Asi vakarurama vanotsvaka kuraramisa mweya wake.

¹¹Benzi rinobudisa hasha dzaro dzose; Asi munhu akachenjera anodzidzora nokudzinyaradza.

¹²Kana mubati achiteerera nhema, Varanda vake vose vachava vakaipa.

¹³Murombo nomunhu anomanikidza vanosangana pamwechete; Jehovha anovhenekera meso avose.

¹⁴Mambo, anoruramisira varombo nokutendeka, Chigaro chake chichasimbiswa nokusingaperi.

¹⁵Shamhu nokuraira zvinouyisa huchenjeri; Asi mwana wangoregwa hake anonyadzisa mai vake.

¹⁶Kana vakaipa vowanda, kudarika kuwandawo; Asi vakarurama vachaona kuwa kwavo.

¹⁷Rairira mwanakomana wako, agokuzorodza; Zvirokwazvo achafadza mweya wako.

¹⁸Kana Jehovha asingazviratidzi, vanhu vanoramba kudzorwa; Asi anochengeta murayiro, anomufaro.

¹⁹Muranda angaramba kurairirwa namashoko bedzi; Nokuti, kunzwisisa anonzwisisa hake, asi haane hanya nazvo.

²⁰Unoona munhu unokurumidza kutsamwa? Benzi riri nani kuna iye.

²¹Kana munhu achirera muranda wake zvakanaka kubva pahuduku hwake, Pakupedzisira achada kuva mwanakomana.

²²Munhu wakatsamwa anomutsa kukakavara; Munhu ane hasha anokudarika kuzhinji.

²³Kuzvikudza kwomunhu kuchamudukupisa; Asi ano mweya anozvininipisa, achakudzwa.

²⁴Ani naani anoshamwaridzana nembavha, anovenga mweya wake; Anonzwa kupikwa, asi haareururi chinhu.

²⁵Kutya munhu kunouyisa musungo; Asi ani naani anovimba naJehovha, achachengetwa.

²⁶Vazhinji vanotsvaka nyasha yomubati; Asi kururamisirwa kwomunhu kunobva kuna Jehovha.

²⁷Munhu asakarurama anonyangadza akarurama; Uye akarurama panzira dzake anonyangadza akaipa.