Read Shona Union Version 2002 Zvirevo 30 Bible Online

Zvirevo 30 - Shona Union Version 2002 bible

Zvirevo 30

¹Mashoko aAguri, mwanakomana waJake; chirevo chake. Murume anoti kuna Itieri, kuna Itieri naUkari,

²“Zvirokwazvo, ndiri benzi kupfuura vanhu vose; Handine njere dzomunhu.

³Handina kudzidza uchenjeri, Uye handina zivo yoMutsvene.

⁴Ndiani akakwira kudenga, akaburukazve? Ndiani akasungira mvura munguo yake? Ndiani akasungira migumo yose yenyika? Zita rake ndiani, nezita romwanakomana wake, kana uchiriziva?

⁵Shoko rimwe nerimwe raMwari rakanatswa; Ndiye nhoo yavose vanovanda maari.

⁶Usawedzera pamashoko ake, Kuti arege kukupa mhosva, uwanikwe une nhema.”

⁷Zvinhu zviviri ndakakumbira kwamuri; Musandiramba izvo, ndisati ndafa.

⁸Bvisai kure neni zvisina kutendeka nenhema; Regai kundipa urombo kana pfuma; Mundigutse nezvokudya zvakandifanira;

⁹Ndirege kuti kana ndaguta, ndikurambei, ndichiti, “Jehovha ndianiko?” Kana zvimwe ndive murombo, ndibe, Ndimhure zita raMwari wangu.

¹⁰Rega kuudzisira muranda kuna tenzi vake, Arege kukutuka, ukanzi une mhosva.

¹¹Rudzi ruriko runotuka baba varwo, Rusingaropafadzi mai varwo.

¹²Rudzi ruriko runoti pakuona kwedu takachena kwazvo, Asi rusina kunatswa patsvina yarwo.

¹³Rudzi ruriko, meso arwo ana manyawi sei! Mafungiro ameso avo akakwidzwa.

¹⁴Rudzi ruriko, meno arwo akafanana neminondo, nameno eshaya dzarwo samapanga, Kuti rupedze varombo panyika, navanoshaiwa pakati pavanhu.

¹⁵Chikweva ropa chinavakunda vaviri, vanoti, “Ndipe! Ndipe!” Zvinhu zvitatu zviriko zvisingatongoguti, Zvina zvisingatongoti, “Zvaringana!”

¹⁶Sheori; nechizvaro chisingabereki; Pasi pasingaguti mvura; Nomoto, usingati, “Zvaringana!”

¹⁷Ziso rinoseka baba, Rinoshora kuteerera mai, Makunguo omupata acharinongora, Vana vegondo vacharidya.

¹⁸Zvinhu zvitatu zviriko zvinondishamisa, Zvirokwazvo zvina, zvandisingazivi, zvinoti:

¹⁹Kufamba kwegondo mudenga; Kufamba kwenyoka paruware; Kufamba kwechikepe pakati pegungwa; Nokufamba kwomurume nomusikana.

²⁰Ndizvo zvakaita kufamba kwomukadzi woupombwe; Anodya, ndokupisika muromo wake, Achiti, “Handina kuita chinhu chakaipa.”

²¹Nyika inodedera nokuda kwezvinhu zvitatu; Uye nokuda kwezvina zvaisingadi kuona;

²²Nokuda kwomuranda kana achizova mambo; Nokuda kwebenzi, kana raguta zvokudya;

²³Nokuda kwomukadzi arambwa, kana azowanikwa; Uye mushandiri, kana azova mugari wenhaka yatenzi wake.

²⁴Zvinhu zvina zviriko panyika zviduku hazvo, Asi zvakachenjera kwazvo, zvinoti;

²⁵Mujuru, rudzi rusine simba harwo; Kunyange zvakadaro anounganidza zvokudya zvawo muzhizha;

²⁶Mbira, rudzi rusine simba harwo, Kunyange zvakadaro dzinoita imba yadzo mumatombo;

²⁷Mhashu hadzina mambo, Kunyange zvakadaro dzinofamba zvakanaka dzichiita mapoka;

²⁸Chipfira ungachibata namaoko ako, Kunyange zvakadaro chiri mudzimba dzamadzimambo.

²⁹Zvinhu zvitatu zviriko zvinokufamba kunokudzwa, Zvirokwazvo zvina zvinokufamba kunokudzwa, zvinoti:

³⁰Shumba, mhare pakati pemhuka dzose, Isingatizi mhuka ipi neipi;

³¹Nemhuka ine zviuno zakasimba, nenhongo yembudzi; Namambo kana anavarwi vake.

³²Kana uchinge waita noupenzi, wazvikudza, Kana zvimwe warangarira zvakashata, Pfumbira muromo wako.

³³Nokuti mukaka warozva anobudisa mafuta, Nemhino dzadzvinyiwa dzinobudisa ropa, Saizvozvo hasha dzvavambwa dzinobudisa kukakavara.