Read Shona Union Version 2002 Zvirevo 31 Bible Online

Zvirevo 31 - Shona Union Version 2002 bible

Zvirevo 31

¹Mashoko amambo Remueri; zvirevo zvaakadzidziswa namai vake.

²“Nhai, mwanakomana wangu! Nhai, mwanakomana wemhiko dzangu!

³Rega kupa vakadzi simba rako, Nenzira dzako kune zvinoparadza madzimambo.

⁴Iwe Remueri, hazvifaniri madzimambo, hazvifaniri madzimambo kunwa waini; Namachinda kuti, ‘Doro riripiko?’

⁵Varege kunwa, vachizokanganwa murayiro, Varege kukanganisa kururamisira vamwe vanotambudzika.

⁶Ipai anoda kuparara doro, Neano mwoyo unorwadza waini;

⁷Ngaanwe, akanganwe urombo hwake, Arege kucharangarira kutambudzika kwake.

⁸Shamisira mbeveve muromo wako, Urwire mhaka dzavose vakadai vakasiyiwa.

⁹Shamisa muromo wako, utonge zvakarurama, Ururamisire murombo neanoshaiwa.”

¹⁰Ndianiko angawana mukadzi anozviita zvakanaka? Nokuti mutengo wake unokunda kwazvo mutengo wamaparera.

¹¹Mwoyo womurume wake unomutenda, Naiye haangashaiwi pfuma.

¹²Unoitira murume wake zvakanaka, haamuitiri zvakaipa Mazuva ose oupenyu hwake.

¹³Anotsvaka mvere noruchinda, Achibata namaoko ake nomufaro.

¹⁴Akafanana nezvikepe zvavatengesi; Anondotora zvokudya zvake kure.

¹⁵Anomuka huchiri usiku, Nokupa mhuri yake zvokudya, Navashandiri vake basa ravo.

¹⁶Anorangarira munda, ndokuutenga; Anosima munda wemidzambiringa nezvaakawana namaoko ake.

¹⁷Anozvisunga chiuno nesimba, Nokusimbisa maoko ake.

¹⁸Anoona kuti kushambadzira kwake kwabatsira; Mwenje wake haudzimi husiku.

¹⁹Anotambanudzira ruoko rwake kune chokurukisa; Maoko ake anobata chinorukwa.

²⁰Anotambanudzira murombo ruoko rwake; Anotandavadzira anoshaiwa maoko ake.

²¹Haatyi chando pamusoro peimba yake, Nokuti mhuri yake yose yakafuka nguo tsvuku.

²²Anozviitira mitsamiro inoukomba; Nguo yake mucheka wakaisvonaka nomutsvuku.

²³Murume wake anozikanwa pamasuo eguta, Kana agere pakati pavakuru venyika.

²⁴Anoita zvokufuka zvomucheka achizvitengesa, Anovigira vatengesi zvisungo zvezviuno.

²⁵Simba nokukudzwa ndizvo zvokufuka zvake; Anoseka kana achifunga nguva inouya.

²⁶Anoshamisa muromo wake nouchenjeri; Rurimi rwake runodzidzisa nounyoro.

²⁷Anotarira zvakanaka kufamba kwemhuri yake, Asingadyi zvokudya zvousimbe.

²⁸Vana vake vanomuka, vachimuti, “Makaropafadzwa;” Nomurume wakewo anomurumbidza, achiti,

²⁹“Vakunda vazhinji vakaita zvakanaka, Asi iwe unovakunda vose.”

³⁰Zvinofadza zvinonyengedzera, unaki hahuna maturo; Asi mukadzi anotya Jehovha, ndiye anofanira kurumbidzwa.

³¹Chimupai zvakafanira zvaakabata namaoko ake; Mabasa ake ngaamurumbidze pamasuo eguta.