Read Shona Union Version 2002 Zvirevo 4 Bible Online

Zvirevo 4 - Shona Union Version 2002 bible

Zvirevo 4

¹Imi vanakomana, inzwai kurairira kwababa venyu; Teererai, muzive njere.

²Nokuti ndinokupai dzidziso yakanaka; Regai kurasha murayiro wangu.

³Nokuti ini ndakanga ndiri mwanakomana kuna baba vangu, Mwana oga akadikanwa kwazvo, namai vangu;

⁴Ivo baba vakandidzidzisa, vakati kwandiri, “Mwoyo wako ngaunatsobata mashoko angu; Chengeta mirairo yangu, urarame.

⁵Zviwanire uchenjeri, zviwanire njere; Regai kukanganwa kana kutsauka pamashoko omuromo wangu;

⁶Usaurasha, hugokuchengeta; Uude, hugokurinda.

⁷Uchenjeri chinhu chikuru kune zvose; saka uzviwanire uchenjeri; Uzviwanire njere nezvose zvaunazvo.

⁸Uhukudze, hugokukwiridza iwe; Huchakuvigira kukudzwa, kana uchihumbundikira.

⁹Huchapa musoro wako chishongo chakanaka; Huchakuisira korona inobwinya.”

¹⁰Chinzwa iwe mwanakomana wangu, ugamuchire zvandinoreva; Makore oupenyu hwako agova mazhinji.

¹¹Ndakakudzidzisa panzira youchenjeri; Ndakakufambisa pamakwara akarurama.

¹²Kana uchifamba, tsoka dzako hadzingapinganidzwi; Kana uchimhanya, haungagumburwi.

¹³Natsa kubata kurairirwa; usakuregedza; Ukuchengete, nokuti ndihwo hupenyu hwako.

¹⁴Usapinda pagwara ravakaipa, Usafamba nenzira yavakashata.

¹⁵Uinzvenge, usapinda pairi; Tsauka pairi, upfuure hako.

¹⁶Nokuti havavati, kana vasingaiti zvakashata; Vanotorerwa hope dzavo, kana vasingagumbusi vamwe.

¹⁷Nokuti vanodya zvokudya zvezvakaipa, Nokunwa waini yokumanikidza.

¹⁸Asi gwara ravakarurama rakaita sechiedza chamambakwedza, Chinoramba chichiwedzera kubwinya kusvikira pamasikati makuru.

¹⁹Nzira yavakaipa yakaita serima; Havazivi chingavagumbusa.

²⁰Mwanakomana wangu, teerera mashoko angu; Rerekera nzeve yako kune zvandinoreva.

²¹Urambe uchitarira, Uachengete mukati momwoyo mako.

²²Nokuti ndihwo hupenyu kuna vanoawana, Noukukutu hwemuviri wavo vose.

²³Chengeta mwoyo wako kupfuura zvose zvinofanira kurindwa; Nokuti mukati mawo ndimo mune zvitubu zvoupenyu.

²⁴Bvisa kwauri nhema dzomuromo; Kutsauka kwemiromo ngakuve kure newe.

²⁵Meso ako ngaarurame pakutarira; Mafungiro ameso ako ngaatarire mberi kwako.

²⁶Gadzirira tsoka dzako gwara; Nzira dzako dzose dzive dzakasimba.

²⁷Usatsaukira kurudyi kana kuruboshwe; Rutsoka rwako urubvise pane zvakaipa.