Read Shona Union Version 2002 Zvirevo 5 Bible Online

Zvirevo 5 - Shona Union Version 2002 bible

Zvirevo 5

¹Mwanakomana wangu, teerera uchenjeri hwangu; Rerekera nzeve yako inzwe njere dzangu;

²Kuti ugare wakabata kungwara, Nemiromo yako ichengete zivo.

³Nokuti miromo yomukadzi wokumwe inodonha huchi; Muromo wake unotedza kupfuura mafuta;

⁴Asi pakupedzisira unovava segavakava; Unopinza somunondo une nhivi mbiri dzinocheka.

⁵Tsoka dzake dzinoburukira kurufu; Nambwe dzake dzinovavarira kuhwiro;

⁶Gwara roupenyu, rakati chechetere, haariwani, Nzira dzake dzinotsauka, iye asingazvizivi.

⁷Saka imi, vanakomana vangu, nditeererei; Regai kutsauka pamashoko omuromo wangu.

⁸Nzira yako ngaive kure naye, Usaswedera pamukova weimba yake.

⁹Kuti urege kupa vamwe kunaka kwohujaya hwako, Namakore ako kuno ano mwoyo mukukutu;

¹⁰Kuti vatorwa varege kugutswa nepfuma yako, Nezvibereko zvokutambura kwako zviende kumba kwomweni.

¹¹Iwe ugochema pakupedzisira kwako, Kana nyama yako nomuviri wako zvaparadzwa,

¹²Uchiti, “Ndakavengereiko kurairirwa, Mwoyo wangu wakashorerei kurairwa?

¹³Ndakaregereiko kuteerera izwi ravadzidzisi vangu, Nokusarerekera nzeve yangu kuna vaindiraira?

¹⁴Ndakanga ndapinda pane zvakaipa zvose, Pakati pechiunga neungano.”

¹⁵Inwa mvura padziva rako chairo, Nemvura inoyerera patsime rako chairo.

¹⁶Ko matsime ako anofanira kuparadzirwa here, Nzizi dzemvura dziyerere munzira dzomumusha here?

¹⁷Ngazvive zvako zvoga, Zvisava zvavatorwa pamwechete newe.

¹⁸Tsime rako ngariropafadzwe; Ufarire mukadzi wohujaya hwako.

¹⁹Sehadzi yenondo yakanaka, nehadzi yengururu inofadza; Mazamu ake ngaakufadze nguva dzose; Ugare uchigutiswa norudo rwake.

²⁰Nokuti iwe, mwanakomana wangu, uchagutsirweiko nomukadzi wokumwe, Uchambundikireiko chipfuva chomweni?

²¹Nokuti nzira dzomunhu dziri pamberi paJehovha; Ndiye anoyera makwara ake ose.

²²Zvivi zvake zvichabata muiti wazvo, Achabatwa namabote ezvivi zvake.

²³Achafa nokushaiwa kurairirwa; Achatsauka noukuru hwoupenzi hwake.