Read Shona Union Version 2002 Zvirevo 7 Bible Online

Zvirevo 7 - Shona Union Version 2002 bible

Zvirevo 7

¹Mwanakomana wangu, chengeta mashoko angu, Viga mirairo yangu kwauri.

²Chengeta mirairo yangu, urarame; Nomurau wangu semboni yeziso rako.

³Uzvisungire paminwe yako; Uzvinyore pahwendefa romwoyo wako.

⁴Uti kuuchenjeri, “Ndiwe hanzvadzi yangu; Utumidze njere shamwari yako;”

⁵Kuti zvikuchengete pamukadzi wokumwe, Pamutorwa anobata kumeso namashoko ake.

⁶Nokuti ndakatarira pawindo yeimba yangu, Pahutanda hwewindo yangu;

⁷Ndikatarira pakati pavasina mano, Ndikaona pakati pamajaya Rimwe jaya rakashaiwa njere;

⁸Richipfuura nenzira yomumusha pedyo nekona yeimba yomukadzi uyo, Richifamba nenzira kuimba yomukadzi;

⁹Nenguva yorubvunzavaeni, nenguva yamadeko ezuva, Pakati pousiku kwasviba.

¹⁰Zvino tarira, mukadzi akasangana naye, Akanga akafuka sechifeve, anokunyengedzera pamwoyo.

¹¹Anopupira, achiita sezvaanoda; Tsoka dzake hadzigari mumba make;

¹²Imwe nguva ari munzira dzomumusha, imwe nguva pamatare; Anorindira pamakona ose.

¹³Zvino iye akamubata, akamutsvoda; Akataura naye nechiso chisina kunyara, akati kwaari,

¹⁴“Ndaifanira kuuya nezvibayiro zvezvipiriso zvokuyananisa, Nhasi ndaripa mhiko dzangu.

¹⁵Saka ndabuda kuzokuchingamidza, Nditsvake chiso chako zvikuru, zvino ndakuwana.

¹⁶Ndakawarira machira anohukomba pamubhedha wangu, Nemicheka ina mavara inobva Ijipiti.

¹⁷Ndakasasa zvinonhuwira pamubhedha wangu, Mura, negavakava, nekinamoni.

¹⁸Uya tigute nokudana kusvikira mangwanani; Ngatizvifadze nokudana kukuru.

¹⁹Nokuti murume haapo pamusha; Akafamba rwendo rukuru;

²⁰Akaenda nehombodo ine mari; Achadzoka pajenaguru.”

²¹Nokutaura kwake kuzhinji kwakanaka anomutsausa, Anomugombedzera nokubata kumeso kwemiromo yake.

²²Anomutevera pakarepo, Senzombe inoenda kwainondobayiwa, Kana sebenzi rakasungwa rinoenda kundorangwa;

²³Kusvikira museve wabaya chiropa chake; Seshiri inokurumidzira kurugombe, Asingazivi kuti zvinovinga upenyu hwake.

²⁴Zvino vanakomana vangu, nditeererei, Inzwai mashoko omuromo wangu.

²⁵Mwoyo wako ngaurege kutsaukira kunzira dzake; Usafamba-famba mumakwara ake.

²⁶Nokuti akawisira pasi vazhinji vakakuvadzwa; Zvirokwazvo, vakaurawa naye vazhinji kwazvo.

²⁷Imba yake inzira dzinoenda Sheori, Dzinoburukira kudzimba dzorufu.