Read Shona Union Version 2002 Zvirevo 8 Bible Online

Zvirevo 8 - Shona Union Version 2002 bible

Zvirevo 8

¹Ko Uchenjeri hahudanidziri here? Nenjere hadzibudisi mazwi adzo here?

²Pamusoro pemitunhu panzira, Pamharadzano dzenzira, ndipo pahumire;

³Parutivi rwamasuo, panopindwa paguta, Pavanopinda pamikova, ndipo pahunodanidzira; huchiti,

⁴“Ndinodanidzira kwamuri, imi varume, Izwi rangu rinodana vanakomana vavanhu.

⁵Nzwisisai uchenjeri, imi vasina mano; Imi mapenzi, ivai nomwoyo une njere.

⁶Inzwai, nokuti ndichataura zvinhu zvakaisvonaka; Nokuti miromo yangu ichashamira zvinhu zvakarurama.

⁷Nokuti muromo wangu unobudisa zvokwadi; Chinhu chakaipa chinonyangadza pamiromo yangu.

⁸Mashoko ose omuromo wangu akarurama; Hakuna chinhu chakakombama kana chisakarurama maari;

⁹Zvose zviri pachena kuno ane njere; Zvakarurama kuna ivo vakawana zivo.

¹⁰Gamuchirai kuraira kwangu, murege kugamuchira sirivha; Nezivo, kupfuura ndarama yakasarurwa.

¹¹Nokuti uchenjeri hwakanaka kupfuura korari; Zvose zvinodikanwa hazvingaenzaniswi nahwo.

¹²Ini uchenjeri ndakaita kungwara imba yangu, Ndinowana zivo namano akarurama.

¹³Kutya Jehovha ndiko kuvenga zvakaipa; Kuzvikudza namanyawi nenzira yakaipa, Nomuromo unonyengedzera, ndinozvivenga.

¹⁴Ndine zano rakanaka nokubata kwakakwana; Ndini kuchenjera; ndine simba.

¹⁵Madzimambo anobata ushe neni, Vabati vanotonga vanhu neni.

¹⁶Madzishe anofambisa ushe neni, Navakuru, ivo vatongi vose vapasi.

¹⁷Ndinoda vanondida; Vanonditsvaka nomwoyo wose vachandiwana.

¹⁸Pfuma nokukudzwa zvineni, Zvinokosha zvakaisvonaka nokururama.

¹⁹Zvibereko zvangu zvakanaka kupfuura ndarama, kunyange ndarama yakaisvonaka; Zvandinowana zvinopfuura sirivha yakasarurwa.

²⁰Ndinofamba nenzira yokururama, Mukati mamakwara okururamisa;

²¹Kuti ndigarise nhaka vanondida, Ndizadze zvivigiro zvepfuma yavo.

²²Jehovha akandiumba pakuvamba kwenzira yake, Kutangira mabasa ake akare.

²³Ini ndakamiswa kubva pakusingaperi, kubva pakutanga, Pasi pasati pasikwa.

²⁴Makungwa asati avapo, ini ndakaberekwa; Pasina matsime ane mvura zhinji.

²⁵Makomo asati anyudzwa, Zvikomo zvisipo, ini ndakaberekwa;

²⁶Iye asati aumba pasi namapani, Kana guruva rokutanga renyika.

²⁷Panguva yaakagadzira kudenga-denga, ndakanga ndiripo; Pakuisa kwake denderedzwa pamusoro pamakungwa;

²⁸Panguva yaakasimbisa denga rose kumusoro, Pakusimba kwamatsime amakungwa;

²⁹Panguva yaakaitira gungwa miganho yaro, Kuti mvura irege kudarika murayiro wake, Pakutara kwake nheyo dzapasi;

³⁰Nenguva iyo ndaiva naye, ndiri mhizha; Ndaimufadza zuva rimwe nerimwe, Ndichitamba pamberi pake nguva dzose,

³¹Ndichitamba panyika yake, Ndichifadzwa navanakomana vavanhu.

³²Saka zvino vanakomana vangu, nditeererei; Nokuti vanochengeta nzira dzangu vakaropafadzwa.

³³Inzwai kurairira muve vakachenjera, Regai kukuramba.

³⁴Munhu, anondinzwa, akaropafadzwa, Anorinda zuva rimwe nerimwe pamasuo angu, Anomira pazvivhivho zvemikova yangu.

³⁵Nokuti andiwana, awana hupenyu, Achapiwa nyasha naJehovha.

³⁶Asi anondishaiwa, anotadzira mweya wake; Vose vanondivenga, vanoda rufu.”