Read Shona Union Version 2002 Muparidzi 1 Bible Online

Muparidzi 1 - Shona Union Version 2002 bible

Muparidzi 1

¹Mashoko oMuparidzi, mwanakomana waDhavhidhi, mambo paJerusaremu.

²Zvanzi noMuparidzi, hazvina maturo chose, hazvina maturo chose, zvose hazvina maturo chose!

³Munhu angabatsirweiko nokutambudzika kwake kwose, kwaanotambudzika nako pasi pezuva?

⁴Rudzi rumwe runoenda, rumwe rudzi runouya; asi pasi panongogarapo nokusingaperi.

⁵Zuva rinobudawo, zuva rinovira, richikurumidzira kwarinozobudazve.

⁶Mhepo inoenda zasi, yodzoka yoenda kumusoro; inoramba ichidzoka pakufamba kwayo; mhepo inodzokerazve pakupotereka kwayo.

⁷Nzizi dzose dzinodira mugungwa, kunyange zvakadaro gungwa harizari; kunzvimbo kunoenda nzizi, ndiko kwadzinodzokerazve.

⁸Zvinhu zvose zvizere nokuneta; hakuna munhu angazvitaura; ziso hariguti nokuona, nzeve haizari nokunzwa.

⁹Chakanga chiripo, ndicho chichazovapo; chakamboitwa, ndicho chichazoitwa; hapane chinhu chitsva pasi pezuva.

¹⁰Chinhu chiriko here, chatingati, “Tarirai, chinhu ichi chitvsa?” Chakanga chichingovapo kare, panguva dzakatitangira.

¹¹Marudzi akapfuura haacharangarirwi; namarudzi achazotevera, haangatongorangarirwi navanozovatevera.

¹²Ini Muparidzi, ndakanga ndiri mambo waIsiraeri paJerusaremu.

¹³Ndikarwadza mwoyo wangu kutsvaka nokunzvera nouchenjeri zvose zvinoitwa pasi pedenga; ibasa rinotambudza rakapiwa vanakomana vavanhu vaMwari, kuti vazvitambudze naro.

¹⁴Ndakaona mabasa ose anoitwa pasi pezuva; tarirai, zvose hazvina maturo, ndiko kudzingana nemhepo bedzi.

¹⁵Chakakombama hachibviri kururamiswa; chinoshaikwa hachibviri kuverengwa.

¹⁶Ndakataurirana nomwoyo wangu, ndichiti, “Tarira ndazviwanira uchenjeri hukuru, kukunda vose vakanditangira paJerusaremu; zvirokwazvo mwoyo wangu wakaona uchenjeri huzhinji nezivo.”

¹⁷Asi ndakati ndichirwadza mwoyo wangu kuti ndizive uchenjeri nezivo, noupengo noupenzi, ndikaona kuti naizvozvowo ndiko kudzingana nemhepo bedzi.

¹⁸Nokuti muuchenjeri huzhinji munokuchema kuzhinji; uye anowedzera zivo, anowedzera shungu.