Read Shona Union Version 2002 Muparidzi 10 Bible Online

Muparidzi 10 - Shona Union Version 2002 bible

Muparidzi 10

¹Nhunzi dzakafa dzinonhuwisa nokuodza chizoro chomuvenganisi wezvinonhuwira; saizvozvo upenzi hushoma hunorema kukunda uchenjeri nokukudzwa.

²Mwoyo womunhu akachenjera uri kurudyi rwake, asi mwoyo webenzi uri kuruboshwe rwake.

³Zvirokwazvo, kana benzi richifamba panzira, rinoshaiwa njere; rinozivisa vose kuti ndiri benzi.

⁴Kana kutsamwa kwomubati kukakumukira, usabva panzvimbo yako; nokuti unyoro hunonyaradza mhosva huru.

⁵Chinhu chakaipa chiripo chandakaona pasi pezuva, kuri kutadza kunobva kuvabati.

⁶Upenzi hunoiswa pakakwirira, asi vapfumi vanogara pakaderera.

⁷Ndakaona varanda vakatasva mabhiza, namachinda achifamba pasi savaranda.

⁸Anochera gomba, achawiramo amene; ani naani anokoromora rusvingo, nyoka ichamuruma.

⁹Ani naani anoputsa mabwe, angakuvadzwa nawo; uye anobanzura huni, ari panjodzi.

¹⁰Kana simbi yagomara, munhu akasairodza, anofanira kunyanya kubata nesimba; asi uchenjeri hunobatsira pakururamisa.

¹¹Kana nyoka ikaruma isati yarapwa namazango, n'anga haibatsiri.

¹²Mashoko anobva mumuromo woakachenjera, anofadza; asi miromo yebenzi inomumedza iye.

¹³Kutanga kwamashoko omuromo waro upenzi; nokuguma kwokutaura kwaro upengo hwakashata.

¹⁴Benzi rinowanzawo mashoko; asi munhu haazivi zvichavapo; ndiani angamuzivisa zvichazovapo shure kwake?

¹⁵Kubata kwamapenzi kunonetsa mumwe nomumwe wavo; nokuti haatongozivi nzira yokuenda nayo kuguta.

¹⁶Iwe nyika une nhamo, kana mambo wako ari mwana, kana machinda ako achiita mutombo mangwanani.

¹⁷Unomufaro, iwe nyika, kana mambo wako ari mwanakomana wavakakudzwa, kana machinda ako achiita mutambo panguva yakafanira, kuti asimbiswe, asingaitiri kubatwa.

¹⁸Nousimbe denga reimba rinosakara; nokuSabata kwamaoko imba inodonha.

¹⁹Mutambo unoitirwa kuseka, uye waini inofadza upenyu; zvose zvingawanikwa nemari.

²⁰Usatuka mambo, kunyange pakufunga kwako; usatuka mupfumi paimba yako yokuvata; nokuti shiri yokudenga ingatakura izwi, uye izvo zvinamapapiro zvingazivisa shoko.