Read Shona Union Version 2002 Muparidzi 3 Bible Online

Muparidzi 3 - Shona Union Version 2002 bible

Muparidzi 3

¹Chinhu chimwe nechimwe chino musi wacho, uye shoko rimwe nerimwe pasi pedenga rine nguva yaro.

²Nguva yokuberekwa, nenguva yokufa; nguva yokusima, nenguva yokudzura chakasimwa;

³nguva yokuuraya, nenguva yokuporesa; nguva yokuputsa, nenguva yokuvaka;

⁴nguva yokuchema, nenguva yokuseka; nguva yokuungudza, nenguva yokupembera;

⁵nguva yokurasha mabwe, nenguva yokuunganidza mabwe; nguva yokumbundikira, nenguva yokurega kumbundikira;

⁶nguva yokutsvaka, nenguva yokurega zvirashike; nguva yokuchengeta, nenguva yokurasha;

⁷nguva yokubvarura, nenguva yokusona; nguva yokunyarara, nenguva yokutaura;

⁸nguva yokuda, nenguva yokurwa, nenguva yorugare.

⁹Ko iye anobata anobatsirwei nezvaanotamburira?

¹⁰Ndakaona kutambudzika kwakapiwa vanakomana vavanhu naMwari, kuti vazvitambudze nazvo.

¹¹Chinhu chimwe nechimwe akachiita chakanaka panguva yacho; akaisawo zvisingaperi mumwoyo mavo, kunyange zvakadaro munhu haangagoni kunzwisisa zvakabatwa naMwari kubva pakutanga kusvikira pakupedzisira.

¹²Ndinoziva kuti hakune chinhu chakanaka pakati pavo chingapfuura ichi, kuti vafare, uye kuti vaite zvakanaka upenyu hwavo hwose.

¹³Uyewo, kuti chipo chaMwari kuti munhu mumwe nomumwe adye, anwe, afarire zvinhu zvakanaka pakubata kwake kwose.

¹⁴Ndinoziva kuti zvose zvinoitwa naMwari, zvichagara nokusingaperi; hakune chinhu chingawedzerwa, kana chingabviswa pazviri; Mwari akazviita izvozvo, kuti vanhu vamutye.

¹⁵Zviripo zvino, zvakanguva zvavapo; uye izvo, zvichavapo, zvakanguva zvavapo; Mwari anotsvakazve zvakanga zvapfuura.

¹⁶Uyezve, ndakaona pasi pezuva, kuti panzvimbo yokururamisira, zvakaipa zvakanga zviripo; uye panzvimbo yokururama, zvakaipa zvakanga zviripo.

¹⁷Ndakati mumwoyo mwangu, “Mwari ndiye achatonga akarurama nowakaipa; nokuti nguva iripo yeshoko rimwe nerimwe nebasa rimwe nerimwe.”

¹⁸Ndakati mumwoyo mangu, “Izvi zvinoitwa nokuda kwavanakomana vavanhu, kuti Mwari avaidze, aone kuti ivo vamene vakangoita semhuka.”

¹⁹Nokuti zvinoitirwa vanakomana vavanhu ndizvo zvinoitirwawo mhuka; zvose zvinoitirwa chinhu chimwe. Mufiro womunhu, ndiwo mufiro wemhuka, zvose zvinokufema kumwe; munhu haana paanopfuura mhuka; nokuti zvose hazvina maturo.

²⁰Zvose zvinoenda kunzvimbo imwe; zvose zvinobva pavhu, zvose zvinodzokerazve kuvhu.

²¹Ndiani ungaziva kana kufema kunopa upenyu kumunhu kunokuisa kumusoro, kana kufema kunopa upenyu kumhuka kuchiburukira pasi?

²²Saka ndakaona kuti hakune chinhu chinopfuura ichi, kuti munhu afarire mabasa ake, nokuti ndiwo mugove wake; nokuti ndiani achamudzosazve kuti aone zvichamutevera.