Read Shona Union Version 2002 Muparidzi 7 Bible Online

Muparidzi 7 - Shona Union Version 2002 bible

Muparidzi 7

¹Mbiri yakanaka inopfuura chizoro chakanaka, nezuva rokufa kupfuura zuva rokuzvarwa.

²Zviri nani kuenda kuimba yokuchema, pakuenda kuimba yomutambo; nokuti ndiwo mugumo wavanhu vose; munhu mupenyu achazvirangarira pamwoyo pake.

³Kuchema kunopfuura kuseka, nokuti mwoyo unofadzwa nokupunyaira kwechiso.

⁴Mwoyo yavakachenjera iri paimba yokuchema, asi mwoyo yamapenzi iri paimba yokufara.

⁵Zviri nani kuti munhu anzwe kutuka kwavakachenjera, pakuti anzwe kuimba kwamapenzi.

⁶Nokuti kuseka kwebenzi kwakafanana nokuputika kweminzwa pasi pehari; naizvozvowo hazvina maturo.

⁷Zvirokwazvo kumanikidza kunoita muchenjeri benzi; uye fufuro inoparadza njere.

⁸Kuguma kwechinhu kunopfuura kutanga kwacho; ano mwoyo murefu anopfuura ano mwoyo anozvikudza.

⁹Usakurumidza pamweya wako kutsamwa, nokuti kutsamwa kunogara pachipfuva chamapenzi.

¹⁰Usati, “Mazuva ekare anopfuura azvino nokunaka neiko?” Nokuti haungabvunzi saizvozvo nouchenjeri.

¹¹Uchenjeri hwakaenzana nenhaka; zvirokwazvo, hwaisvonaka kuna vanoona zuva.

¹²Nokuti uchenjeri chitaviridzo, mariwo chitaviridzo, asi kunakisa kwezivo ndiko, kuti uchenjeri hunochengeta hupenyu hwaiye anahwo.

¹³Cherekedza basa raMwari, nokuti ndiani angaruramisa chaakakombamisa iye?

¹⁴Fara nezuva rokugara zvakanaka, rangarira nezuva rokutambudzika; Mwari ndiye akaita izvozvo zvose zviviri, kuti munhu arege kuziva zviri mberi kwake.

¹⁵Izvozvi zvose ndakazviona pamazuva angu asina maturo. Akarurama ariko, anoparara pakati pokururama kwake, uyezve, munhu akaipa ariko, anorarama nguva huru pakati pezvakaipa zvake.

¹⁶Usava munhu akaisvorurama, usava akaisvochenjera; uchazviparadzireiko?

¹⁷Usava munhu akaisvoipa, uye usava benzi; uchafireiko nguva yako isati yasvika?

¹⁸Zvakanaka kuti ubatisise chinhu ichi, uye usabvisa ruoko rwako panechecho; nokuti anotya Mwari, achapukunyuka panaizvozvo zvose.

¹⁹Uchenjeri hunosimbisa akachenjera kupfuura vabati vane gumi vari muguta.

²⁰Zvirokwazvo, hapana munhu akarurama panyika, anoita zvakanaka, asingatadzi.

²¹Uyezve, usava nehanya namashoko ose anotaurwa, kuti urege kunzwa muranda wako achikutuka.

²²Nokuti kazhinji mwoyo wako unoziva kuti newewo wakatuka vamwe saizvozvo.

²³Izvozvi zvose ndakazviidza nouchenjeri; ndakati, “Ndichava akachenjera; asi zvakanga zviri kure neni.”

²⁴Izvo, zviripo, zviri kure, zvakadzika kwazvo, ndiani angazviziva?

²⁵Ndakatendeuka, mwoyo wangu ukada kuziva nokunzvera, nokutsvaka uchenjeri namano, ndizive kuti kuipa upenzi, noupenzi kupenga.

²⁶Ndikawana chinhu chinovava kukunda rufu, ndiye mukadzi ari musungo, mwoyo wake ari mambure, namaoko ake zvisungo; Ani naani anofadza Mwari, achapukunyuka kwaari; asi mutadzi achabatwa naye.

²⁷Zvanzi noMuparidzi, “Tarirai, ndizvozvi zvandakawana, ndichiverenga chinhu chimwe nechimwe, kuti ndiwane shumo yazvo;

²⁸zvinongoramba zvichitsvakwa nomweya wangu, asi ndigere kuzviwana, ndakawana murume mumwe pakati pechiuru chezana, asi handina kuwana mukadzi pakati pavazhinji vakadai.

²⁹Asi tarirai, chinhu chimwe ichi chete ndicho chandakawana, kuti Mwari akaita munhu akarurama, asi ivo vakatsvaka mano mazhinji.”