Read Shona Union Version 2002 Muparidzi 9 Bible Online

Muparidzi 9 - Shona Union Version 2002 bible

Muparidzi 9

¹Nokuti izvozvo zvose ndakazvirangarira nomwoyo wangu, kuti ndinzwisise izvozvi zvose, kuti vakarurama navakachenjera vari paruoko rwaMwari, pamwechete namabasa avo; kana kuri kuda kana kuvenga, munhu haazvizivi; zvose zviri mberi kwazvo.

²Zvose zvinoenzanisirwa vose; chinhu chimwe chinoitirwa akarurama noakaipa, akanaka noakachena noane tsvina, anobayira noasingabayiri, akanaka nomutadzi, anopika noanotya kupika.

³Chinhu ichi chakaipa pakati pezvose zvinoitwa pasi pezuva, kuti chinhu chimwe chiitirwe vose; zvirokwazvowo, mwoyo yavanakomana vavanhu izere nezvakaipa, uye upengo huri mumwoyo yavo vachiri vapenyu; shure kwaizvozvo vanoenda kuvakafa.

⁴Nokuti kana munhu achiri pakati pavapenyu vose, achine chinhu chaangatarira; nokuti imbwa mhenyu inopfuura shumba yakafa.

⁵Nokuti vapenyu vanoziva kuti vachazofa, asi vakafa havana chavanoziva, kunyange nomubayiro havachina; nokuti havacharangarirwi.

⁶Rudo rwavo, nokuvenga kwavo, negodo ravo, zvose zvanguva zvapera hazvo; havachino mugove nokusingaperi pazvose zvinoitwa pasi pezuva.

⁷Enda zvako, udye zvokudya zvako nomufaro, unwe waini yako nomwoyo wakafara; nokuti Mwari atofadzwa namabasa ako.

⁸Nguo dzako dzigare dzakachena; nomusoro wako urege kushaiwa mafuta.

⁹Gara nomufaro nomukadzi wako, waunoda, mazuva ako ose asina maturo, aakakupa pasi pezuva, mazuva ako ose asina maturo; nokuti ndiwo mugove wako paupenyu, uye pakubata kwako kwaunobata pasi pezuva.

¹⁰Zvose zvinowana ruoko rwako, kuti ruzviite, uzviite nesimba rako rose; nokuti hakune basa, kana zano, kana zivo, kana uchenjeri paSheori kwaunoenda.

¹¹Ndakadzoka, ndikaona pasi pezuva, kuti anomhanyisa haazi iye anokunda, ane simba haazi iye anokunda pakurwa, akachenjera haazi iye ane zvokudya, vanhu vane njere havazi ivo vane pfuma, vanhu vanoumhizha havazi ivo vanofarirwa; asi vanowirwa vose nenguva nezvinoitika.

¹²Nokuti nomunhuwo haazivi nguva yake; sehove, dzinobatwa murutava rwakaipa, kana shiri, dzinobatwa murugombe; saizvozvo vanakomana vavanhu vanoteyiwa nenguva yakaipa, kana yavawira kamwe-kamwe.

¹³Ndakaonawo pasi pezuva uchenjeri hwakadai, ndikati hukuru.

¹⁴Kwakanga kune guta duku, maiva navarume vashoma; mumwe mambo mukuru akarimukira, akarikomba, akarivakira masvingo makuru okurwa nawo.

¹⁵Zvino mukati maro makawanikwa murombo akanga akachenjera, iye akaponesa guta nouchenjeri hwake; asi hakuna munhu akarangarira munhu uyo murombo.

¹⁶Ipapo ndakati, “Uchenjeri hunopfuura simba; kunyange zvakadaro uchenjeri hwomurombo hunoshorwa, namashoko ake haateererwi.”

¹⁷Mashoko avakachenjera, anonzwika kana kwakadzikama, anopfuura kudanidzira kwomunhu anobata ushe pakati pamapenzi.

¹⁸Uchenjeri hunopfuura nhumbi dzokurwa; asi mutadzi mumwe anoparadza zvakanaka zvizhinji.