Read Shona Union Version 2002 Rwiyo Rukuru rwaSoromoni 1 Bible Online

Rwiyo Rukuru rwaSoromoni 1 - Shona Union Version 2002 bible

Rwiyo Rukuru rwaSoromoni 1

¹Rwiyo rukuru rwaSoromoni.

²Ngaanditsvode nokutsvoda kwomuromo wake; Nokuti rudo rwako rwakanaka kupfuura waini.

³Zvizoro zvako zvinonhuwira zvakanaka; Zita rako rakaita samafuta akadururwa; Saka mhandara dzinokuda.

⁴Ndikwevere kwauri; tichakutevera tichimhanya; Mambo wakandiisa mudzimba dzake dzomukati; Tichafara nokukufarira zvikuru iwe; Ticharumbidza rudo rwako kupfuura waini; Zvakarurama zvavakakuda.

⁵Ndakasviba, asi ndakanaka hangu, Imi vakunda veJerusaremu, Samatende eKedhari, Semicheka yakaremberedzwa yaSoromoni.

⁶Musanditarira, zvandakasviba, Nokuti zuva rakandipisa. Vanakomana vamai vangu vakanditsamwira, Vakandiita murindi weminda yemidzambiringa; Asi munda wangu wemidzambiringa handina kuuchengeta.

⁷Ndiudze iwe, unodikanwa nomweya wangu, Kuti unofudza boka rako kupi, Kuti unorizorodza kupi masikati; Nokuti ndichaitirei somunhu akafukidzwa kumeso Pakati pamapoka eshamwari dzako?

⁸Kana usingazivi, iwe unopfuura vakadzi vose nokunaka, Tevera makwara amapoka, Ufudze makwayana ako kurutivi rwamatende avafudzi.

⁹Ndakakufananidzira iwe, shamwari yangu, Nebhiza pangoro dzaFarao.

¹⁰Matama ako akanaka pakati pezvirukwa zvevhudzi; Mutsipa wako nezvibwe zvinokosha zvakatungirwa.

¹¹Tichakuitira zvirukwa zvendarama Nezvuma zvesirivha.

¹²Nguva yose mambo agere patafura yake, Nado yangu yakabudisa kunhuwira kwayo.

¹³Mudiwa wangu akaita kwandiri sehombodo yemura, Inogara pakati pamazamu angu.

¹⁴Mudiwa wangu akaita kwandiri sesumbu ramaruva ehena, Paminda yemidzambiringa paEngedhi.

¹⁵Tarira, akanaka, shamwari yangu; Tarira, akanaka; Meso ako akafanana neenjiva.

¹⁶Tarira, akanaka, mudiwa wangu, zvirokwazvo, unofadza; Uvato hwedu ndipo pabumhudza.

¹⁷Matanda eimba yedu ndeemisidhari; Mbariro dzayo ndedzemisiperesi.