Read Shona Union Version 2002 Rwiyo Rukuru rwaSoromoni 2 Bible Online

Rwiyo Rukuru rwaSoromoni 2 - Shona Union Version 2002 bible

Rwiyo Rukuru rwaSoromoni 2

¹Ndiri ruva rebundo rokuSharoni, Ndiri ruva rokumapani.

²Seruva pakati peminzwa, Ndizvo zvakaita mudiwa wangu pakati pavakunda.

³Somuapuri pakati pemiti yokudondo, Ndizvo zvakaita mudiwa wangu pakati pavanakomana. Ndakagara mumumvuri wake nomufaro mukuru; Zvibereko zvake zvakanga zvichinaka pamukanwa wangu.

⁴Akandiisa kuimba yomutambo; Mureza wake pamusoro pangu rwakanga ruri rudo.

⁵Nditsigirei namadzambiringa akaomeswa, ndisimbisei namaapuri; Nokuti ndinorwara norudo.

⁶Ruoko rwake rworuboshwe ruri pasi pomusoro wangu; Ruoko rwake rworudyi runondimbundikira.

⁷Ndinokupikirai, imi vakunda veJerusaremu, Nemharapara nenondo dzokubundo, Kuti murege kupfutidza kana kumutsa rudo, Kusvikira irwo rwada rumene.

⁸Inzwai izwi romudiwa wangu! Tarirai, wouya, Achikwakuka pamakomo, Achichirika pazvikomo.

⁹Mudiwa wangu akafanana nemharapara kana nomwana wenondo; Tarirai, womira seri kworusvingo rwedu; Anotarira napamawindo; Anodongorera napazvitanda zvamawindo.

¹⁰Mudiwa wangu akataura, akati kwandiri, “Simuka, shamwari yangu, akanaka wangu, huya!”

¹¹Nokuti, tarira, chando chaenda; Mvura yapera, yaenda;

¹²Maruva aonekwa panyika; Nguva yokurira kweshiri yasvika, Nezwi renjiva rinonzwika panyika yedu.

¹³Muonde woibvisa maonde awo mambishi, Uye midzambiringa yotunga maruva; Yobudisa kunhuwira kwawo; Simuka, shamwari yangu, akanaka wangu huya!

¹⁴Iwe njiva yangu, uri mumikaha yedombo, Pakadzitika pamawere; Ndione chiso chako, Ndinzwe izwi rako; Nokuti izwi rako rakanaka, chiso chako chakanaka.

¹⁵Tibatirei makava, makava maduku, Anotadzira minda yemidzambiringa; Nokuti minda yedu yemidzambiringa yotunga maruva.

¹⁶Mudiwa wangu ndowangu, neni ndiri wake; Anofudza makwai ake pakati pamaruva ebundo.

¹⁷Kana zuva rotonhorera, nemimvuri yotiza, Tendeuka, mudiwa wangu, uve semharapara nomwana wenondo Pamusoro pamakomo eBheteri.