Read Shona Union Version 2002 Rwiyo Rukuru rwaSoromoni 3 Bible Online

Rwiyo Rukuru rwaSoromoni 3 - Shona Union Version 2002 bible

Rwiyo Rukuru rwaSoromoni 3

¹Usiku, ndiri panhoo dzangu, Ndakamutsvaka anodikanwa nomweya wangu; Ndakamutsvaka, asi handina kumuwana.

²Ndikati, ndichasimuka zvino, ndifambe-fambe neguta; Panzira dzomumusha, napamatare Ndipo pandichatsvaka anodikanwa nomweya wangu; Ndikamutsvaka, asi handina kumuwana.

³Varindi, vanofamba-famba neguta, vakandiwana; Ndikati kwavari, “Matongoona anodikanwa nomweya wangu here?”

⁴Ndakati ndangobva kwavari, ndakapfuura zvishoma, Ndikamuwana iye anodikanwa nomweya wangu; Ndikamubata, ndikaramba kumuregedza, Kusvikira ndamuisa mumba mamai vangu, Muimba yomukati yaiye wakandibereka.

⁵Ndinokupikirai, imi vakunda veJerusaremu, Nemharapara nenondo dzokubundo, Kuti murege kupfutidza kana kumutsa rudo, Kusvikira irwo rwada rumene.

⁶Ndianiko uyo anokwira achibva kurenje Seshongwe dzohutsi, Anonhuwira nemura nezvinonhuwira, Nezvakakuyiwa zvose zvomutengesi?

⁷Tarirai, ndicho chigaro chaSoromoni chinotakurwa; Mhare dzina makumi matanhatu dzakachikomberedza, Vanobva pamhare dzavaIsiraeri.

⁸Vose vanoziva kubata munondo, vakadzidza kurwa; Murume mumwe nomumwe anomunondo wake pahudyu yake, Nokuda kwezvinotyisa usiku.

⁹Mambo Soromoni akazviitira chigaro chinotakurwa Chamatanda eRebhanoni.

¹⁰Akaita mbiru dzacho nesirivha, Musana wacho nendarama, pokugara kwacho nomucheka mutsvuku, Mukati macho makarongwa norudo Rwavakunda veJerusaremu.

¹¹Budai, imi vakunda veZioni, muone mambo Soromoni, Ane korona yaakadzikwa namai vake Pazuva rokuwana kwake, Napazuva romufaro womwoyo wake.