Read Shona Union Version 2002 Rwiyo Rukuru rwaSoromoni 8 Bible Online

Rwiyo Rukuru rwaSoromoni 8 - Shona Union Version 2002 bible

Rwiyo Rukuru rwaSoromoni 8

¹Aiwa, dai wakanga wakaita sehanzvadzi yangu, Akamwa mazamu amai vangu! Dai ndakuwana panze, ndingadai ndakutsvoda; Zvirokwazvo, hakuna aindishora.

²Ndaienda newe, ndikakuisa mumba mamai vangu, Ivo vandidzidzise; Ndaikupa waini yakavhenganiswa nezvinonhuwira kuti uinwe, Nomukumbi wamatamba angu.

³Ruoko rwake rworuboshwe ngaruve pasi pomusoro wangu, Ruoko rwake rworudyi ngarundimbundikire.

⁴Ndinokupikirai, imi vakunda veJerusaremu, Kuti murege kupfutidza kana kumutsa rudo, Kusvikira irwo rwada rumene.

⁵Ndianiko uyo anokwira achibva kurenje, Akasendamira pamudiwa wake? Pasi pomuapuri ndipo pandakakumutsa; Ndipo pakakutamburira mai vako, Ndipo pavakakutamburira, ivo vakakubereka.

⁶Ndishonge sechisimbiso pamwoyo pako, Sechisimbiso paruoko rwako; Nokuti rudo rune simba sorufu; Godo rinokuvadza seSheori; Kupisa kwaro ndiko kupisa kwomoto, Murazvo chaiwo waJehovha.

⁷Mvura zhinji haigoni kudzima rudo; Nzizi hadzingarubitirisi; Kunyange munhu akapa pfuma yose yeimba yake kuti awane rudo, Angazvidzwa chose.

⁸Tine chinun'una, Chigere kuva namazamu; Tichadiniko nechinun'una chedu Nezuva raachakumbirwa?

⁹Kana ari rusvingo, Tichavaka pamusoro pake kashongwe kwesirivha; Kana ari mukova, Tichamukomberedza namapuranga emisidhari.

¹⁰Ini ndaiva rusvingo, mazamu angu akaita shongwe dzarwo; Panguva iyo ndakava pamberi pake somunhu akawana rugare.

¹¹Soromoni akanga ano munda wemidzambiringa paBhaarihamoni; Akaisa munda uyo kuvatariri; Mumwe nomumwe aifanira kumuvigira masirivha ane gumi ramazana pamusoro pezvibereko zvawo.

¹²Munda wangu wemidzambiringa, iwo wangu, uri pamberi pangu; Iwe Soromoni, uchapiwa gumi ramazana, Navanochengeta zvibereko zvawo vachapiwa mazana maviri.

¹³Iwe, unogara muminda, Shamwari dzako dzinoteerera izwi rako; Nditendere ini ndirinzwewo.

¹⁴Kurumidza, mudiwa wangu, Uve semharapara kana mwana wenondo Pamusoro pamakomo ezvinonhuwira.