Read Shona Union Version 2002 Isaya 10 Bible Online

Isaya 10 - Shona Union Version 2002 bible

Isaya 10

¹Vane nhamo vanotema mitemo isina kururama, navanyori vanonyora zvisakarurama;

²kuti vadzivise varombo pakururamisirwa, nokutorera varombo vavanhu vangu zvavanofanira kuva nazvo, kuti vapambe chirikadzi, vatorere nherera zvinhu zvavo.

³Asi muchaiteiko pazuva rokutongwa, nerokuparadzwa kuchabva kure? Muchatizira kuna ani kundobatsirwa? Pfuma yenyu muchaivigepiko?

⁴Vachangokotama havo pakati pavasungwa, vachawira pasi pakati pavakaurawa. Kunyange zvakadaro, kutsamwa kwake hakuna kudzorwa, asi ruoko rwake rwakaramba rwakatambanudzwa nazvino.

⁵Nhaiwe Asiria, shamhu yokutsamwa kwangu, wakabata muruoko rwake tsvimbo yeshungu dzangu!

⁶Ndichamutuma kundorwa norudzi runomhura Mwari, ndichamurayira kundorwa navanhu vandinotsamwira, kuti andotora zvakapambwa, andotora zvakatapwa, azvitsikire pasi sedope riri munzira dzomumusha.

⁷Asi iye haafungi kuita izvozvo, nomwoyo wake haarangariri zvakadaro; asi iye anorangarira kuparadza nokupedza marudzi mazhinji.

⁸Nokuti iye anoti, “Ko machinda angu ose haazi madzimambo here?

⁹Ko Karino harina kuitirwa zvakaitirwa Karikemishi here? NeHamati seAripadhi here? NeSamaria seDhamasiko here?

¹⁰Ruoko rwangu sezvarwakasvikira ushe hwezvifananidzo, kunyange zvifananidzo zvavo zvakavezwa zvakanga zvichipfuura zvapaJerusaremu neSamaria,

¹¹handingaitiri Jerusaremu nezvifananidzo zvaro sezvandakaitira Samaria nezvifananidzo zvaro here?”

¹²Saka zvino kana Ishe apedza basa rake rose pagomo reZioni napaJerusaremu, ndicharova zvibereko zvomwoyo unozvikudza wamambo weAsiria, namanyawi okuzvikudza kwake.

¹³Nokuti akati, “Ndakazviita nesimba roruoko rwangu, uye nouchenjeri hwangu, nokuti ndine njere; ndakabvisa miganho yavanhu, ndakapamba pfuma yavo; semhare ndakawisira pasi vaigara pazvigaro zvoushe;

¹⁴ruoko rwangu rwakawana pfuma yamarudzi avanhu sedendere; ndakaunganidza nyika yose, somunhu anounganidza mazai akasiyiwa; hapana akapfakanyisa bapiro, kana kushamisa muromo, kana kurira.”

¹⁵Ko sanhu ringazvirumbidza pamusoro poanotema naro here? Kana jeko ringazvikudza pamusoro paanobata naro here? Zvaifanana netsvimbo inozunungusa vanorova nayo, kana mudonzvo unosimudza chinhu chisati chiri huni.

¹⁶Naizvozvo Ishe, Ishe wehondo, achatuma kuonda pakati pavakakora vake; pasi pokubwinya kwake pachabatidzwa chinopisa chakafanana nokupisa kwomoto.

¹⁷Chiedza chavaIsiraeri chichava moto, noMutsvene wake murazvo womoto; uchapisa nokupedza minzwa yake norukato rwake nezuva rimwe.

¹⁸Uchapedza kubwinya kwedondo rake, nokwomunda wake wakaorera, mweya nomuviri kamwe, zvifanane nendonda inongoramba ichipera simba.

¹⁹Miti yakasara yedondo rake ichava mishoma, inganyorwa nomwana.

²⁰Zvino nezuva iro vakasara vaIsiraeri, navanenge vapukunyuka paimba yaJakobho, havangazosendamiri kunoakavarova, asi vachasendamira kuna Jehovha, Mutsvene waIsiraeri, nezvokwadi.

²¹Vakasara vachadzoka, ivo vakasara vaJakobho, kuna Mwari ane simba.

²²Nokuti kunyange vanhu venyu, imi Isiraeri, vakaita sejecha regungwa, vakasara vavo voga vachadzoka; nokuti vakatemerwa kuparadzwa kuzere nokururama.

²³Nokuti Ishe, Jehovha wehondo, achapedzisa kuparadza, kwakagara kwatemwa, panyika yose.

²⁴Saka zvanzi nashe, Jehovha wehondo, “Imi vanhu vangu vagere Zioni, musatya muAsiria, kunyange akakurovai neshamhu nokukusimudzirai tsvimbo yake, sezvaakaitira Ijipiti.

²⁵Nokuti kwasara chinguva chiduku, kutsamwa kwangu kuchapera, hasha dzangu dzichavaparadza.

²⁶“Jehovha wehondo achamusimudzira tyava, sapakurohwa kwavaMidhiani padombo reOrebhi; shamhu yake ichava pamusoro pegungwa, achaisimudza sezvaakaitira Ijipiti.

²⁷Zvino nezuva iro mutoro wake uchabviswa pamafudzi ako, nejoko rake pamutsipa wako, joko richaparadzwa nokuda kwamafuta.”

²⁸Asvika paAiati, apfuura napaMigironi, achengeta nhumbi dzake paMikimashi;

²⁹vakwira napamupata, vakavata paGebha usiku; Rama rinodedera, Gibhea raSauro ratiza.

³⁰Danidzira nezwi rako, iwe mukunda weGarimi! Teerera, iwe Raishi! Iwe Anatoti wourombo!

³¹Madhimena wotiza, vagere Ghebhimi vorongedza kutiza.

³²Zuva ranhasi achazorora paNobhi; anozunungusira gomo romukunda weZioni, icho chikomo cheJerusaremu, ruoko rwake.

³³Tarirai, Ishe, Jehovha wehondo, achatema mashizha nokutyisa; akareba achatemwa, naakakwirira achawiswa pasi.

³⁴Achatema nedare matenhere edondo, Rebhanoni richawiswa noane simba.