Read Shona Union Version 2002 Isaya 11 Bible Online

Isaya 11 - Shona Union Version 2002 bible

Isaya 11

¹Zvino pahunde yaJese pachabuda bukira, davi, rinobuda pamidzi yake, richabereka zvibereko.

²Mweya waJehovha uchagara pamusoro pake, mweya wenjere nowokungwara, mweya wamano nesimba, mweya wokuziva nokutya Jehovha.

³Mufaro wake uchava pakutya Jehovha; haangatongi nokungoona nameso bedzi, kana kupa mhosva nokungonzwa nenzeve dzake bedzi;

⁴asi achatongera varombo nokururama, achatambira vanyoro venyika mhaka dzavo zvakarurama; acharova nyika neshamhu yomuromo wake, achavauraya vakaipa nomweya wemiromo yake.

⁵Kururama richava bhanhire rechiuno chake, kutendeka richava bhanhire rezvidza zvake.

⁶Bere richagara negwayana, ingwe ichavata pasi nembudzana, nemhuru nomwana weshumba nechipfuwo chakakora pamwechete; uye mwana muduku achadzitungamirira.

⁷Mhou nebere zvichafura; vana vadzo vachavata pamwechete; shumba ichadya uswa senzombe.

⁸Mwana anomwa, achatamba pamwena wenyoka, uye mwana akarumurwa achapinza ruoko rwake mubako remvumbi.

⁹Hazvingakuvadzi kana kuparadza pagomo rangu rose dzvene, nokuti nyika yose ichazara nokuziva Jehovha, sezvinofukidza mvura pasi pegungwa.

¹⁰Nezuva iro mudzi waJese, iwo umirepo somureza wavanhu, uchatsvakwa namarudzi avanhu; nzvimbo yake yokuzorora ichava nembiri.

¹¹Zvino nezuva iro Ishe achatambanudzazve ruoko rwake kechipiri kuti adzikinure vakasara vavanhu vake, ivo vanenge vasara, vari paAsiria, neIjipiti, nePatirosi, neKushi, neErami, neShinari, neHamati, nokuzvitsuwa zvegungwa.

¹²Achasimudzira marudzi mureza, nokuunganidza vadzingwa vaIsiraeri, nokuunganidza vaJudha vakaparadzirwa kumativi mana enyika.

¹³Ipapo godo ravaEfuremu richapera, navanomanikidza vaJudha vachaparadzwa; vaEfuremu havangagodori vaJudha, navaJudha havangamanikidzi vaEfuremu.

¹⁴Asi vachabhururukira pamusoro pamafudzi avaFirisitia kumavirazuva, vachapambara pamwechete vana vamabvazuva; vachatambanudzira maoko avo kuvaEdhomu navaMoabhi, navana vaAmoni vachavateerera.

¹⁵Jehovha achaparadza chose muromo wegungwa reIjipiti, achasimudzira ruoko rwake pamusoro poRwizi nemhepo yake inopisa, ndokururova ruite hova nomwe, ayambuse vanhu vakafuka shangu.

¹⁶Vanhu vake vakasara, vakasara Asiria, vachava nenzira huru; sezvazvakaitirwa Isiraeri nezuva ravakabuda munyika yeIjipiti.