Read Shona Union Version 2002 Isaya 16 Bible Online

Isaya 16 - Shona Union Version 2002 bible

Isaya 16

¹Tumirai mubati wenyika makwayana, abve Sera aende kurenje, kugomo romukunda weZioni.

²Nokuti seshiri dzinodzungaira, sedendere rakaparadzirwa, ndizvo zvichaita vakunda vaMoabhi pamazambuko aArinoni.

³“Itai mano, ruramisira; mumvuri wako uuite sousiku pakati pamasikati makuru; vanza vadzingwa, usapandukira anotiza.

⁴Vanhu vangu vakadzingwa ngavagare newe; kana ari Moabhi, uve kwaari paangavanda pamberi pomuparadzi; nokuti mutambudzi haachipo, kuparadza kwapera, vamanikidzi vabva panyika.

⁵Chigaro choushe chichamiswa netsitsi; mumwe uchagara pamusoro pacho nechokwadi, mutende raDhavhidhi, achitonga, achitsvaka kururamisira vanhu, achikurumidza kuita zvakarurama.”

⁶Takanzwa zvokuzvikudza kwaMoabhi, kuti unozvikudza kwazvo; zvamanyawi ake, nokuzvikudza kwake, nehasha dzake; asi kuzvirumbidza kwake hakuna maturo.

⁷Saka Moabhi achachema Moabhi, mumwe nomumwe achachema; muchachemera mapundu amadzambiringa eKirihareseti, mamanikidzwa kwazvo.

⁸Nokuti minda yeHeshibhoni yaoma, nomudzambiringa weSibhima; madzishe amarudzi avhuna matavi awo akanaka, akanga achisvikira Jazeri, akanga atandira kurenje; matavi awo akanga atandavara, ayambukira gungwa.

⁹Saka ndichachema nokuchema kwaJazeri ndichichemera mudzambiringa weSibhima; ndichakudiridza iwe Heshibhoni neEreare nemisodzi yangu; nokuti mhere yokurwa yawira pamusoro pezvibereko zvako zvezhizha napamusoro pokukohwa kwako.

¹⁰Mufaro wabviswa, nokufara pamunda waibereka zvakanaka; paminda yemidzambiringa hapachazovi nokuimba kana izwi romufaro; hapachazovi musviniri anosvinira madzambiringa pazvisviniro; ndagumisa kupururudza.

¹¹Naizvozvo mwoyo wangu unorira sembira pamusoro paMoabhi, nedumbu rangu pamusoro peKiriheresi.

¹²Zvino kana Moabhi achizviratidza pamberi paJehovha, kana achizvinetsa padunhu rakakwirira, nokupinda panzvimbo yake tsvene kuzonyengetera, haangatongobatsirwi chinhu.

¹³Ndirori shoko rakataurwa naJehovha pamusoro paMoabhi panguva yakare.

¹⁴Asi zvino Jehovha akataura achiti, “Makore matatu asati apfuura, samakore omunhu anobatira mubayiro, kukudzwa kwaMoabhi kuchazvidzwa, pamwechete navanhu vake vazhinji; vakasara vachava vashoma kwazvo, vasina simba.”