Read Shona Union Version 2002 Isaya 20 Bible Online

Isaya 20 - Shona Union Version 2002 bible

Isaya 20

¹Negore rokusvika kwaTaritani paAshidhodhi, atumwa naSarigoni mambo weAsiria, akarwa neAshidhodhi nokurikunda;

²nenguva iyo Jehovha akataura naIsaya mwanakomana waAmozi, achiti, “Enda, undosunungura gudza riri pazviuno zvako, ubvise shangu yako parutsoka rwako.” Iye akaita saizvozvo, akafamba asine nguo, asine shangu.

³Zvino Jehovha akati, “Muranda wangu Isaya sezvaakafamba asine nguo asine shangu makore matatu akava chiratidzo nechishamiso pamusoro peIjipiti neItiopia;

⁴saizvozvo mambo weAsiria achaenda navatapwa veIjipiti navakadzingwa veItiopia, vaduku navakuru, vasina nguo vasina shangu, vakafukurwa zviuno, chive chinyadzo cheIjipiti.

⁵Vachavhunduswa nokunyadziswa pamusoro peItiopia, chivimbo chavo, neIjipiti rumbidzo yavo.

⁶“Vagere panyika iyi iri pamhenderekedzo yegungwa vachati nezuva iro, ‘Tarirai, ndizvo zvaita chivimbo chedu, kwataitizira tichitsvaka kurwirwa kuna mambo weAsiria; ko isu zvino tichapukunyuka sei?’ ”