Read Shona Union Version 2002 Isaya 26 Bible Online

Isaya 26 - Shona Union Version 2002 bible

Isaya 26

¹Nezuva iro rwiyo urwu ruchaimbwa panyika yavaJudha: “Tine guta rakasimba; iye achaisapo masvingo nenhare ruve ruponeso.

²Zarurai masuo, kuti rudzi rwakarurama, runochengeta chokwadi, rupinde.

³“Anomwoyo wakasimba muchamuchengeta murugare rukuru, nokuti anovimba nemi.

⁴Vimbai naJehovha nokusingaperi, iye Jehovha ndiye dombo nokusingaperi.

⁵Nokuti akaderedza vagere pakakwirira, iro guta riri kumusoro; anorideredza, anorideredza kusvikira pavhu; anoriputsira pasi muguruva.

⁶Richatsikwa netsoka, idzo tsoka dzavarombo, nokutsika kwavanoshaiwa.”

⁷Nzira yavakarurama yakarurama; imi munoruramisa nzira yavakarurama.

⁸Zvirokwazvo, takakumirirai Jehovha, panzira yokutonga kwenyu; mweya yedu inoshuva zita renyu nechirangaridzo chenyu.

⁹Ndakakushuvai nomweya wangu usiku; zvirokwazvo, ndichakutsvakai zvikuru nomweya wangu uri mukati mangu; nokuti kana kutonga kwenyu kuri panyika, vanhu vagere munyika vanodzidza zvakarurama.

¹⁰Akaipa kunyange achinzwirwa tsitsi, haangadzidzi zvakarurama; achaita hake zvisakarurama panyika yakarurama, haangaoni umambo hwaJehovha.

¹¹Jehovha, ruoko rwenyu rwakasimudzwa, asi ivo havaoni; asi vachaona kushingaira kwenyu pamusoro pavanhu, vakanyadziswa; zvirokwazvo moto uchapedza vavengi venyu.

¹²Jehovha, imi muchatigadzirira rugare; nokuti makatibatirawo mabasa edu ose.

¹³Jehovha Mwari wedu, mamwe madzishe kunze kwenyu akanga akatibata; asi ticharumbidza zita renyu tichibatsirwa nemi moga.

¹⁴Vakafa havangararamizve, vaparara, havazomukizve; saka makasvika kwavari, mukavaparadza, nokugumisa kurangarirwa kwavo kwose.

¹⁵Mawanza rudzi, Jehovha, mawanza rudzi; makurumbira, makurisa miganho yose yenyika.

¹⁶Jehovha, vakakutsvakai panguva yokutambudzika; vakadurura munyengetero muchivaranga.

¹⁷Mukadzi ane pamuviri, asvika pedyo pakusununguka, sezvaanorwadziwa achichema pakurwadziwa kwake, ndizvo zvatakanga takaita pamberi penyu, Jehovha.

¹⁸Isu takanga tava nepamuviri, takanga tiri pakurwadziwa, takabereka zvinenge mhepo bedzi; hatina kuvigira nyika sununguro, uye vangagara panyika havana kuzvarwa.

¹⁹Vakafa venyu vachararama, zvitunha zvavo zvichamuka. Mukai, muimbe, imi mugere muguruva; nokuti dova renyu rakaita sedova rechiedza; nyika ichabudisa vakafa.

²⁰Uyai vanhu vangu, pindai muimba yenyu yomukati, mupfige mikova yenyu shure kwenyu; muvande nguva duku, kusvikira kutsamwa kwapfuura.

²¹Nokuti tarira, Jehovha anobuda panzvimbo yake kurova vagere panyika nokuda kwezvivi zvavo; nyikawo ichafukura ropa rayo, ikasazofukidzazve vakaurawa vayo.