Read Shona Union Version 2002 Isaya 32 Bible Online

Isaya 32 - Shona Union Version 2002 bible

Isaya 32

¹Tarirai, mambo achabata ushe nokururama, machinda achabata achiruramisira.

²Munhu mumwe nomumwe achava soutiziro pamhepo, sechivando pakunaya kukuru kwemvura, senzizi dzemvura panzvimbo yakaoma, somumvuri wedombo guru panyika yafa nenyota.

³Meso avanoona haangatsinzini, nzeve dzavanonzwa dzichateerera.

⁴Mwoyo yavanotaura vasingarangariri zvakanaka ichanzwisisa ruzivo, marimi avanokakamira achaziva kutaura zvakanaka.

⁵Benzi harichazonzi munhu akakudzwa, munyengeri haanganzi mukomboreri.

⁶Nokuti benzi rinotaura zvohupenzi, mwoyo waro unoita zvakaipa, zvaanoita zvinomhura Mwari, nokureva zvingarasha vanhu pamusoro paJehovha, zvaanorega kugutisa mweya wavane nzara, nokushaisa vane nyota chinonwiwa.

⁷Mitoo yomunyengeri yakaipa; anofunga mano akaipa, kuti aparadze vanyoro namashoko enhema, kunyange anoshaiwa achitaura zvakanaka.

⁸Asi akarurama anofunga zvinhu zvakarurama; anorambira panzira yezvakarurama.

⁹Simukai, imi vakadzi vagere zvakanaka, munzwe izwi rangu; imi vakunda vasine hanya, teererai kutaura kwangu.

¹⁰Nokuti kana kwapfuura gore namazuva, muchatambudzika, imi vasine hanya; nokuti kukohwiwa kwamadzambiringa kuchakona, nguva yokuunganidza haingasviki.

¹¹Dederai, imi vakadzi vagere zvakanaka; tambudzikai, imi vasine hanya; zvifukurei, mubvise nguo dzenyu, muzvisunge zviuno namakudza.

¹²Vachazvirova zvipfuva nokuda kweminda yaifadza, nomudzambiringa waibereka zvakanaka.

¹³Panyika yavanhu vangu pachamera minzwa norukato; zvirokwazvo, pamusoro pedzimba dzose dzomufaro muguta romufaro.

¹⁴Nokuti imba yamambo ichasiyiwa, guta rina vanhu vazhinji richaita dongo; chikomo nenhare zvichashanduka mapako nokusingaperi, panofara mbizi, namafuro ezvipfuwo;

¹⁵kusvikira mweya uchidururwa pamusoro pedu uchibva kumusoro, renje rikaita munda unobereka zvakanaka, nomunda unobereka zvakanaka uchinzi idondo.

¹⁶Ipapo kururamisira kuchagara murenje, kururama kuchagara mumunda unobereka zvakanaka.

¹⁷Basa rokururama richava rugare, zvibereko zvokururama zvichava kunyarara nokutenda nokusingaperi.

¹⁸Vanhu vangu vachagara paugaro vane rugare, napadzimba dzakasimba, napanzvimbo dzokuzorora dzakadzikama.

¹⁹Asi chimvuramabwe chichavapo kana dondo richiwa, neguta richaparadzwa chose.

²⁰Makaropafadzwa imi munokusha pose panemvura, munosundira makumbo enzombe neembongoro.