Read Shona Union Version 2002 Isaya 33 Bible Online

Isaya 33 - Shona Union Version 2002 bible

Isaya 33

¹Une nhamo, iwe unoparadza, usina kuparadzwa umene; iwe unoita nokunyengera, asi havana kukuitira nokunyengera, iwe! Kana wapedza kuparadza, newewo uchaparadzwa, kana wapedza kuita nokunyengera, vachakuitira nokunyengera newewo.

²Jehovha mutinzwire tsitsi, takakumirirai; ivai ruoko rwedu mangwanani ose, noruponeso rwedu panguva yokutambudzika.

³Marudzi avanhu akatiza achinzwa mubvumo, marudzi akaparadzirwa imi muchisimuka.

⁴Zvakapambwa zvenyu zvichaparadzwa, sezvinoparadza gwatakwata; somumhanyire wemhashu, saizvozvo vanhu vachamhanyira kwazviri.

⁵Jehovha akakudzwa, nokuti anogara kumusoro; akazadza Zioni nokururamisira nokururama.

⁶Panguva dzako pachava nokugarika, nokuwanda kwokuponeswa, nouchenjeri nezivo; kutya Jehovha ndiyo pfuma yake.

⁷Tarirai, mhare dzavo dzinodanidzira dziri kunze; nhume dzorugare dzinochema zvikuru.

⁸Migwagwa mikuru yaparadzwa, vafambi havachipo; aputsa sungano, azvidza maguta, haane hanya nomunhu.

⁹Nyika inochema, yaziya; Rebhanoni ranyadziswa, rooma; Sharoni rafanana nerenje; Bhashani neKarimeri azuka mashizha.

¹⁰“Zvino ndichasimuka, ndizvo zvinotaura Jehovha; zvino ndichazvisimudza, zvino ndichakudzwa.

¹¹“Imi muchava napamuviri pehundi, muchabereka mashanga; mweya wenyu moto uchakupedzai.

¹²Marudzi avanhu achaita sokupiswa kwesuko, seminzwa yakatemwa, inopiswa nomoto.

¹³“Inzwai, imi muri kure, zvandakaita; imi muri pedyo, muzive simba rangu.”

¹⁴Vatadzi vari paZioni vanotya, vasingadi Mwari, vabatwa nokudedera. “Ndianiko pakati pedu angagara nomoto unoparadza? Ndiani pakati pedu angagara nokupisa kusingaperi?”

¹⁵Ndiye anofamba nokururama, anotaura zvakarurama; iye anoshora pfuma yakawanikwa nokunyengera, anozuza maoko ake achiramba fufuro, anodzivira nzeve dzake, kuti arege kunzwa mashoko eropa, anotsinzina meso ake kuti arege kutarira zvakaipa;

¹⁶iye achagara pakakwirira, nhare dzamatombo dzichava utiziro hwake; zvokudya zvake achazvipiwa, mvura yake haingapwi.

¹⁷Meso ako achaona mambo pakunaka kwake, achaona nyika yakakura kwazvo.

¹⁸Mwoyo wako ucharangarira nguva yokutya, uchiti, “Aripiko iye aiverenga, aripiko aiyera mutero? Aripiko aiverenga shongwe?”

¹⁹Haungazooni vanhu vane hasha, vanhu vanorurimi runoshamisa, rwausingagoni kunzwa, rurimi rwokumwe rwausingagoni kunzwisisa.

²⁰Tarirai Zioni, iro guta remitambo yedu; meso ako achaona Jerusaremu hwava ugaro hwakadzikama, tende risingazovhomorwi, nebote raro rimwe risingazodamburwi.

²¹Asi Jehovha achavapo nesu noumambo hwake, ichava nzvimbo ine nzizi nehova dzakafara, magwa anokwasviwa haangasvikipo, nezvikepe zvikuru hazvingapfuuripo.

²²Nokuti Jehovha ndiye mutongi wedu, Jehovha ndiye mutemi wemirayiro yedu, Jehovha ndiye mambo wedu; iye achatiponesa.

²³Mabote ako akati dembu-tembu; haagoni kusimbisa muromo wapasi wedanda rechikepe chavo, haagoni kutasanura seiri; ipapo zvakatapwa nezvakapambwa zvizhinji zvinogoverwa; zvirema zvinotora zvakatapwa.

²⁴Hakuna ageremo, achati, “Ndinorwara; vanhu vageremo vachakanganwirwa zvakaipa zvavo.”