Read Shona Union Version 2002 Isaya 35 Bible Online

Isaya 35 - Shona Union Version 2002 bible

Isaya 35

¹Renje nenyika yakaoma zvichafara; sango richafara kwazvo, richatumbuka seruva.

²Richatumbuka zhizhinji, nokufara kwazvo nomufaro nokuimba; richapiwa kunaka kukuru kweRebhanoni, noukomba hweKarimeri neSharoni; vachaona kunaka kukuru kwaJehovha, ihwo ukomba hwaMwari wedu.

³Simbisai maoko asine simba, mutsigire mabvi anodedera.

⁴Iti kuna vane mwoyo inotya, “Simbai, musatya! Tarirai, Mwari wenyu achauya nokutsiva, nokuripira kwaMwari; achauya achikuponesai.”

⁵Ipapo meso amapofu achasvinudzwa, nenzeve dzematsi dzichadziurwa.

⁶Ipapo anokamhina achakwakuka senondo, rurimi rwembeveve ruchaimba; nokuti mvura zhinji ichadzutuka murenje, nehova dzemvura musango.

⁷Jecha, rinopisa, richashanduka dziva, nevhu, rine nyota, zvitubu zvemvura; paugaro hwamakava, paaivata, pachava nouswa, netsanga nenhokwe.

⁸Ipapo pachava nomugwagwa, nenzira, ichanzi, “Nzira youtsvene;” ine tsvina haangafambi nayo, asi ichava yavo; vanofamba nayo, kunyange ari mapenzi, havangarashiki.

⁹Hapangavi neshumba, kunyange nechikara hachingafambipo; hazvingawanikwipo, asi vakadzikinurwa ndivo vachafambapo;

¹⁰vakasunungurwa vaJehovha vachadzoka, vachasvika Zioni vachiimba; mufaro usingaperi uchava pamisoro yavo; vachawana mufaro nomwoyo muchena, kuchema nokusuwa kuchatiza.