Read Shona Union Version 2002 Isaya 36 Bible Online

Isaya 36 - Shona Union Version 2002 bible

Isaya 36

¹Zvino negore regumi namana ramambo Hezekia, Sanheribhi mambo weAsiria, akandorwa namaguta ose aJudha akakombwa namasvingo, akaakunda.

²Zvino mambo weAsiria akatuma mukuru wavatariri abve Rakishi aende Jerusaremu kuna mambo Hezekia nehondo huru. Akamira pamugero wedziva rokumusoro pamugwagwa unoenda kumunda womusuki.

³Ipapo Eriakimu mwanakomana waHirikia, waichengeta imba yamambo, naShebhina munyori naJoa mwanakomana waAsafi, gurukota guru, vakabudira kwaari.

⁴Mukuru wavatariri akati kwavari, “Zvino imi muti kuna Hezekia, ‘Zvanzi namambo mukuru, mambo weAsiria, kuvimba uku kwaunovimba nako ndokwei?’

⁵Ini ndinoti, mano ako nesimba rokurwa naro mashoko zvawo asina maturo; zvino unovimba naniko, zvawandimukira ini?

⁶“Tarira, unovimba nomudonzvo worutsanga urwu rwakavhunika, Ijipiti, runoti kana munhu akasendama kwamuri, ruchapinda muruoko rwake, rukamubaya; ndizvo zvakaita Farao mambo weIjipiti kuna vose vanovimba naye.

⁷“Asi kana ukati kwandiri, ‘Tinovimba naJehovha Mwari wedu,’ ko haazi iye akabvisirwa matunhu akakwirira namaaritari ake naHezekia, akati kuna Judha neJerusaremu, ‘Munofanira kunamata pamberi pearitari iri here?’

⁸Naizvozvo zvino chipikiranai henyu natenzi wangu, mambo weAsiria, ndikupe mabhiza ane zviuru zviviri, kana iwe ukagona kuisa vatasvi pamusoro pawo.

⁹Ungagona seiko kukunda mukuru mumwe kuvaduku vavaranda vatenzi wangu? Zvino wovimba neIjipiti kuti upiwe ngoro namabhiza navo?

¹⁰Ini ndauya kuzorwa nenyika ino kuti ndiiparadze ndisina Jehovha kanhi? Ndiye Jehovha akati kwandiri, ‘Enda undorwa nenyika iyo, uiparadze.’ ”

¹¹Ipapo Eriakimu, mwanakomana waHirikia, naShebhina, naJoa vakati kumukuru wavatariri, “Tinokumbira kuti mutaure henyu navaranda venyu norurimi rwechiAramia, nokuti tinochinzwisisa; murege henyu kutaura nesu norurimi rwavaJudha, vanhu vose vari parusvingo vazvinzwe.”

¹²Asi mukuru wavatariri akati kwaari, “Tenzi wangu akandituma kuna tenzi wako nokwauri here, kuti nditaure mashoko awa? Haana kundituma here kuvanhu vagere pamusoro porusvingo, kuti vadye tsvina yavo nemvura yavo pamwechete nemi?”

¹³Ipapo mukuru wavatariri akamira, akadanidzira nezwi guru norurimi rwavaJudha, akataura akati, “Inzwai mashoko amambo mukuru, iye mambo weAsiria.

¹⁴Zvanzi namambo Hezekia, ‘Ngaarege kukunyengerai; nokuti haangagoni kukurwirai;

¹⁵Hezekia ngaarege kukuvimbisai naJehovha,’ achiti, ‘Jehovha achatirwira zvirokwazvo; guta iri haringapiwi mumaoko amambo weAsiria.’ ”

¹⁶Musateerera Hezekia, nokuti zvanzi namambo weAsiria, “Yananai neni, mubudire kwandiri; mudye mumwe nomumwe muwonde wake, mumwe nomumwe mvura yetsime rake;

¹⁷kusvikira ini ndauya ndikutorei, ndikuisei kunyika yakafanana neyenyu, nyika ine zviyo newaini, nyika ine chingwa neminda yemidzambiringa.

¹⁸Chenjerai kuti Hezekia arege kukugombedzerai, achiti, ‘Jehovha achatirwira. Ko mumwe wavamwari vamarudzi akagona kurwira nyika yake paruoko rwamambo weAsiria here?

¹⁹Vamwari veHamati neAripadhi varipi? Vamwari veSefarivaimi varipi? Vakarwira Samaria paruoko rwangu here?

²⁰Ndavapi pakati pavamwari vose venyika idzi vakarwira nyika yavo paruoko rwangu, zvamunoti Jehovha acharwira Jerusaremu paruoko rwangu?’ ”

²¹Asi vakaramba vanyerere, havana kumupindura shoko rimwe, nokuti murayiro wamambo wakanga uchiti, “Regai kumupindura.”

²²Zvino Eriakimu mwanakomana waHirikia, aichengeta imba, naShebhina munyori, naJoa mwanakomana waAsafi, gurukota guru, vakaenda kuna Hezekia, vakabvarura nguo dzavo, vakamuudza mashoko omukuru wavatariri.