Read Shona Union Version 2002 Isaya 38 Bible Online

Isaya 38 - Shona Union Version 2002 bible

Isaya 38

¹Zvino namazuva iwayo Hezekia akarara, akasvikira pakufa. Muporofita Isaya mwanakomana waAmozi akasvika kwaari, akati kwaari, “Zvanzi naJehovha, ‘Chirayira nhaka yako, nokuti uchafa, haungararami.’ ”

²Ipapo Hezekia akatendeukira kumadziro, akanyengetera kuna Jehovha,

³akati, “Dorangarirai henyu, Jehovha, kuti ndakafamba pamberi penyu nechokwadi nomwoyo wose, ndikaita zvakanaka pamberi penyu.” Hezekia akachema kwazvo.

⁴Ipapo shoko raJehovha rakasvika kuna Isaya, richiti,

⁵“Enda undoti kuna Hezekia, zvanzi naJehovha, Mwari wababa vako Dhavhidhi, ‘Ndanzwa kunyengetera kwako, ndaona misodzi yako; tarira, ndichawedzera pamazuva ako makore ane gumi namashanu.

⁶Ndichakurwira iwe neguta rino paruoko rwamambo weAsiria; uye ndichadzivirira guta rino.’

⁷“Hechi chiratidzo chaJehovha kwauri, kuti Jehovha achaita chinhu ichi chaakataura.

⁸Tarira, ndichadzosa mumvuri pamitaro, wakanga wakadzira nezuva pachikati chaAhazi, udzoke mitaro ine gumi.” Naizvozvo zuva rakadzoka mitaro ine gumi pachikati chaAhazi, pawakanga wadzikira.

⁹Horwu runyoro rwaHezekia mambo waJudha, panguva yaakanga arwara, akaporazve pakurwara kwake.

¹⁰Ndakati, ndichapinda pamusuo eSheori achiri masikati pamazuva angu; Ndatorerwa makore angu akanga asara.

¹¹Ndakati, handichazooni Jehovha, iye Jehovha, panyika yavapenyu; Handichazooni vanhu pamwechete navagere panyika.

¹²Ugaro hwangu hwaputswa, hwabviswa kwandiri setende romufudzi; Ndapeta upenyu hwangu, somuruki, uchandigura pachirukiso; Muchandigumisa kubvira mangwanani kusvikira madekwana.

¹³Ndakachema kusvikira kwaedza; unovhuna mapfupa angu ose seshumba; Muchandigumisa kubvira mangwanani kusvikira madekwana.

¹⁴Ndakarira senyenganyenga kana kondo; Ndakachema senjiva; meso angu akapera nokutarira kumusoro; Haiwa Jehovha, ndakamanikidzwa, ivai mumiriri wangu imi.

¹⁵Ndingatiiko? Ndiye akataura neni, ndiye akazviita; Ndichanatsa kufamba makore angu ose, nokuda kwokurwadziwa kwomwoyo wangu.

¹⁶Ishe, vanhu vanorarama nezvinhu izvozvi; Upenyu hwose hwomweya wangu huri mazviri; Naizvozvo ndiporesei, mundiraramise.

¹⁷Tarirai, kutambudzika kwangu kukuru kwakazondivigira rugare; Asi makarwira mweya wangu norudo pagomba rokuparadzwa; Nokuti makarasira zvivi zvangu zvose shure kwenyu.

¹⁸Nokuti Sheori harigoni kukuvongai, rufu harugoni kukurumbidzai; Vanoburukira kugomba havangagoni kutarira zvokwadi yenyu.

¹⁹Mupenyu, mupenyu, ndiye uchakuwongai, sezvandinoita nhasi; baba vachazivisa vana vavo zvokwadi yenyu.

²⁰Jehovha akazvigadzira kundiponesa; Naizvozvo tichaimba nziyo dzangu nemitengeranwa Mazuva ose oupenyu hwedu mumba maJehovha.

²¹Zvino Isaya akanga ati, “Ngavatore bundu, ramawonde varinamire pamota, ipapo achapora.”

²²Hezekiawo akanga ati, “Chiratidzo ndechipi kuti ndichakwira kuimba yaJehovha?”