Read Shona Union Version 2002 Isaya 42 Bible Online

Isaya 42 - Shona Union Version 2002 bible

Isaya 42

¹Tarirai muranda wangu wandinotsigira, musanangurwa wangu anofadza mweya wangu. Ndakaisa Mweya wangu pamusoro pake, achavigira marudzi kururamisirwa.

²Haangadani, kana kudanidzira nezwi rake, kana kunzwisa izwi rake panzira dzomumusha.

³Rutsanga rwakapwanyika haangaruvhuni, nomwenje unopfungaira haangaudzimi; achavigira vanhu kururamisirwa muchokwadi.

⁴Iye haangapfungairi kana kupwanyiwa, kusvikira agadza kururama panyika; zvivi zvichamirira murayiro wake.

⁵Zvanzi naMwari Jehovha, iye akasika denga rose, akaritatamura, iye akatambanudza nyika nezvinobvamo, iye anopa vanhu varimo kufema, navanofambapo mweya wavo,

⁶“Ini Jehovha ndakudana nokururama, ndichabata ruoko rwako, ndichakuchengeta, ndikuite sungano yavanhu, uye chiedza chamarudzi;

⁷usvinudze meso asingaoni, ubudise vasungwa patorongo, navagere murima paimba yokusungwa.

⁸Ndini Jehovha, ndiro zita rangu; kukudzwa kwangu handingakupi mumwe, kana kurumbidzwa kwangu kumifananidzo yakavezwa.

⁹Tarirai, zvinhu zvakare zvaitika, ndinoparidza zvinhu zvitsva; ndinokuudzai izvozvo zvisati zvabukira.”

¹⁰Imbirai Jehovha rwiyo rutsva, murumbidzei kubvira pamigumo yenyika; imi, munoburukira kugungwa, nezvose zviri mukati maro, zvivi navagere pazviri.

¹¹Renje namaguta aro ngazvidanidzire, nemisha inogarwa naKedhari; vagere mumatombo ngavaimbe, ngavadanidzire vari pamusoro pamakomo.

¹²Ngavakudze Jehovha, vaparidzire zvivi kurumbidzwa kwake.

¹³Jehovha achabuda semhare, achamutsa kushingaira somunhu wokurwa; achadana, zvirokwazvo, achadanidzira, acharwa navavengi vake nesimba.

¹⁴Ndakanyarara nguva refu, ndakaramba ndinyerere, ndikazvidzora; zvino ndichachema somukadzi ari kusununguka, ndichafemedzeka nokutakwaira pamwechete.

¹⁵Ndichaparadza makomo nezvikomo, nokuomesa zvose zvinomerapo; nzizi ndichadziita zvivi, namadziva ndichaapisa.

¹⁶Mapofu ndichaafambisa nenzira yaasingazivi, pamakwara aasingazivi ndichatungamirira; rima ndichariita chiedza pamberi pavo, nezvakakombama ndichazviruramisa. Zvinhu izvi ndichazviita, handingavasiyi.

¹⁷Vanovimba nemifananidzo yakavezwa, vanoti kumifananidzo yakaumbwa, “Imi muri vamwari vedu,” ivo vadzoserwa shure, vachanyadziswa kwazvo.

¹⁸Inzwai, imi matsi; tarirai, imi mapofu, muone.

¹⁹Ndianiko bofu, haazi iye muranda wangu here? Ndiani matsi, senhume yangu yandinotuma?

²⁰Anoona zvinhu zvizhinji, asi haucherekedzi; nzeve dzake dzakadziuka, asi haanzwi.

²¹Zvakafadza Jehovha, nokuda kwokururama kwake, kukudza murayiro nokuurumbidza.

²²Asi ava ndavanhu vakatorerwa nokupambwarwa; vose vakateyiwa mumakomba, vakavanzwa mudzimba dzokusungwa; vava chinhu chakatapwa, hakuna anovarwira, chinhu chakapambwa, hakuna anoti, “Dzosa!”

²³Ndianiko pakati penyu acharerekera nzeve dzake kune chinhu ichi? Achaterera nokunzwa panguva inouya?

²⁴Ndianiko akarega Jakobho apambwe, naIsiraeri awirwe namakororo? Haazi Jehovha here? Iye watakatadzira, wavakaramba kufamba nenzira dzake, wavakaramba kuteerera murayiro wake.

²⁵Naizvozvo akadurura pamusoro pake kutsamwa kwake kukuru, nesimba rokurwa; zvikamupisira kumativi ose, asingazvizivi; zvikamupisa, asi akanaga asine hanya nazvo.