Read Shona Union Version 2002 Isaya 44 Bible Online

Isaya 44 - Shona Union Version 2002 bible

Isaya 44

¹“Asi zvino chinzwa, iwe Jakobho, muranda wangu, naIsiraeri wandakasanangura,

²zvanzi naJehovha, akakuita, akakuumba kubvira pachizvaro, achakubatsira, ‘Usatya hako, iwe Jakobho, muranda wangu, newe Jeshuruni, wandakasanangura.

³Nokuti ndichadira mvura pamusoro penyika ine nyota, nenzizi pamusoro pevhu rakaoma; ndichadira Mweya wangu pamusoro porudzi rwako, nokuropafadza kwangu pamusoro pavana vako;

⁴vachamera pakati pouswa, semikonachando pamvura inoyerera.’

⁵“Mumwe achati, ‘Ndiri waJehovha,’ mumwezve achazvitumidza nezita raJakobho, mumwezve achanyora noruoko rwake, achiti, ‘Ndiri waJehovha, nokutora zita raIsiraeri.’ ”

⁶Zvanzi naJehovha, Mwari wavaIsiraeri, noMudzikinuri wavo, Jehovha wehondo, “Ndini wokutanga nowokupedzisira; kunze kwangu hakuna Mwari.

⁷Ndianiko angadana seni, nokuzviparidza, nokuzvigadzirira izvo, kubva panguva yandakagadza vanhu vakare-kare? Zvinhu zvinouya, nezvinozoitika, ngavazviparidze izvo.

⁸Musatya henyu, musavhunduka; handina kukuparidzirai izvozvo kare, nokukuratidzai here? Imi muri zvapupu zvangu. Kunomumwe Mwari kunze kwangu here? Zvirokwazvo, hakune rimwe dombo, ini handirizivi.”

⁹Vose vanoita mifananidzo yakavezwa havana maturo, zvinhu zvavanofarira hazvibatsiri; zvapupu zvavo hazvioni uye hazvizivi, kuti vanyadziswe.

¹⁰Ndianiko akaita mwari, kana mufananidzo wakaumbwa, zvisingabatsiri chinhu?

¹¹Tarirai, vose vanomunamatira vachanyadziswa; vakazviita, vanhu havo, ngavaunganidzwe pamwechete, ngavasimuke; vachatya, vachanyadziswa pamwechete.

¹²Mupfuri anopfura sanhu, anobata namazimbe, nokuriita nenyundo, nokuripfura noruoko rune simba; zvirokwazvo ane nzara, simba rake rinopera, haanwi mvura, ndokuziya.

¹³Muvezi anotambanudza rwonzi, anotara mufananidzo nepenzura, anounatsa nembezo, anoutara nechienzaniso, ndokuuveza zvakafanana nomunhu, zvakaenzana nomunhu akanaka, kuti ugare mumba.

¹⁴Zvino anozvitemera misidhari, ndokutora misipiresi nemiouki, achizvisanangurira mumwe pakati pemiti yomudondo; anosima mupaini, mvura inonaya ndokuukurisa.

¹⁵Zvino dzava huni dzomunhu, anotora dzimwe ndokudziya nadzo; zvirokwazvo, anobatidza moto nadzo, ndokubika chingwa; zvirokwazvo, anoveza mwari, ndokumunamata; anoita mufanananidzo wakavezwa, ndokuupfugamira.

¹⁶Rumwe rutivi rwawo anopisa nomoto, norumwe rutivi anogocha nyama, anoidya nyama, nokuguta zvirokwazvo, anozvidziyisa, ndokuti, “Haiwa, ndadziya, ndaona moto.”

¹⁷Nezvakasara anoita mwari, iwo mufananidzo wake wakavezwa; anoupfugamira, nokuunamata, nokunyengetera kwauri, achiti, “Ndirwirei, nokuti ndimi mwari wangu.”

¹⁸Havazivi, uye havarangariri, nokuti wakanamira meso avo, kuti varege kuona, nemwoyo yavo, kuti varege kunzwisisa.

¹⁹Hakuna anorangarira, hakuna ruzivo kana njere dzinoti, “Ndapisa rumwe rutivi rwawo mumoto, zvirokwazvo, ndabika chingwa pamazimbe awo; ndagocha nyama ndikaidya; zvino ndingaita chinonyangadza nezvakasara zvawo here? Ndingapfugamira danda romuti here?”

²⁰Anozvigutisa namadota; mwoyo wakanyengerwa wamutsausa, haagoni kusunungura mwoyo wake, kana kuti, “Hakuna nhema muruoko rwangu rworudyi here?”

²¹Funga zvinhu izvi, iwe Jakobho, naIsiraeri, nokuti ndiwe muranda wangu; ndakakuumba, uri muranda wangu; haiwa Isiraeri, haungakanganikwi neni.

²²Ndakadzima kudarika kwako, segore gobvu, nezvivi zvako segore; dzokera kwandiri, nokuti ndakakudzikinura.

²³Imba, iwe denga rose, nokuti Jehovha akaita izvozvo; danidzirai, mativi ezasi enyika; imbai zvikuru imi makomo, iwe dondo, nomuti mumwe nomumwe urimo; nokuti Jehovha akadzikinura Jakobho, achazvirumbidza muna Isiraeri.

²⁴Zvanzi naJehovha, Mudzikinuri wako, akakuumba kubva pachizvaro, “Ndini Jehovha, anoita zvinhu zvose, anotatamura denga rose iye oga, anotambanudza nyika (ndiani waiva neni?)

²⁵Iye anoparadza zviratidzo zvavane nhema, anopengesa vauki, anodzosa vachenjeri, achishandura zivo yavo uye upenzi.

²⁶“Iye anosimbisa shoko romuranda wake, anoita zvakarayirirwa nenhume dzake; iye anoti pamusoro peJerusaremu, ‘Richagarwa navanhu,’ napamusoro pamaguta aJudha, ‘Achavakwa, ini ndichamutsa matongo awo;’

²⁷iye anoti kumvura yakadzika, ‘Chipwa, uye ndichapwisa nzizi dzako;’

²⁸iye anoti pamusoro paKoreshi, ‘Ndiye mufudzi wangu, achaita zvose zvinondifadza,’ kana achiti pamusoro peJerusaremu ‘Richavakwa,’ uye pamusoro petemberi, ‘Nheyo dzako dzichateyiwa.’ ”