Read Shona Union Version 2002 Isaya 45 Bible Online

Isaya 45 - Shona Union Version 2002 bible

Isaya 45

¹Zvanzi naJehovha kumuzodzwa wake, kuna Koreshi, wandakabata ruoko rwake rworudyi, kuti ndikunde marudzi avanhu pamberi pake, ndichisunungura zviuno zvamadzimambo, ndimuzarurire misuo pamberi pake, namasuo arege kuzarirwa.

²“Ini ndichaenda pamberi pako, ndichienzanisa pasina kuenzana; ndichaputsa-putsa misuo yendarira, nokugura-gura mipfigo yendarama;

³ndichakupa pfuma iri murima, noupfumi hwakavanzwa panzvimbo dzisingazikanwi, kuti uzive kuti ndini Jehovha, Mwari waIsiraeri, anokudana nezita rako.

⁴Nokuda kwaJakobho muranda wangu, nokwaIsiraeri musanangurwa wangu, ndakakudana nezita rako, ndakakutumidza zita rakanaka, kunyange wakanga usingandizivi.

⁵Ndini Jehovha, hakuna mumwe; kunze kwangu hakuna mumwe Mwari. Ndichakusunga chiuno kunyange usina kundiziva;

⁶kuti vazive kubva kumabvazuva nokumavirazuva, kuti hakuna mumwe kunze kwangu; ndini Jehovha, hakuna mumwe.

⁷Ndini ndinoumba chiedza, nokusika rima; ndinoita rugare, nokusika njodzi; ndini Jehovha, anoita zvinhu izvi zvose.

⁸“Iwe denga rose, donhedza zvichibva kumusoro, makore ngaadurure kururama; nyika ngaizaruke, kuti ibudise ruponeso, ibereke kururama pamwechete; ini Jehovha ndakazvisika.

⁹“Ane nhamo anorwa noMuiti wake, icho chaenga pakati pezvaenga zvevhu! Ko ivhu ringati kunoanoriumba, ‘Unoiteiko?’ Kana basa rako ringati, ‘Haana maoko, here?’

¹⁰Ane nhamo anoti kuna baba, ‘Unoberekeiko?’ Kana kumukadzi, ‘Unozvareiko?’ ”

¹¹Zvanzi naJehovha, Mutsvene waIsiraeri, noMuiti wavo, “Ndibvunzei pamusoro pezvichazoitwa; pamusoro pavanakomana vangu, napamusoro pebasa ramaoko angu, mundirayire.

¹²Ndakaita nyika, nokusika vanhu pamusoro payo; ini namaoko angu, ndakatatanura denga rose; ndakarayira hondo yose yaro.

¹³Ndakamumutsa nokururama, ndicharuramisa nzira dzake dzose; iye achavaka guta rangu, nokusunungura vatapwa vangu, asingatsvaki mutengo kana mubayiro,” ndizvo zvinotaura Jehovha wehondo.

¹⁴Zvanzi naJehovha, “Zvakabatirwa neIjipiti, nezvakashambadzirwa neItiopia, navaShabhea, ivo varume varefu, zvichauya kwauri, zvichava zvako; vachakutevera, vachauya vakasungwa namatare, vachapfugama pamberi pako, vachikunyengera, vachiti, ‘Zvirokwazvo Mwari uri pakati pako, hakuna mumwe, hakuna mumwe Mwari.’ ”

¹⁵Zvirokwazvo, muri Mwari anovanda, imi Mwari waIsiraeri, Muponesi.

¹⁶Ivo vose vachanyadziswa vave nenyadzi; vaiti vezvifananidzo vachanyadziswa pamwechete.

¹⁷Asi vaIsiraeri vachaponeswa naJehovha noruponeso rusingaperi; hamunganyadziswi kana kuva nenyadzi kusvikira panguva dzisingaperi.

¹⁸Nokuti zvanzi naJehovha akasika denga rose, iye Mwari akaumba nyika nokuiita, akaisimbisa akasaisika kuti rive dongo, asi akaiumba kuti igarwe, zvanzi naye, “Ndini Jehovha, hakuna mumwe.

¹⁹Handina kutaura pakavanda, panzvimbo yenyika yerima; handina kuti kurudzi rwaJakobho, ‘Nditsvakei pasina,’ ini Jehovha, ndinotaura zvakarurama, ndinoparidza zvechokwadi.

²⁰“Unganai, muuye; swederai pamwechete, imi makapukunyuka kumarudzi; vanotakura matanda iri mifananidzo yavo yakavezwa havana ruzivo, ivo vanonyengetera mwari asingagoni kuponesa.

²¹Paridzai, muzvibudise; zvirokwazvo, ngavarangane pamwechete, vachiti, ‘Ndiani akazviratidza izvi kubvira panguva yekare-kare? Ndiani akazviparidza pakutanga?’ Handizini Jehovha here? Hakuna mumwe Mwari kunze kwangu, Mwari akarurama noMuponesi, hakuna mumwe kunze kwangu.

²²Tarirai kwandiri muponeswe, imi mativi ose enyika; nokuti ndini Mwari, hakuna mumwe.

²³Ndakapika neni ndimene, shoko rabuda mumuromo mangu nokururama, haringadzoki, kuti mabvi ose achandipfugamira, marimi ose achapika neni.

²⁴Zvanzi pamusoro pangu, ‘Kururama nesimba zviri muna Jehovha bedzi; vanhu vachauya kwaari, vose vakanga vamutsamwira vachanyadziswa.

²⁵Rudzi rwose rwaIsiraeri rucharuramisirwa muna Jehovha, nokuzvirumbidza maari.’ ”