Read Shona Union Version 2002 Isaya 46 Bible Online

Isaya 46 - Shona Union Version 2002 bible

Isaya 46

¹Bheri anowira pasi, Nebho anokotama; zvifananidzo zvavo zviri pamusoro pezvipfuwo nemombe, zvinhu zvamaitakura zvakaitwa mutoro, wakatakudzwa zvipfuwo zvaneta.

²Vanokotama, vanowira pasi pamwechete, vakakoniwa kurwira mutoro, asi ivo vamene vakatapwa.

³“Nditeererei, imi imba yaJakobho, navakasara veimba yaIsiraeri, vakatakurwa neni kubva pakuberekwa kwavo, vakasimudzwa kubva pachizvaro;

⁴kusvikira makwegura, ndini iye, ndichakutakurai kusvikira vhudzi renyu rachena; ini ndakakuitai, ndichakutakurai, zvirokwazvo ndichakusimudzai, nokukurwirai.

⁵Muchandifananidza naniko, nokundienzanisa nani, nokunditi ndakaita sani, wandingafanana naye?

⁶Ivo vanodurura ndarama pahombodo, nokuyera sirivha nechiyero, vanoripira mupfuri wendarama, iye ndokuita mwari nayo; zvino vopfugama, nokunamata.

⁷Vanochikwidza pamapfudzi, vanochitakura, ndokuchigadzika panzvimbo yacho, icho ndokumira; hachibvi panzvimbo yacho, zvirokwazvo, kunyange munhu akadana kwachiri, hachigoni kupindura, kana kumuponesa pakutambudzika kwake.

⁸“Rangarirai chinhu ichi, muve varume, fungaizve chinhu ichi, imi vadariki.

⁹Rangarirai zvinhu zvapfuura zvakare; nokuti ndini Mwari, hakuna mumwe, ndini Mwari, hakuna akafanana neni;

¹⁰iye anoparidza kubva pakutanga izvo zvichaitika pakupedzisira, nokubva panguva yekare-kare zvinhu zvichigere kuitwa, ndichiti, ‘Zvandakarayira zvichamira, ndichaita zvose zvandinoda;’

¹¹ndinodana gondo ribve kumabvazuva, munhu wandakarayirira abve kunyika iri kure; zvirokwazvo, ndakataura, ndichazviuyisawo, ndakazvitema, ndichazviitawo.

¹²Nditeererei, imi mune mwoyo mikukutu, imi muri kure nokururama;

¹³Ndichaswededza kururama kwangu, hakungavi kure, noruponeso rwangu harunganonoki; ndichaisa ruponeso paZioni, nokubwinya kwangu pakati paIsiraeri.”