Read Shona Union Version 2002 Isaya 48 Bible Online

Isaya 48 - Shona Union Version 2002 bible

Isaya 48

¹Inzwai izvi, imi imba yaJakobho, makatumidzwa zita raIsiraeri, makabuda kumvura zhinji, yaJudha; imi, munopika nezita raJehovha, muchirumbidza Mwari waIsiraeri, musingazviiti nechokwadi kana nokururama.

²(Nokuti vanozvidza veguta dzvene, vachisendama kuna Mwari waIsiraeri; zita rake ndiJehovha wehondo).

³“Ndakaparadza zvinhu zvakare kubva pakutanga; zvirokwazvo, zvakabuda mumuromo mangu, ndakazvizivisa; ndakazviita kamwe-kamwe, zvikaitika.

⁴Zvandakaziva kuti mwoyo wako mukukutu, nomutsipa wako runda rwedare, nehuma yako ndarira;

⁵naizvozvo ndakakuparidzira izvozvo kubva pakutanga; ndakakuzivisa izvozvo zvisati zvaitika, kuti urege kuzoti, ‘Chifananidzo changu ndicho chakaita izvozvo, mufananidzo wangu wakavezwa nomufananidzo wangu wakaumbwa ndizvo zvakarayira izvozvo.’

⁶Wakazvinzwa; tarira izvi zvose; zvino imi hamungazviparidzi here? Ndakakuzivisa zvinhu zvakavanzwa, zvawakanga usingazivi.

⁷Zvasikwa zvino, zvakanga zvisipo kare; hauna kumbozvinzwa zuva rino risati rasvika; kuti urege kuti, ‘Tarirai, ndaizviziva.’

⁸Zvirokwazvo, hauna kunzwa, zvirokwazvo, hauna kuziva; zvirokwazvo, nzeve dzako dzakanga dzisina kudziurwa kubva panguva yakare; nokuti ndakaziva kuti wakaita nokunyengera, ukanzi mudariki kubva pachizvaro.

⁹Ndichanonotsa kutsamwa kwangu nokuda kwezita rangu, ndichazvidzora pamusoro pako nokuda kwokurumbidzwa kwangu, kuti ndirege kukuparadza.

¹⁰Tarira, ndakakunatsa, asi handina kuzviita sesirivha; ndakakuidza muchoto chokutambudzika.

¹¹“Nokuda kwangu, nokuda kwangu, ndichazviita; nokuti zita rangu ringamhurwa sei? Handingapi mumwe kukudzwa kwangu.

¹²“Nditeerere, iwe Jakobho, newe Isiraeri wandakadana ndini iye, ndini wokutanga, ndini wokupedzisirawo.

¹³Zvirokwazvo, ruoko rwangu rwakateya nheyo dzenyika ruoko rwangu rworudyi rwakatatamura denga rose; kana ndichizvidana, zvinosimuka pamwechete.

¹⁴“Unganai imi mose, munzwe; ndianiko pakati pavo akaparidza zvinhu izvi? Iye anodikanwa naJehovha, achaita kuda kwake pamusoro peBhabhironi, ruoko rwake ruchava pamusoro pavaKaradhea.

¹⁵“Ini, iyeni, ndini ndakataura izvozvo; zvirokwazvo, ndakamudana, ndakamuuyisa, achafambiswa panzira yakanaka.

¹⁶“Swederai kwandiri, munzwe chinhu ichi; kubva pakutanga handina kutaura chinyararire;” kubva panguva yokuvamba akandituma, noMweya wake.

¹⁷Zvanzi naJehovha, Mudzikinuri wako, Mutsvene waIsiraeri, “Ndini Jehovha Mwari wako, anokudzidzisa zvinokubatsira, anokutungamirira panzira yaunofanira kufamba nayo.

¹⁸Haiwa! Dai wakateerera hako mirayiro yangu! Rugare rwako rungadai rwakaita sorwizi, nokururama kwako samafungu egungwa!

¹⁹Vana vako vaiva sejecha, nezvibereko zvomuviri wako setsanga dzaro; zita rake harizaibviswa kana kuparadzwa pamberi pangu.”

²⁰Ibvai paBhabhironi, tizai vaKaradhea; paridzai nezwi rokuimba, muzivise izvi, muzvireve kusvikira kumigumo yenyika; muti, “Jehovha akadzikinura muranda wake Jakobho.”

²¹Havana kunzwa nyota nguva yaakavafambisa mumarenje; akavayereresa mvura ichibva padombo, akatsemurawo dombo, mvura zhinji ikadzutuka.

²²Zvanzi naJehovha, “Vakaipa havana rugare.”