Read Shona Union Version 2002 Isaya 49 Bible Online

Isaya 49 - Shona Union Version 2002 bible

Isaya 49

¹Ndinzwei, imi zvivi, teererai, imi marudzi avanhu ari kure, Jehovha akandidana ndiri muchizvaro, akareva zita rangu ndichiri mudumbu ramai vangu;

²akaita muromo wangu somunondo unopinza; akandivanza mumumvuri wechanza chake, akandiita museve unopenya, akandichengeta mugoba rake;

³akati kwandiri, “Ndiwe muranda wangu; Isiraeri wandinozvirumbidza maari.”

⁴Asi ndakati, “Ndakatambura pasina, ndakapedza simba rangu pasina pazvinhu zvisina maturo; asi zvirokwazvo kururamisirwa kwangu kuri kuna Jehovha, nomubayiro wangu kuna Mwari wangu.”

⁵Zvino zvanzi naJehovha, akandiumba kubva pachizvaro, kuti ndive muranda wake, ndidzosere Jakobhozve kwaari, uye kuti Isiraeri vaunganidzwezve kwaari, (nokuti ndinokudzwa pamberi paJehovha, Mwari wangu ndiye wava simba rangu);

⁶zvirokwazvo, iye akati, “Chinhu chiduku kuti uve muranda wangu kuti umutse marudzi aJakobho, nokudzosazve vakasara vaIsiraeri; ndichakuitawo chiedza chavahedheni, kuti kuponesa kwangu kusvikire kumugumo wenyika.”

⁷Zvanzi naJehovha, Mudzikinuri waIsiraeri, noMutsvene wake, kunoanozvidzwa navanhu, kuno anovengwa norudzi rwose, kumuranda wavabati, “Madzimambo achaona ndokusimuka; machinda naiwo achanamata, nokuda kwaJehovha akatendeka, iye Mutsvene waIsiraeri, wakakusanangura.”

⁸Zvanzi naJehovha, “Ndakakupindura nenguva yakafanira, ndakakubatsira nezuva rokuponeswa; ndichakuchengeta, nokukuita sungano yavanhu, kuti umutse nyika, nokuvagarisa nhaka dzakanga dzaparadzwa;

⁹kuti uti kuna vakasungwa, ‘Budai;’ nokuna vagere murima, ‘Zviratidzei.’ Vachadya zvokudya panzira, namafuro avo achava pazvikomo zvisina zvibereko.

¹⁰Havangavi nenzara kana nyota, havangabayiwi nokupiswa kunyange nezuva, nokuti iye, anovanzwira nyasha, achavatungamirira, achavafambisa pamatsime emvura.

¹¹Ndichaita makomo angu ose nzira, migwagwa yangu ichakwiridzwa.

¹²Tarirai, vamwe vachauya vachibva kure; tarirai, vamwe vachabva kurutivi rwokumusoro nokumavirazuva, navamwe kunyika yeSinimi.”

¹³Imbai, imi denga rose, newe nyika ufare; imi makomo imbai kwazvo, nokuti Jehovha akanyaradza vanhu vake, achinzwira tsitsi vanotambudzika.

¹⁴Asi Zioni rakati, “Jehovha akandisiya, Ishe akandikanganwa.”

¹⁵“Ko mukadzi angakanganwe mwana wake waanomwisa, akasava netsitsi nomwanakomana wechizvaro chake here? Zvirokwazvo vangakanganwa zvavo, asi ini handingakukanganwi.

¹⁶Tarira, ndakakunyora pazvanza zvangu; masvingo ako ari pamberi pangu nguva dzose.

¹⁷Vana vako vanokurumidza; vaparadzi vako navanokuita dongo vachabuda mauri.

¹⁸“Ringira kwose-kwose nameso ako, uone; ava vose vanoungana pamwechete, vachiuya kwauri. Noupenyu hwangu, ndizvo zvinotaura Jehovha, zvirokwazvo uchazvifukidza navo vose sechishongo, uchazvisunga chiuno navo somwenga.

¹⁹“Nokuti, kana ari matongo ako nenzvimbo dzako dzakasiyiwa, nenyika yako yakaparadzwa, zvirokwazvo zvino haingaringani vagere mairi, navanokuminya vachava kure.

²⁰Vana, vawakanga watorerwa, vacharamba vachiti munzeve dzako, ‘Pano hapatiringani, tiratidzei nzvimbo patingagara.’

²¹Ipapo uchati mumwoyo mako, ‘Ndianiko akandiberekera ava, zvandakatorerwa vana vangu, ndiri ndoga, ndadzingwa, ndichidzungaira kwose-kwose? Ndianiko akarera ava? Tarirai, ndakanga ndasiyiwa ndoga; ko ava vakanga varipi?’ ”

²²Zvanzi naIshe Jehovha, “Tarirai, ndichasimudzira marudzi ruoko rwangu, nokumisira vanhu mureza wangu; vachauya navanakomana vako vanavo pachipfuva chavo, navakunda vako vachatakurwa pamafudzi avo.

²³Madzimambo achava madzibaba anokurerai; vahosi vavo madzimai enyu anokurerai vachakotama pamberi penyu zviso zvavo zvakatarira pasi, vachinanzva guruva riri patsoka dzenyu; ipapo muchaziva kuti ndini Jehovha; vanondimirira havanganyadziswi.”

²⁴Ko ane simba angatorerwe zvaakapamba here, kana vatapwa vowakarurama vangarwirwa here?

²⁵Asi zvanzi naJehovha, “Kunyange navatapwa voanesimba vachamutorerwa, nezvakapambwa zvoanotyisa zvicharwirwa; nokuti ndicharwa noanorwa newe, nokuponesa vana vako.

²⁶Vanokumanikidza ndichavadyisa nyama yavo imene, vachabatwa neropa ravo, seinenge iri waini inonaka; vanhu vose vachaziva kuti ini Jehovha, ndini Muponesi wako, noMudzikinuri wako, Anesimba waJakobho.”