Read Shona Union Version 2002 Isaya 5 Bible Online

Isaya 5 - Shona Union Version 2002 bible

Isaya 5

¹Ngandiimbire mudiwa wangu rwiyo rwomudiwa wangu pamusoro pomunda wake wemidzambiringa. Mudiwa wangu waiva nomunda wemidzambiringa pachikomo chakaorera;

²akautimba, akabvisa mabwe awo ose, akasimamo midzambiringa yakaisvonaka, akavaka shongwe mukati mawo, ndokucherawo chisviniro mukati mawo; zvino akatarira kuti ubereke madzambiringa, asi wakabereka madzambiringa ebundo.

³Zvino imi mugere Jerusaremu navarume vaJudha, ndinokumbira kuti motonge pakati pangu nomunda wangu wemidzambiringa.

⁴Chinyiko chaifanira kuitirwa munda wangu wemidzambiringa chandisina kuuitira? Zvino ndichitarira kuti uchabereka madzambiringa, wakagoberekerei madzambiringa ebundo?

⁵Zvino ndichakuudzai zvandichaitira munda wangu wemidzambiringa, Ndichabvisa ruzhowa rwawo, udyiwe; ndichaputsa rusvingo rwawo, utsikwe;

⁶ndichauparadza; haungawanhurwi, kana kurimwa; asi uchamera minzwa norukato; ndicharayira makore, kuti arege kunayisa mvura pamusoro pawo.

⁷Nokuti munda wemidzambiringa waJehovha wehondo ndiyo imba yaIsiraeri, varume vaJudha muti wake unomufadza; zvino akatsvaka kwavari kururamisira, asi tarira, akawana kumanikidza, akatsvaka kururama, asi tarira, akawana kuchema.

⁸Vane nhamo vanowedzera dzimba nedzimba, vanobatanidza minda neminda, kusvikira pasina nzvimbo, kusvikira imi mogara muri moga panyika.

⁹Jehovha wehondo anotaura munzeve dzangu, achiti, “Zvirokwazvo, dzimba zhinji dzichava matongo, dzimba huru nedzakanaka dzichashayiwa vanogaramo.

¹⁰Nokuti maeka ane gumi emidzambiringa achabereka bati rimwechete, nehomeri rembeu richabereka efa imwechete.”

¹¹Vane nhamo vanomuka mangwanani kundotsvaka doro rinobata, vanoswerera kusvikira usiku, kusvikira vapengeswa naro.

¹²Rudimbwa, nembira, nengoma, nenyere, newaini zviripo pamitambo yavo; asi havana hanya nebasa raJehovha, havarangariri zvakaitwa namaoko ake.

¹³Saka vanhu vangu vakatapwa nokushayiwa zivo; vakakudzwa pakati pavo vanoziya nenzara, vazhinji vavo vanofa nenyota.

¹⁴Saka Sheori rakawedzera kukara kwaro nokushamisa muromo waro zvikuru; vakakudzwa vavo, navazhinji vavo, navanozvikudza vavo, noanofara pakati pavo, vanoburukiramo.

¹⁵Vanhu vaduku vakakotamiswa, navakuru vakaninipiswa, nameso avanozvikudza akaninipiswa.

¹⁶Asi Jehovha wehondo achakudzwa pakutonga kwakarurama, naMwari iye Mutsvene achaonekwa ari mutsvene nokururama kwake.

¹⁷Ipapo makwayana achafura saanenge ari pamafuro, awo vanodzungaira vachadya makura avapfumi.

¹⁸Vane nhamo vanokweva zvakaipa norwonzi rwenhema, nezvivi sezvinenge namabote engoro;

¹⁹vanoti, “Ngaakurumidze, ngaachimbidzike nebasa rake, kuti tizvione; zvakafungwa noMutsvene wavaIsiraeri ngazviswedere, kuti tizvizive.”

²⁰Vane nhamo vanoti zvakaipa ndizvo zvakanaka, uye zvakanaka kuti ndizvo zvakaipa, vanoisa rima panzvimbo yechiedza, nechiedza panzvimbo yerima; vanoisa zvinovava panzvimbo yezvinotapira, nezvinotapira panzvimbo yezvinovava.

²¹Vane nhamo vanozviti takachenjera, vanoti pakufunga kwavo tine njere.

²²Vane nhamo vakaita mhare pakunwa waini, navarume vane simba pakuvhenganisa zvinobata;

²³vanoti akaipa haane mhosva nokuda kwefufuro, vanotorera wakarurama kururama kwake.

²⁴Naizvozvo murazvo womoto sezvaunopedza hundi uye uswa hwakawoma sezvahunongoperera mumurazvo, saizvozvo mudzi wavo uchaora, ruva ravo richatorwa kumusoro seguruva; nokuti vakaramba murayiro waJehovha wehondo, nokushora shoko roMutsvene waIsiraeri.

²⁵Saka kutsamwa kwaJehovha kwakamukira vanhu vake, akatambanudza ruoko rwake kwavari, akavarova; makomo anodedera, mitumbi yavo yafanana namarara pakati penzira dzomumusha. Kunyange zvakadaro, kutsamwa kwake hakuna kudzorwa, asi ruoko rwake rwakaramba rwakatambanudzwa nazvino.

²⁶Achasimudzira marudzi anobva kure mureza, nokuvaridzira muridzo ivo vari kumigumo yenyika; tarirai, vachakurumidza kuuya vachichimbidzika.

²⁷Hapana achaneta kana kugumburwa pakati pavo; hakuna achakotsira kana kuvata; bhanhire rezviuno zvavo haringasunungurwi, rukanda rweshangu dzavo harungadambuki.

²⁸Miseve yavo inopinza, uta hwavo hwose hwakakungwa; mazondo amabhiza avo achaita somusara, namavhiri engoro dzavo sechamupupuri;

²⁹kuomba kwavo kuchaita sokwehadzi yeshumba, vachavonga savana veshumba; zvirokwazvo vachaomba, vachabata mhuka yavo, ndokuenda nayo, hapana angairwira.

³⁰Nezuva iro vachavaombera sokutinhira kwegungwa; kana munhu akatarira nyika, achaona rima nokutambudzika; chiedza chichasvibiswa namakore ayo.