Read Shona Union Version 2002 Isaya 50 Bible Online

Isaya 50 - Shona Union Version 2002 bible

Isaya 50

¹Zvanzi naJehovha, “Ruripiko rugwaro rwokuramba mai venyu, rwandakavaramba narwo? Kana ndakakutengesai kuna ani vandakanga ndine chikwerete navo here? Tarirai makatengeswa nokuda kwezvakaipa zvenyu, mai venyu vakarambwa nokuda kwokudarika kwenyu.

²Ndakashaireiko munhu pakusvika kwangu? Ndakashaireiko akapindura pakudana kwangu? Ko ruoko rwangu rwatongopfupiswa kuti rukoniwe kudzikinura here? Handine simba rokurwira here? Tarirai, ndinopwisa gungwa kana ndichirituka, nzizi ndinodziita renje; hove dzadzo dzinonhuwa, nokuti hadzine mvura, dzinofa nenyota.

³Denga rose ndinorifukidza nokusviba, chifukidziro charo ndinochiita makudza.”

⁴Ishe Jehovha akandipa rurimi rwavakadzidziswa, kuti ndizive kusimbisa vakaneta namashoko; anondimutsa mangwanani ose, anomutsa nzeve dzangu kuti ndinzwe savanodzidziswa.

⁵Ishe Jehovha akadziura nzeve dzangu, handina kuramba kana kudzokera shure.

⁶Ndakarinzira varovi musana wangu, namatama angu kuna vakataura ndebvu dzangu; handina kuvanza chiso changu pakunyadziswa nokupfirwa mate.

⁷Nokuti Ishe Jehovha achandibatsira, naizvozvo handina kunyadziswa; naizvozvo ndakaita chiso changu sebwe romusarasara, ndinoziva kuti handinganyadziswi.

⁸Anondiruramisira ari pedyo; ndiani acharwa neni? Ngatisimukei pamwechete; ndiani mudzivisi wangu? Ngaaswedere kwandiri.

⁹Tarirai, Ishe, Jehovha achandibatsira; ndiani angandipa mhosva? Tarirai, avo vose vachasakara senguo; vachadyiwa nezvipfunho.

¹⁰Ndianiko aripo pakati penyu anotya Jehovha, anoteerera izwi romuranda wake? Anofamba murima, asina chiedza, ngaavimbe nezita raJehovha, asendame kuna Mwari wake.

¹¹Tarirai, imi mose, munobatidza moto, munozvisunga zviuno nezvitsiga; fambai mumurazvo womoto wenyu, napakati pezvitsiga zvamakabatidza. Muchapiwa izvozvo noruoko rwangu, muchavata pasi muchitambudzika.