Read Shona Union Version 2002 Isaya 54 Bible Online

Isaya 54 - Shona Union Version 2002 bible

Isaya 54

¹“Imba, iwe ngomwa, iwe usina kubereka; imba kwazvo, uimbise, iwe usina kumbosununguka; nokuti zvanzi naJehovha, ‘Vana voari oga vazhinji kukunda vana vomukadzi akawanikwa.’

²Kurisa nzvimbo yetende rako, ngavatatanure micheka yougaro hwako; usarega, asi urebese mabote ako, usimbise mbambo dzako.

³“Nokuti uchapararira kuruoko rworudyi nokuruboshwe; marudzi avanhu achava avana vako, vachagarisa maguta aiva matongo navanhu.

⁴Usatya hako, nokuti haunganyadziswi; usakanganiswa, nokuti haungavi nenyadzi; nokuti uchakanganwa kunyara kwohumhandara hwako, haungazorangariri kuzvidzwa kwohuchirikadzi hwako.

⁵Nokuti Muiti wako ndiye murume wako, Jehovha wehondo ndiro zita rake; Mutsvene waIsiraeri ndiye Mudzikunuri wako, iye achanzi Mwari wenyika yose.

⁶“Nokuti Jehovha akakudana somukadzi, akasiyiwa ane shungu pamweya, somukadzi akawanikwa achiri muduku ndokuzorambwa ndizvo zvinotaura Mwari wako.

⁷Ndakakusiya nguva duku, asi ndichakuunganidzazve nenyasha huru.

⁸Ndakakuvanzira chiso changu nguva duku nehasha dzakapupuma; asi ndichakunzwira nyasha nohunyoro husingaperi ndizvo zvinotaura Mudzikinuri wako.

⁹Nokuti izvi zvakaita kwandiri semvura zhinji yaNoa; nokuti sezvandakapika kuti mvura zhinji yaNoa haingazofukidzizve nyika, saizvozvo ndakapika kuti handichazokutsamwirazve, kana kukutuka.

¹⁰Nokuti makomo angabva, nezvikomo zvingabviswa, asi hunyoro hwangu haungabvi kwauri, sungano yangu yorugare haingabviswi ndizvo zvinotaura Jehovha ane nyasha newe.

¹¹“Haiwa, iwe mutambudziki, wakazununguswa nedutu remhepo, usinokunyaradzwa, tarira, ndichavakira mabwe ako namavara akanaka, ndichateya nheyo dzako namabwe esafiri.

¹²Ndichaita shongwe dzako namabwe anovaima, namasuo ako namabwe anopenya, nomuganho wako wose namabwe anokosha.

¹³Vana vako vose vachadzidziswa naJehovha, rugare rwavana vako ruchava rukuru.

¹⁴Uchasimbiswa mukururama; uchava kure nokumanikidzwa, nokuti hauna chaungatya, uye kure nezvinotyisa, nokuti hakuna chingasvika kwauri.

¹⁵Tarira, kunyange vakakuvamba, hazvingabvi kwandiri; ani naani anokuvamba achaparadzwa nokuda kwako.

¹⁶Tarira, ndini ndakasika mupfuri anopfutidza moto wamazimbe, ndokuita nhumbi yakakwanira basa rake; ndakasika muparadzi, kuti aparadze.

¹⁷Hakuna nhumbi inoumbwa kuzorwa newe ingaita chinhu; rurimi rumwe norumwe runokukwirira pakutongwa ruchakundwa newe. Ndiyo nhaka yavaranda vaJehovha, nokururama kwavo kwandiri ndizvo zvinotaura Jehovha.”