Read Shona Union Version 2002 REVHITIKO 19 Bible Online

REVHITIKO 19 - Shona Union Version 2002 bible

REVHITIKO 19

¹Zvino Jehovha wakataura naMosesi akati,

²“Taura neungano yose yavana vaIsiraeri, uti kwavari, ‘Ivai vatsvene, nokuti ini Jehovha Mwari wenyu ndiri mutsvene.

³Mumwe nomumwe wenyu anofanira kutya mai vake nababa vake, uye munofanira kuchengeta maSabata angu; ndini Jehovha Mwari wenyu.

⁴“ ‘Musava nehanya nezvifananidzo, kana kuzviitira vamwari vakaumbwa; ndini Jehovha Mwari wenyu.

⁵“ ‘Kana muchipa Jehovha chibayiro chezvipiriso zvokuyananisa, munofanira kuchipa kuti mugamuchirwe.

⁶Chinofanira kudyiwa nomusi wamunochipa nawo, uye nomusi unotevera; kana zvimwe zvikasara kusvikira pazuva retatu, zvinofanira kupiswa nomoto.

⁷Kana chikatongodyiwa nezuva retatu, zvinonyangadza; hachigamuchirwi.

⁸Asi mumwe nomumwe unochidya, uchava nemhosva, nokuti wamhura chinhu chitsvene chaJehovha; munhu uyu anofanira kubviswa pakati porudzi rwake.’

⁹“Kana muchikohwa gohwa reminda yenyu, rega kukohwa micheto yomunda wako, uye usaunganidza zvawira pasi pakukohwa kwako.

¹⁰Usakohwa zvose pamunda wako wemizambiringa, uye usaunganidza michero yawira pasi yomunda wako wemizambiringa; unofanira kuzvisiyira varombo navaeni; ndini Jehovha Mwari wenyu.

¹¹“Musaba; musanyengera, musareverana nhema.

¹²Musapika nhema nezita rangu, kuti usamhura zita raMwari wako; ndini Jehovha.

¹³“Usamanikidza wokwako, kana kumutorera; haufaniri kugara usiku hwose kusvikira mangwana nomubayiro womuranda unokubatira.

¹⁴Usatuka matsi, kana kupinganidza bofu; asi unofanira kutya Mwari wako; ndini Jehovha.

¹⁵“Musaita zvisakarurama pakutonga; usatsaura murombo, kana kukudza une simba; asi unofanira kutonga wokwako nokururama.

¹⁶Usafamba-famba pakati pavanhu vokwako, uchivachera; usapupurira ropa rowokwako; ndini Jehovha.

¹⁷“Usavenga hama yako mumwoyo mako; unofanira kuraira wokwako kwazvo, kuti urege kuva nezvivi nokuda kwake.

¹⁸Usatsiva, kana kugara wakatsamwira vana vavanhu vokwako, asi unofanira kuda wokwako sezvaunozvida iwe; ndini Jehovha.

¹⁹“Chengetai mitemo yangu. Usaberekesa zvipfuwo zvako norumwe rudzi; usadyara mbeu dzamarudzi maviri mumunda mako; usafuka nguo yakarukwa nezvinhu zvamarudzi maviri.

²⁰Ani naani unovata nomukadzi ari murandakadzi, wakanyengwa nomurume, asina kudzikinurwa kwazvo, kana kusunungurwa, vanofanira kurohwa; asi havafaniri kuurawa, nokuti wakanga asina kusunungurwa.

²¹Ngaauye nechipiriso chemhosva kuna Jehovha pamukova wetende rokusangana, rive gondohwe rechipiriso chemhosva.

²²Zvino mupristi anofanira kumuyananisira negondohwe rechipiriso chemhosva pamberi paJehovha pamusoro pezvivi zvake zvaakatadza; ipapo uchakanganwirwa zvivi zvake zvaakatadza.

²³“Kana muchisvika munyika, mukasima miti yamarudzi ose anodyiwa, munofanira kuti michero yayo yakaita seisina kudzingiswa; makore matatu ichava kwamuri seisina kudzingiswa; haifaniri kudyiwa.

²⁴Asi negore rechina michero yayo yose ichava mitsvene, kuti murumbidze Jehovha nazvo.

²⁵Negore rechishanu mungadya michero yayo; ndini Jehovha Mwari wenyu.

²⁶Musadya chinhu chine ropa racho; musaita mazango, kana kutenda mashura.

²⁷Musaveura misoro yenyu muchiita matendeure, uye musashatisa nhivi dzendebvu dzenyu.

²⁸Musazvicheka miviri yenyu nokuda kwavakafa, kana kuzvitema nyora; ndini Jehovha.

²⁹“Usaisa mwanasikana wako, uchimuita chifeve; kuti nyika irege kupata, nyika izare nezvakaipa.

³⁰Chengetai maSabata angu, nokutya imba yangu tsvene; ndini Jehovha.

³¹“Musava nehanya namasvikiro, kana musvibiswe navo; ndini Jehovha Mwari wenyu.

³²“Unofanira kusimukira wachena vhudzi, nokukudza mutana, uye utye Mwari wako; ndini Jehovha.

³³“Kana mutorwa agere newe panyika yenyu, usamuitira zvakaipa.

³⁴Mutorwa ugere nemi ngaave kwamuri somunhu wakaberekerwa pakati penyu, unofanira kumuda sezvaunozvida iwe, nokuti nemiwo makanga muri vatorwa munyika yeIjipiti; ndini Jehovha Mwari wenyu.

³⁵“Musaita zvisina kururama pakutonga, kana pakuyera nechitanda, kana pakuyera kurema, kana pachiyero.

³⁶Ivai nezviyero zvakarurama, nezvokuenzanisa nazvo zvakarurama, neefa yakarurama, nehini yakarurama; ndini Jehovha Mwari wenyu wakakubudisai munyika yeIjipiti.

³⁷Chengetai mitemo yangu yose, nezvandakatonga zvose, kuti muzviite; ndini Jehovha.”