Read Shona Union Version 2002 REVHITIKO 21 Bible Online

REVHITIKO 21 - Shona Union Version 2002 bible

REVHITIKO 21

¹Zvino Jehovha akati kuna Mosesi, “Taura navapristi, vanakomana vaAroni, uti kwavari, ‘Mupristi ngaarege kuzvisvibisa kuna vakafa pakati porudzi rwake;

²asi kuhama yake yomumba, kana mai vake, kana baba vake, kana mwanakomana wake, kana mwanasikana wake, kana mun'una wake;

³kana hanzvadzi yake ichiri mhandara, hama yomumba, usina kumbova nomurume; ungazvisvibisa kwaari.’

⁴Ngaarege kuzvisvibisa, zvaari mukuru pakati pehama dzake, kuti azvishatise.

⁵“Havafaniri kuveura misoro yavo, vachiita mhazha, kana kuveura rutivi rumwe rwendebvu dzavo, kana kutema nyora pamiviri yavo.

⁶Vanofanira kuva vatsvene kuna Mwari wavo, varege kumhura zita raMwari wavo; nokuti ndivo vanouya nezvipiriso zvaJehovha zvinopiswa, zvokudya zvaMwari wavo; naizvozvo ngavave vatsvene.

⁷Havafaniri kutora mukadzi chifeve, kana wakachinyiwa; ngavarege kutora mukadzi wakarambwa nomurume wake, nokuti mutsvene kuna Mwari wake.

⁸Naizvozvo unofanira iwe kumutsaura, nokuti ndiye unouya nezvokudya zvaMwari wako; anofanira kuva mutsvene kwauri, nokuti ini Jehovha ndinokutsaurai, ndiri mutsvene.

⁹Kana mwanasikana womupristi upi noupi achizvishatsa nokupata, unoshatsa baba vake; anofanira kupiswa nomoto.

¹⁰“Munhu, ari mupristi mukuru pakati pehama dzake, wakadirwa mafuta echizoro pamusoro wake, wakatsaurwa kuti afuke nguo dzomupristi mukuru, ngaarege kusunungura vhudzi romusoro wake, kana kubvarura nguo dzake.

¹¹Ngaarege kusvika pachitunha, kana kuzvisvibisa kuna baba vake kana mai vake;

¹²ngaarege kubuda panzvimbo tsvene, kana kushatsa nzvimbo tsvene yaMwari wake, nokuti mafuta okugadza aMwari wake ari pamusoro pake; ndini Jehovha.

¹³Ngaazvitorere mukadzi ichiri mhandara.

¹⁴Ngaarege kutora chirikadzi, kana wakarambwa nomurume wake, kana wakachinyiwa, kana chifeve, asi ngaatore mukadzi ichiri mhandara pakati porudzi rwake.

¹⁵Ngaarege kushatsa vana vake pakati porudzi rwake; nokuti ndini Jehovha ndinomutsaura.”

¹⁶Zvino Jehovha wakataura naMosesi, akati,

¹⁷“Taura naAroni, uti, ‘Ani naani wakaremara pakati pavana vako pamarudzi avo ose, ngaarege kuswedera kuuya nezvokudya zvaMwari wake.’

¹⁸Nokuti munhu upi noupi wakaremara ngaarege kuswedera kana riri bofu, kana unokamhina, kana wakaremara pachiso, kana uno mutezo wakarebesa,

¹⁹kana munhu ano rutsoka rwakavhunika, kana ruoko rwakavhunika,

²⁰kana ano musana wakakombama, kana wakawonda kwazvo, kana uno ruvara paziso rake, kana ane mhizi, kana ane pakafunuka, kana wakaremara pamberi;

²¹munhu upi noupi worudzi rwomupristi Aroni wakaremara haafaniri kuswedera kuuya nezvipiriso zvinopiswa zvaJehovha; wakaremara, haafaniri kuswedera kuuya nezvokudya zvaMwari wake.

²²Ungadya hake zvokudya zvaMwari wake, zvitsvene zvikuru nezvitsvene zvose.

²³Asi haafaniri kupinda mukati mechidzitiro, kana kuswedera kuatari nokuti wakaremara; kuti arege kushatsa nzvimbo dzangu tsvene; nokuti ndini Jehovha ndinovatsaura.”

²⁴Mosesi akataura saizvozvo naAroni navanakomana vake navana vaIsiraeri vose.