Read Shona Union Version 2002 REVHITIKO 25 Bible Online

REVHITIKO 25 - Shona Union Version 2002 bible

REVHITIKO 25

¹Zvino Jehovha wakataura naMosesi pagomo reSinai, akati,

²“Taura navana vaIsiraeri uti kwavari, ‘Kana muchisvika munyika yandichakupai, nyika inofanira kuitira Jehovha Sabata.

³Unofanira kudyara munda wako makore matanhatu, nokugurira mizambiringa yako makore matanhatu, nokuunganidza michero yayo.

⁴Asi pagore rechinomwe nyika inofanira kuzorora kwazvo, rive Sabata kuna Jehovha; usadyara munda wako, kana kugurira mizambiringa yako.

⁵Magoko ako usaakohwa, namazambiringa womuzambiringa wako usina kugurirwa usaatanha; rinofanira kuva gore rokuzorora kwazvo kwenyika.’

⁶Gohwa reSabata renyika ndizvo zvinofanira kuva zvokudya zvenyu; zvako nezvomuranda wako, nezvomurandakadzi wako, nezvomubatiri wako, nezvomutorwa wako ugere newe;

⁷nezvezvipfuwo zvako, nezvemhuka dziri munyika yako; zvibereko zvazvo zvose zvinofanira kuva zvokudya zvazvo.

⁸“Unofanira kuverengawo maSabata manomwe amakore, manomwe akaverengwa kanomwe; kuti mazuva amaSabata manomwe amakore aite kwauri makore makumi mana namapfumbamwe.

⁹Zvino pazuva regumi romwedzi wechinomwe unofanira kuraira kuti hwamanda iridzwe kwazvo; pazuva rokuyananisira munofanira kuraira kuti hwamanda iridzwe panyika yenyu yose.

¹⁰Munofanira kutsaura gore ramakumi mashanu, mugoparidza sununguko panyika yose kuna vose vageremo; rinofanira kuva gore rejubheri kwamuri; munofanira kudzokera mumwe nomumwe kune zvake, munofanira kudzokera mumwe nomumwe kuhama dzake.

¹¹Gore irero ramakumi mashanu rinofanira kuva rejubheri kwamuri; kusadyara, uye musakohwa naro magoko, uye musatanha naro mazambiringa emizambiringa isina kugurirwa.

¹²Nokuti igore rejubheri; rinofanira kuva dzvene kwamuri; munofanira kudya zvibereko zvaro paminda.

¹³Negore iri rejubheri munofanira kudzokera mumwe nomumwe kune zvake.

¹⁴Zvino kana uchitengesera wokwako chinhu, kana kutenga chinhu kwaari, musamanikidzana.

¹⁵Utenge kuno wokwako uchienzanisa namakore kubva pagore rejubheri, naiye unofanira kukutengesera achienzanisa namakore akasara okukohwa.

¹⁶Unofanira kuwedzera mutengo wazvo uchienzanisa nokuwanda kwamakore, uye unofanira kutapudza mutengo uchienzanisa noushoma hwamakore; nokuti iye unokutengesera nguva dzokukohwa.

¹⁷Musamanikidzana, asi utye Mwari wako; nokuti ndini Jehovha Mwari wenyu.

¹⁸“Naizvozvo munofanira kuita zvandakatema, nokuchengeta zvandakatonga, nokuzviita, kuti mugare munyika makachengeteka.

¹⁹Nyika ichabereka zvibereko zvayo, imi muchadya mukaguta, mukagaramo makachengeteka.

²⁰“Zvino kana mukati, ‘Tichadyei negore rechinomwe? Tarirai, hatifaniri kudyara, hatifaniri kuunganidza zvibereko zvedu’;

²¹ipapo ndicharaira kuti mukomborerwe neni pagore rechitanhatu, kuti rikuberekerei zvibereko zvicharingana makore matatu.

²²Negore rorusere muchadyara, muchidya zvibereko zvisharu; kusvikira gore repfumbamwe, kusvikira zvibereko zvaro zvichisvika, muchadya zvisharu.

²³“Nyika haifaniri kutengeswa chose nokusingaperi, nokuti nyika ndeyangu; nokuti muri vaeni navatorwa kwandiri.

²⁴Panyika yenyu yose munofanira kutendera kuti nyika idzikinurwe.

²⁵“Kana hama yako ikava murombo, ikatengesa zvimwe zvayo, ipapo hama yako yomumba inofanira kuuya kuzodzikinura izvo zvakatengeswa nehama yako.

²⁶Kana munhu akashaiwa unozvidzikinura, akazova mupfumi, akawana zvinoringana kuzvidzikinura;

²⁷unofanira kuverenga makore kubva pakutengeswa kwazvo, agodzosera kuna iye waakatengana naye zvakasara, iye ndokudzokera kune zvake;

²⁸asi kana asingagoni kuzvidzikinura, izvo zvaakatengesa zvinofanira kugara kuna iye wakazvitenga kusvikira pagore rejubheri; zvino pagore rejubheri zvinofanira kusunungurwa, iye agodzokera kune zvake.

²⁹“Kana munhu akatengesa imba iri muguta rakakombwa namasvingo, ungaidzikinura gore rose raakatenga naro risati rapera; unofanira kuva nesimba rokuidzikinura gore rose.

³⁰Kana isingadzikinurwi gore rose rikapera, zvino imba iyo iri muguta rakakombwa namasvingo inofanira kusimbiswa kuti ndeyaiye wakaitenga nokusingaperi, nokumarudzi ake; haingasunungurwi negore rejubheri.

³¹Asi dzimba dzemisha isina kukombwa namasvingo dzinofanira kuverengwa pamwechete neminda yenyika; dzingadzikinurwa, dzichasunungurwa pagore rejubheri.

³²Asi pamaguta avaRevhi, idzo dzimba pamaguta avo, vaRevhi vangadzidzikinura nguva ipi neipi.

³³Kana munhu akadzikinura kuva Revhi, imba yakatengeswa neguta rake zvinofanira kusunungurwa pagore rejubheri; nokuti dzimba mumaguta avaRevhi ndedzavo pakati pavana vaIsiraeri.

³⁴Asi minda yokuruwa rwamaguta avo haingatengeswi, nokuti ndeyavo nokusingaperi.

³⁵“Kana hama yako ikava murombo, akapera simba anewe, unofanira kumubatsira, agare newe somweni kana mutorwa.

³⁶Usatora mhindu yemari kwaari kana yezvibereko kwaari, asi unofanira kutya Mwari wako, kuti hama yako igare newe.

³⁷Usamupa mari yako uchireva mhindu, kana zvokudya zvako uchireva kuwedzerwa.

³⁸Ndini Jehovha Mwari wenyu, wakakubudisai munyika yeIjipiti, kuti ndikupei nyika yeKanani, ndive Mwari wenyu.

³⁹“Kana hama yako ikava murombo, agere newe, akazvitengesa kwauri, usamubatisa somusungwa;

⁴⁰ngaave somubatiri unopiwa mubayiro, kana somutorwa kwauri; ngaakubatire kusvikira pagore rejubheri.

⁴¹Ipapo ngaabude hake kwauri, iye pamwechete navana vake, adzokere kuhama dzake, adzokere kuna madzibaba ake.

⁴²Nokuti ivo varanda vangu vandakabudisa munyika yeIjipiti; ngavarege kutengeswa, sezvinoitwa vasungwa.

⁴³Usamubata nehasha, asi utye Mwari wako.

⁴⁴Kana vari vasungwa vako, varume kana vakadzi, vauchazova navo mungazvitengera vasungwa, varume navakadzi, kumarudzi anokupoteredzai.

⁴⁵Mungatengawo kuvana vavatorwa vagere pakati penyu nokuvana vavo vari pakati penyu, vavakabereka panyika yenyu; ivo vangava venyu.

⁴⁶Muvaite nhaka yavana venyu vanokuteverai, kuti vave vavo; munofanira kutora vasungwa venyu kwavari nokuvana vaIsiraeri, mumwe ngaarege kubata mumwe nehasha.

⁴⁷“Kana mweni kana mutorwa akapfuma agere newe, asi hama yako igere naye ikava murombo, akazvitengesa kumweni kana mutorwa uyo ugere newe, kana kumwana worudzi rwomweni uyo,

⁴⁸kana atengeswa, ungadzikinurwa; mun'una kana mukoma wake ungamudzikinura;

⁴⁹kana babamunini vake, kana mwanakomana wababamunini vake, ungamudzikinura, kana ani naani vehama dzake dzomumba make ungamudzikinura; kana iye akazova mupfumi, ungazvidzikinura amene.

⁵⁰Zvino iye nomutengi wake vanofanira kuverenga makore kubva pagore raakazvitengesa naro kwaari kusvikira pagore rejubheri, mutengo waakazvitengesa nawo unofanira kuenzaniswa namakore; nguva yokugara kwake naye inofanira kuenzaniswa nenguva yomubatiri unopiwa mubayiro wake.

⁵¹Kana makore mazhinji achinge asara, unofanira kudzosera mari yokudzikinurwa kwake yakaenzaniswa namakore iwayo, zvichibva pamari yaakanga atenga nayo.

⁵²Kana kuchinge kwasara makore mashoma kusvikira pagore rejubheri, unofanira kurangana naye; unofanira kudzosera mari yokudzikinurwa kwake zvichienzaniswa namakore ake.

⁵³Unofanira kugara naye gore rimwe nerimwe somubatiri unopiwa mubayiro wake; ngaarege kumubata nehasha pamberi pako.

⁵⁴Kana asingadzikinurwi nemitoo iyi, anofanira kusunungurwa negore rejubheri, iye navana vake pamwechete naye.

⁵⁵Nokuti vana vaIsiraeri varanda vangu; varanda vangu vandakabudisa panyika yeIjipiti; ndini Jehovha Mwari wenyu.