Read Shona Union Version 2002 REVHITIKO 8 Bible Online

REVHITIKO 8 - Shona Union Version 2002 bible

REVHITIKO 8

¹Zvino Jehovha wakataura naMosesi akati,

²“Tora Aroni, navanakomana vake, nenguo, namafuta okuzodza nawo, nenzombe yechipiriso chezvivi, namakondohwe maviri nedengu rezvingwa zvisina kuviriswa;

³uunganidze ungano yose pamukova wetende rokusangana.”

⁴Mosesi akaita sezvaakarairwa naJehovha, ungano ikaunganidzwa pamukova wetende rokusangana.

⁵Zvino Mosesi akati kuungano, “Ndizvo zvakarairwa naJehovha kuti zviitwe.”

⁶Mosesi akauya naAroni navanakomana vake, akavashambidza nemvura,

⁷akamufukidza jasi, ndokumusunga chiuno nebhanhire, akamufukidza nguo, akamuisa efodhi, nokumusunga chiuno nebhande reefodhi rakarukwa nouchenjeri, ndokurisungira kwaari naro.

⁸Akamuisa hombodo yechipfuva, ndokuisa Urimi neTumimi muhombodo yechipfuva.

⁹Akaisawo ngowani pamusoro wake; pangowani nechemberi akaisa hwendefa rendarama, ndiyo korona tsvene; sezvakanga zvarairwa Mosesi naJehovha.

¹⁰Zvino Mosesi akatora mafuta okuzodza nawo, akazodza tabhenakeri, nezvose zvakanga zvirimo, akazvitsaura.

¹¹Akasasa mamwe kanomwe paatari, nenhumbi dzayo dzose, nomudziyo wokushambidzira, nechigadziko chawo, kuti azvitsaure.

¹²Akadirawo mamwe mafuta okuzodza nawo pamusoro waAroni, akamuzodza kuti amutsaure.

¹³Ipapo Mosesi akauya navanakomana vaAroni, akavafukidza majasi, akavasunga zviuno namabhanhire, akavaisa ngowani, sezvakanga zvarairwa Mosesi naJehovha.

¹⁴Akauya nenzombe yechipiriso chezvivi, Aroni navanakomana vake vakaisa maoko avo pamusoro wenzombe yechipiriso chezvivi;

¹⁵akaibaya; Mosesi ndokutora ropa, ndokuriisa panyanga dzeatari kunhivi dzose nomunwe wake, akanatsa atari, ndokudururira ropa mujinga meatari, akaitsaura, kuti aiyananisire.

¹⁶Akatora mafuta ose akanga ari pamusoro poura, namafuta akanga ari pamusoro pechiropa, netsvo mbiri, namafuta adzo, Mosesi akazvipisa paatari.

¹⁷Asi nzombe nedehwe rayo, nenyama yayo, namazvizvi ayo, wakazvipisa nomoto kunze kwemisasa, sezvakanga zvarairwa Mosesi naJehovha.

¹⁸Akauya negondohwe rechipiriso chinopiswa; Aroni navanakomana vake vakaisa maoko avo pamusoro wegondohwe.

¹⁹Akariuraya; Mosesi akasasa ropa pamusoro peatari kunhivi dzose.

²⁰Akagura-gura gondohwe, Mosesi akapisa musoro nenhindi namafuta.

²¹Akasuka ura namakumbo nemvura, Mosesi akapisa gondohwe rose paatari, chikava chipiriso chinopiswa chainhuwira zvakanaka; chikava chipiriso chakaitirwa Jehovha nomoto; sezvakanga zvarairwa Mosesi naJehovha.

²²Zvino akauyawo nerimwe gondohwe, gondohwe rokugadza naro, Aroni navanakomana vake vakaisa maoko avo pamusoro wegondohwe.

²³Akaribaya, Mosesi akatora rimwe ropa raro, akariisa pamucheto wezasi wenzeve yaAroni yorudyi, napagunwe roruoko rwake rworudyi, napagunwe rorutsoka rwake rworudyi.

²⁴Akauyisa vanakomana vaAroni, Mosesi akaisa rimwe ropa pamicheto yezasi yenzeve dzavo dzorudyi, napamagunwe amaoko avo orudyi, napamagunwe etsoka dzavo dzorudyi; Mosesi akasasa ropa pamusoro peatari kunhivi dzose.

²⁵Akatora mafuta nebhemhe, namafuta ose akanga ari pamusoro poura, namafuta akanga ari pamusoro pechiropa, netsvo mbiri, namafuta adzo, nebandauko rorudyi;

²⁶akatora mudengu rezvingwa zvisina kuviriswa, zvaiva pamberi paJehovha, chingwa chimwe chiduku chisina kuviriswa, nechingwa chimwe chiduku chezvingwa zvakazodzwa mafuta, nechingwa chitete chimwe, akazviisa pamusoro pamafuta, napamusoro pebandauko rorudyi;

²⁷akaisa zvose pamaoko aAroni, napamaoko avanakomana vake, akazvizunguzira pamberi paJehovha, kuti chive chipiriso chinozunguzirwa.

²⁸Ipapo Mosesi akazvitora zvose pamaoko ake, akazvipisa paatari pamusoro pechipiriso chinopiswa; zvikava zvokugadza nazvo, zvikanhuwira zvakanaka; chikava chipiriso chakaitirwa Jehovha nomoto.

²⁹Zvino Mosesi akatora chityu akachizunguzira pamberi paJehovha, kuti chive chipiriso chinozunguzirwa; ndiwo waiva mugove waMosesi pagondohwe rokugadza naro; sezvakanga zvarairwa Mosesi naJehovha.

³⁰Ipapo Mosesi akatora mamwe mafuta okuzodza nawo, nerimwe ropa rakanga riri paatari, akarisasa pamusoro paAroni napamusoro penguo dzake, napamusoro pavanakomana vake, napamusoro penguo dzavanakomana vake pamwechete naye; akatsaura Aroni nenguo dzake, navanakomana vake, nenguo dzavanakomana vake pamwechete naye.

³¹Mosesi akati kuna Aroni navanakomana vake, “Bikai nyama pamukova wetende rokusangana, muidyirepo nechingwa chiri mudengu rokugadza naro, sezvandakaraira ndichiti, Aroni navanakomana vake vanofanira kuzvidya.’

³²Asi zvakasara zvenyama nechingwa munofanira kuzvipisa nomoto.

³³Musabuda pamukova wetende rokusangana mazuva manomwe, kusvikira mazuva okugadza kwenyu apera; nokuti iye uchakugadzai mazuva manomwe.

³⁴Sezvakaitwa zuva ranhasi, Jehovha wakaraira kuti zviitwe saizvozvo, kuti muyananisirwe.

³⁵Garai pamukova wetende rokusangana masikati nousiku mazuva manomwe, muchengete zvamakarairwa naJehovha, kuti urege kufa; nokuti ndizvo zvandakarairwa.”

³⁶Zvino Aroni navanakomana vake vakaita zvose zvakanga zvarairwa naJehovha nomuromo waMosesi.