Read Shona Union Version 2002 Jeremia 12 Bible Online

Jeremia 12 - Shona Union Version 2002 bible

Jeremia 12

¹Imi Jehovha, makarurama kana ndichikakavara nemi; kunyange zvakadaro ndinoda kutaurirana nemi pamusoro pokururamisa kwenyu, nzira yavakaipa inomufaro neiko? Vanoita nokunyengera vanogarireiko vose vane rugare?

²Imi makavasima, zvirokwazvo midzi yavo yakabata; vanokura, zvirokwazvo vanobereka zvibereko; imi muri pedyo nemiromo yavo, asi muri kure nemwoyo yavo.

³Asi imi Jehovha munondiziva; munondiona, munoidza mwoyo wangu kuti wakadini kwamuri; muvakweve samakwai anondobayiwa, muvagadzirire zuva rokubayiwa.

⁴Nyika ichachema, nemiriwo yenyika yose ichasvava kusvikira riniko? Mhuka neshiri zvinopedzwa nokuda kwezvakaipa zvavageremo, nokuti vakati, “Haangaoni kuguma kwedu.”

⁵“Kana uchinge wakamhanya navanofamba namakumbo, ukaneta ungagona seiko kuvhivhana namabhiza? Kana uchinge wakagara zvakanaka panyika yorugare, ungaita seiko pamatenhere aJorodhani?

⁶“Nokuti naidzo hama dzako naveimba yababa vako vakaita nokunyengera kwauri; naivo vakadanidzira kwauri, usavatenda, kunyange vachitaura mashoko akanaka newe.”

⁷“Ndasiya imba yangu, ndarasha nhaka yangu; ndaisa mudikanwa womwoyo wangu mumaoko avavengi vake.

⁸Nhaka yangu yava kwandiri seshumba iri mudondo; yandiombera, saka ndakaivenga.

⁹Ko nhaka yangu yava kwandiri segondo rinamavara here? Makondo akaikomba kumativi ose here? Endai mundokokera zvikara zvose zvokusango, muuye nazvo zvidye.

¹⁰Vafudzi vazhinji vakaparadza munda wangu wemadzambiringa, vakatsika mugove wangu namakumbo avo, vakaita mugove wangu unodikanwa rive renje risina chinhu.

¹¹Vakauita dongo; unochema kwandiri, zvawakaitwa dongo; nyika yose yakaitwa dongo, nokuti hakuna munhu une hanya nayo.

¹²Vaparadzi vakasvika pazvikomo zvose zvisina miti murenje; nokuti munondo waJehovha unopedza kubva kumugumo mumwe wenyika kusvikira kunomumwe mugumo wenyika; hakuna nyama ino rugare.

¹³Vakakusha zviyo, asi vakacheka minzwa; vakazvitambudza, asi havana kuwana chinhu; muchanyadziswa pamusoro pezvibereko zveminda yenyu, nokuda kwokutsamwa kukuru kwaJehovha.”

¹⁴Zvanzi naJehovha pamusoro povokwangu vose vakaipa vanopamba nhaka yandakagarisa vanhu vangu vaIsiraeri, “Tarirai, ndichavadzura panyika yavo, ndichadzura veimba yaJudha pakati pavo.

¹⁵“Zvino kana ndavadzura, ndichadzoka, ndikavanzwira tsitsi, ndichavadzosera mumwe nomumwe kunhaka yake, nomumwe nomumwe kunyika yake.

¹⁶Zvino kana vachidzidza zvakanaka tsika dzvanhu vangu, kupika nezita rangu, vachiti, ‘NaJehovha mupenyu,’ sezvavakadzidzisa vanhu vangu kupika naBhaari, ipapo vachavakiswa pakati pavanhu vangu.

¹⁷“Asi kana vasinganzwi, ndichadzura rudzi uro, ndicharudzura nokuruparadza” ndizvo zvinotaura Jehovha.