Read Shona Union Version 2002 Jeremia 13 Bible Online

Jeremia 13 - Shona Union Version 2002 bible

Jeremia 13

¹Zvanzi naJehovha kwandiri, “Enda undozvitengera bhanhire romucheka, uzvisunge chiuno naro; asi usaruisa mumvura.”

²Ipapo ndakatenga bhanhire, sezvakarehwa neshoko raJehovha, ndikazvisunga chiuno naro.

³Zvino shoko raJehovha rakauya kwandiri rwechipiri, richiti,

⁴“Tora bhanhire rawatenga, riri pachiuno chako, usimuke uende kurwizi rwaYufuratesi, undoriviga mumukaha wedombo.”

⁵Ipapo ndakaenda, ndikandoriviga parwizi rwaYufuratesi, sezvandakarairwa naJehovha.

⁶Zvino mazuva mazhinji akati apfuura, Jehovha akati kwandiri, “Simuka, uende kwaYufuratesi, utorepo bhanhire randakakuraira kuti urivigepo.”

⁷Ipapo ndakaenda kwaYufuratesi, ndikachera, ndikatora bhanhire pandakanga ndariviga; zvino tarira, bhanhire rakanga raora, risina basa chose.

⁸Zvino shoko raJehovha rakauya kwandiri, richiti,

⁹“Zvanzi naJehovha, ‘Saizvozvo ndichaodza kuzvikudza kwaJudha, nokuzvikudza kukuru kweJerusaremu.

¹⁰Vanhu ava vakaipa, vanoramba kunzwa mashoko angu, vanofamba nohukukutu hwemwoyo yavo, vakatevera vamwe vamwari kuti vavashumire nokuvanamata, vachafanana nebhanhire iri, risina basa chose.’

¹¹“Nokuti bhanhire sezvarinonamatira pachiuno chomunhu, saizvozvo ndakanga ndanamatidza imba yaIsiraeri yose neimba yaJudha kwandiri,” ndizvo zvinotaura Jehovha kuti vave vanhu vangu, nembiri yangu, nokurumbidzwa kwangu, nokubwinya kwangu; asi vakaramba kuterera.

¹²Naizvozvo unofanira kutaura shoko iri kwavari, “Zvanzi naJehovha, Mwari waIsiraeri, ‘Mudziyo mumwe nomumwe uchazadzwa newaini;’ zvino ivo vachati kwauri, ‘Hatizivi kanhi kuti mudziyo mumwe nomumwe uchazadzwa newaini?’

¹³Ipapo uti kwavari, ‘Zvanzi naJehovha tarirai, vose vagere munyika ino, iwo madzimambo agere pachigaro choushe chaDhavhidhi, navapristi navaporofita, navose vagere Jerusaremu, ndichavazadza nokubatwa newaini.

¹⁴Ndichavagumirisana, madzibaba navanakomana vavo pamwechete ndizvo zvinotaura Jehovha. Handinganzwiri tsitsi, handingadariki mumwe, kana kuva nengoni, kuti ndirege kuvaparadza.’ ”

¹⁵Inzwai, murerekere nzeve; musazvikudza, nokuti Jehovha wakataura.

¹⁶Rumbidzai Jehovha, Mwari wenyu, asati auyisa rima, tsoka dzenyu dzisati dzagumburwa pamakomo erima, iye asati ashandura chiedza chamakamirira, akachiita mumvuri worufu, nokuchiita rima guru.

¹⁷Asi kana musingadi kuzvinzwa, mweya wangu uchakuchema pakavanda nokuda kwokuzvikudza kwenyu; meso angu achachema kwazvo, achayerera misodzi, nokuti boka raJehovha ratapwa.

¹⁸Iti kuna mambo nokuna mai vamambo, “Garai pasi-pasi kwazvo, nokuti zvishongo zvemisoro yenyu zvawira pasi, iyo korona yokukudzwa kwenyu.”

¹⁹Maguta okurutivi rwezasi akazarirwa, hakuna unoazarura; vaJudha vakatapwa vose, vakatapwa chose-chose.

²⁰“Ringira meso ako, uone vanobva kurutivi rwokumusoro. Ko boka rawakapiwa, iro boka rako rakanaka kwazvo, riripi?

²¹Uchati kudiniko kana achiisa pamusoro pako ivo vawakadzidzisa kuva shamwari dzako vave vabati vako? Haungabatwi nokurwadziwa sokuwomukadzi unopona here?

²²Zvino kana ukati mumwoyo mako, ‘Izvozvi zvandiwira neiko?’ Nguo dzako dzakafukurwa nezvitsitsino zvako zvakuvadzwa nemhaka yohukuru hwezvakaipa zvenyu.

²³Ko muItiopia ungashandura ganda rake, kana ingwe mavara ayo here? Kana zvaibvira, nemiwo maigona kuita zvakanaka, iyemi makarovera kuita zvakaipa.

²⁴“Saka ndichavaparadzira sehundi inopepereswa nemhepo murenje.

²⁵Ndizvo zvawakagoverwa, ndiwo mugove wawakayererwa neni ndizvo zvinotaura Jehovha; nokuti wakandikanganwa, ukavimba nezvehama.

²⁶Saka ndichafukurawo nguo dzako pamberi pako, kunyadziswa kwako kuonekwe.

²⁷Ndakaona kunyangadza kwako, ihwo hupombwe hwako, nokufemhedza kwako, nokunyadza kwokupombora kwako pazvikomo zvokubundo. Une nhamo, iwe Jerusaremu! Unoramba kunatswa; zvichadaro kusvikira riniko?”