Read Shona Union Version 2002 Jeremia 14 Bible Online

Jeremia 14 - Shona Union Version 2002 bible

Jeremia 14

¹Shoko raJehovha rakauya kuna Jeremiya pamusoro pokusanaya kwemvura.

²Judha vanochema, namasuo avo anoshaiwa simba, vagere pasi vakafuka nguo nhema; kuchema kweJerusaremu kwakwira kumusoro.

³Vakuru vavo vanotuma varanda vavo kumvura; vanosvika kumadziva, ndokushaiwa mvura, vanodzoka nezvirongo zvisina; vakanyadziswa nokukanganiswa, vanofukidza misoro yavo.

⁴Varimi vanonyadziswa, vanofukidza misoro yavo, nokuda kwenyika yakaparuka, nokuti mvura haina kunaya panyika.

⁵Zvirokwazvo, hadzi yenondo inoberekawo musango, ndokurasha mhuru yayo, nokuti hakuna bumudza.

⁶Mbizi dzinomira pazvikomo zvisina miti, dzichifema mhepo samakava; meso adzo aneta, nokuti hakuna huswa.

⁷“Kunyange zvakaipa zvedu zvichitipupurira, imi Jehovha, batai nokuda kwezita renyu; nokuti kudzokera kwedu kuzhinji; takakutadzirai.

⁸Imi chitariro chaIsiraeri, Muponesi wavo nenguva yokutambudzika, munoitireiko somutorwa panyika, uye somufambi unotsauka kuzovata husiku chete?

⁹Munoitireiko somunhu unotya, somunhu une simba usingagoni kuponesa? Kunyange zvakadaro imi Jehovha muri pakati pedu, takatumidzwa nezita renyu; regai kutisiya.”

¹⁰Zvanzi naJehovha kuvanhu ava, “Saizvozvo vakafarira kudzungaira, havana kudzora tsoka dzavo; naizvozvo Jehovha haana kuvafarira; zvino ucharangarira zvakaipa zvavo, nokuvarova pamusoro pezvivi zvavo.”

¹¹Jehovha akati kwandiri, “Usanyengeterera vanhu ava uchivakumbirira zvakanaka.

¹²Kana vachizvinyima zvokudya, handinganzwi kuchema kwavo; kana vachiuya nezvipiriso zvinopiswa nezvipiriso zvoupfu, handingazvigamuchiri; asi ndichavapedza nomunondo, nenzara, uye nehosha.”

¹³Ipapo ndakati, “Haiwa, Jehovha Mwari, tarirai, vaporofita vanoti kwavari, ‘Hamungaoni munondo, kana kunzwa nzara; asi ndichakupai rugare rwazvokwadi panzvimbo ino.’ ”

¹⁴Ipapo Jehovha akati kwandiri, “Vaporofita vanoporofita nhema muzita rangu; ini handina kuvatuma, ini handina kuvaraira, kana kutaura navo; vanokuporofiterai zvinonzi zvakaonekwa asi dziri nhema, nezvakaukwa, nezvisina maturo, nokunyengera kwemwoyo yavo.”

¹⁵Naizvozvo zvanzi naJehovha pamusoro pavaporofita vanoporofita muzita rangu, ndisina kuvatuma hangu, vachiti, “Munondo nenzara hazvingavi munyika ino; zvanzi, ‘Vaporofita avo vachapedzwa nomunondo nenzara.

¹⁶Navanhu vavanoporofitera vacharashwa munzira dzomuJerusaremu nemhaka yenzara nomunondo; vachashaiwa unovaviga ivo, navakadzi vavo, navanakomana vavo, navanasikana vavo; nokuti ndichadurura zvakaipa zvavo pamusoro pavo.’

¹⁷“Zvino iwe chivaudza shoko iri, uti, ‘Meso angu angaayerere misodzi husiku namasikati, asarega; nokuti mhandara mukunda wavanhu vangu wakuvadzwa nokukuvadzwa kukuru, nevanga rakaipa kwazvo.

¹⁸Kana ndichifamba musango, tarirai, vakaurawa nomunondo! Kana ndichipinda muguta, tarirai, vanorwara nenzara! Nokuti vaporofita navapristi vose vanopota nenyika, vasingazivi chinhu.’ ”

¹⁹Maramba Judha chose here? Mweya wenyu wasema Zioni here? Matirovereiko, tikashaiwa kuporeswa? Takatarira rugare, asi hakuna chakanaka chakauya, nenguva yokuporeswa, asi tarirai, kuvhunduswa bedzi!

²⁰Haiwa Jehovha, tinoziva zvakaipa zvedu, nokutadza kwamadzibaba edu; nokuti takakutadzirai.

²¹“Regai kutisema nokuda kwezita renyu; regai kushoora chigaro chokukudzwa kwenyu; rangarirai henyu, musaputsa sungano yenyu nesu.

²²Varipo here pakati pavamwari vasina maturo vavahedheni vanganisa mvura? Denga ringanisa mvura here? Hamuzimi here, imi Jehovha Mwari wedu? Naizvozvo tichakumirirai, nokuti ndimi makaita zvinhu izvi zvose.”