Read Shona Union Version 2002 Jeremia 16 Bible Online

Jeremia 16 - Shona Union Version 2002 bible

Jeremia 16

¹Zvino shoko raJehovha rakasvika kwandirizve, richiti,

²“Rega kuwana mukadzi kana kuva navanakomana kana vanasikana panzvimbo ino.

³Nokuti zvanzi naJehovha pamusoro pavanakomana napamusoro pavanasikana vanoberekerwa panzvimbo ino, napamusoro pamadzimai avo akavabereka, napamusoro pamadzibaba avo akavabereka panyika ino,

⁴Vachafa norufu rwakaipa kwazvo; havangachemwi kana kuvigwa; vachava somupfudze panyika; vachapedzwa nomunondo uye nenzara; zvitunha zvavo zvichava zvokudya zveshiri dzokudenga nezvikara zvenyika.

⁵“Nokuti zvanzi naJehovha, ‘Usapinda muimba yokuchema, usavawungudzira kana kuvachema;’ nokuti zvanzi naJehovha, ‘Ndabvisa rugare rwangu pavanhu ava, ihwo hunyoro hwangu nenyasha dzangu.’

⁶“Vakuru navaduku vose vachafa munyika ino; havangavigwi, navanhu havangavachemi, kana kuzvicheka nokuzviveura nokuda kwavo;

⁷vanhu havangavameduriri chingwa pakuchema kwavo, vachiti vavanyaradze pamusoro pavakafa, uye vanhu havangavapi mukombe wokunyaradza vanwe pamusoro pababa vavo kana mai vavo.

⁸“Newe usapinda muimba yomutambo, kuti ugare navo, uchidya nokunwa.

⁹Nokuti zvanzi naJehovha wehondo, Mwari waIsiraeri, ‘Tarirai, ndichagumisa panzvimbo ino, muchizviona pamazuva enyu, inzwi rokuseka, nenzwi romufaro, nenzwi rechikomba nenzwi romwenga.’

¹⁰“Zvino kana uchizivisa vanhu ava mashoko awa ose, vachati kwauri, ‘Jehovha wakarevereiko zvakaipa izvi zvikuru zvose pamusoro pedu? Kutadza kwedu ndokwei? Zvivi zvedu ndezvei, zvatakaitira Jehovha Mwari wedu?’

¹¹Ipapo iwe uti kwavari, ‘Zvanzi naJehovha, nokuti madzibaba enyu akandisiya, vakatevera vamwe vamwari, nokuvashumira nokuvanamata, vakandisiya ini, vakasachengeta murayiro wangu;

¹²zvino imi makaita zvakaipa kupfuura madzibaba enyu; nokuti tarirai, munofamba mumwe nomumwe nohukukutu hwomwoyo wake wakaipa, muchiramba kunditerera.

¹³Saka ndichakudzingai panyika ino ndichikuisai kunyika yamakanga musingazivi, kunyange imi kunyange madzibaba enyu; ipapo muchashumira vamwe vamwari masikati nohusiku, nokuti handingakunzwiriyi ngoni.’ ”

¹⁴Naizvozvo zvanzi naJehovha, “Tarirai, mazuva anouya, avachasizoti, ‘NaJehovha mupenyu, wakabvisa vana vaIsiraeri panyika yeIjipiti;’

¹⁵asi ‘NaJehovha mupenyu, wakabvisa vana vaIsiraeri kunyika yokumusoro, nokunyika dzose dzaakanga avadzingira kwadziri. Ndichavadzoserazve kunyika yavo yandakapa madzibaba avo.’

¹⁶“Zvanzi naJehovha, ‘Tarirai, ndichandodana vabati vazhinji vehove, ivo vachavabata sehove; pashure ndichandodana vavhimi vazhinji, ivo vachavavhima pamakomo ose nezvikomo zvose, napamapako ose amatombo.

¹⁷Nokuti meso angu anoona nzira dzavo dzose, hazvina kuvanzika pamberi pangu, zvakaipa zvavo hazvina kuvanziwa pameso angu.

¹⁸Ndichatanga kuvatsivira zvakaipa zvavo nezvivi zvavo kaviri, nokuti vakasvibisa nyika yangu nezvitunha zvezvinhu zvavo zvinosemesa, nokuzadza nhaka yangu nezvinonyangadza zvavo.’ ”

¹⁹Imi Jehovha, simba rangu, nenhare yangu, nohutiziro hwangu pazuva rokutambudzika, marudzi achauya kwamuri achibva kumigumo yenyika, achiti, “Madzibaba edu akagara nhaka yenhema dzoga, zvinhu zvisina maturo, nezvinhu zvisingabatsiri.”

²⁰“Ko munhu ungazviitira vamwari vasati vari vamwari here?

²¹Naizvozvo, tarirai, ndichavazivisa, ndichavazivisa panguva ino chete ruoko rwangu nesimba rangu; vachaziva kuti zita rangu ndiJehovha.”