Read Shona Union Version 2002 Jeremia 17 Bible Online

Jeremia 17 - Shona Union Version 2002 bible

Jeremia 17

¹“Zvivi zvaJudha zvakanyorwa nepeni yamatare, nomuromo wedaimani; zvakatemwa pamahwendefa emwoyo yavo, napanyanga dzamaaritari enyu;

²nguva dzose kana vana vavo vachirangarira maaritari avo nemiti yavo yakatsaurwa pamiti mitema pazvikomo zvakakwirira.

³Iwe gomo rangu riri kusango, nhumbi dzako nepfuma yako yose ndichazvitapisa, nenzvimbo dzako dzakakwirira, nokuda kwezvivi zvenyu zviri mumiganho yenyu yose.

⁴Nemi, iyemi mumene, mucharega nhaka yenyu yandakakupai; ndichakuitai varanda vavavengi venyu munyika yamusingazivi, nokuti makabatidza moto pakutsamwa kwangu, uchapfuta nokusingaperi.”

⁵Zvanzi naJehovha, “Ngaatukwe iye munhu unovimba nomumwe munhu, unoita nyama yomunhu ruoko rwake, unomwoyo unotsauka kuna Jehovha.

⁶Nokuti uchafanana negwenzi murenje, haangaoni kana zvakanaka zvichisvika, asi uchagara panzvimbo dzakaoma kwazvo murenje, munyika yebare isingagarwi navanhu.

⁷Wakaropafadzwa iye munhu unovimba naJehovha, wakaita Jehovha chivimbo chake.

⁸Nokuti uchava somuti wakasimwa pamvura, unotuma midzi yawo kurwizi, usingatyi kana kupisa kuchisvika, asi mashizha awo achava matema; haungarangariri pagore rokusanaya kwemvura, kana kurega kubereka zvibereko.

⁹Mwoyo unonyengera kupfuura zvinhu zvose, wakaora chose, ndiani ungauziva?

¹⁰Ini Jehovha, ndinonzvera mwoyo, ndinoidza itsvo, kuti ndipe mumwe nomumwe zvakafanira mugarire wake, uye zvakafanira zvibereko zvamabasa ake.”

¹¹Segwari rinogarira mazai arisina kukandira rimene, ndizvo zvakaita iye unozviwanira pfuma nokusarurama; ichamusiya pakati pamazuva ake, pakupedzisira kwake richava benzi.

¹²Nzvimbo yeimba yedu tsvene chigaro choushe chakaisvonaka, chakanga chakakwirira kubva pakutanga.

¹³Imi Jehovha, tariro yaIsiraeri, vose vanokurashai vachanyadziswa; vanotsauka kwandiri vachanyorwa muvhu, nokuti vakarasha Jehovha, iro tsime remvura mhenyu.

¹⁴Ndiporesei Jehovha, ipapo ndichaporeswa; ndiponesei, ipapo ndichaponeswa; nokuti ndimi wandinorumbidza.

¹⁵Tarirai, vanoti kwandiri, “Shoko raJehovha riripiko? Ngariuye zvino.”

¹⁶Kana ndirini, handina kukurumidza kusakuteverai somufudzi, handina kushuva zuva renjodzi; imi munoziva; zvakabuda mumoromo mangu zvakanga zviri pamberi penyu.

¹⁷Musava kwandiri chinhu chinotyisa; imi muri hutiziro hwangu nezuva rezvakaipa.

¹⁸Vanonditambudza ngavanyadziswe, asi ini ndirege kunyadziswa; ngavavhunduswe ivo, asi ini ndirege kuvhunduswa; uyisai kwavari zuva rezvakaipa, muvaparadze nokuparadza kwakapamhidzirwa.

¹⁹Jehovha wakati kwandiri, “Enda undomira musuo ravana vavanhu, panopinda madzimambo aJudha, napavanobuda, napamasuo ose eJerusaremu;

²⁰uti kwavari, ‘Inzwai shoko raJehovha, imi madzimambo aJudha, navaJudha vose, navose vagere Jerusaremu vanopinda napamasuo awa.’

²¹“Zvanzi naJehovha, ‘Zvichenjerei, murege kutakura mutoro nezuva reSabata, kana kupinda nawo napamusuo eJerusaremu;

²²musabuda makatakura mutoro padzimba dzenyu nezuva reSabata, kana kubate basa ripi neripi; asi mutsaure zuva reSabata, sezvandakaraira madzibaba enyu.’

²³Asi havana kuterera, kana kurerekera nzeve dzavo; asi vakaomesa mitsipa yavo kuti varege kunzwa, varege kudzidziswa.

²⁴“Zvino zvanzi naJehovha, ‘Kana mukanatsa kunditerera, mukasapinda nomutoro napamasuo eguta rino nezuva reSabata, asi muchitsaura zuva reSabata, musingabati basa ripi neripi naro;

²⁵ipapo pachapinda napamasuo eguta rino madzimambo namachinda anogara pachigaro choushe chaDhavhidhi, anofamba nengoro namabhiza, iwo namachinda awo, navarume vaJudha, navagere Jerusaremu; guta rino richavapo nokusingaperi.’

²⁶“Vachabva kumaguta aJudha, napanzvimbo dzakapoteredza Jerusaremu, napanyika yaBhenjamini, napanyika yamapani, napanyika yamakomo, nokurutivi rwezasi, vachiuya nezvipiriso zvinopiswa, nezvibayiro, nezvipiriso zvohupfu, nezvinonhuwira, vachiuya nezvokuwonga nazvo kuimba yaJehovha.

²⁷Asi kana mukaramba kunditerera, mukaramba kutsaura zuva reSabata, muchitakura mutoro muchipinda nawo napamasuo eJerusaremu nezuva reSabata, ipapo ndichabatidza moto pamasuo aro, uchapedza dzimba dzamambo dzeJerusaremu, usingazodzimwi.”