Read Shona Union Version 2002 Jeremia 19 Bible Online

Jeremia 19 - Shona Union Version 2002 bible

Jeremia 19

¹Zvanzi naJehovha, “Enda undotenga chirongo chakaumbwa nomuumbi wehari, unavamwe vakuru vavanhu navamwe vakuru vavapristi;

²ipapo uende kumupata womwanakomana waHinomi, uripo pavanopinda pasuo rezvaenga zvehari, uparidzirepo mashoko andichakuudza;

³uti, ‘Inzwa shoko raJehovha, imi madzimambo aJudha navagere Jerusaremu,’ zvanzi naJehovha wehondo, Mwari waIsiraeri, ‘Tarirai, ndichauyisa zvakaipa pamusoro penzvimbo ino, nzeve dzomumwe nomumwe unozvinzwa dzichawunga.

⁴Nokuti vakandisiya, vakashandura nzvimbo ino, vakapisirapo zvinonhuwira kuna vamwe vamwari vavakanga vasingazivi, ivo namadzibaba avo namadzimambo aJudha, vakazadza nzvimbo ino neropa ravasina mhosva,

⁵vakavaka nzvimbo dzakakwirira dzaBhaari, kuti vapisire Bhaari vanakomana vavo pamoto zvive zvipiriso zvinomupisirwa; izvo, zvandisina kuvaraira, kana kuzvitaura, zvandisina kufunga mumwoyo mangu.’

⁶Naizvozvo tarirai, mazuva anouya ndizvo zvinotaura Jehovha nzvimbo ino haichazonzi Tofeti, kana Mupata womwanakomana waHinomi, asi Mupata woKuurawa.

⁷Ndichakonesa mano aJudha naveJerusaremu panzvimbo ino; ndichavawisa nomunondo pamberi pavavengi vavo, uye namaoko avanotsvaka kuvauraya; zvitunha zvavo ndichazvipa shiri dzokudenga nezvikara zvenyika, zvive zvokudya zvazvo.

⁸“Guta rino ndichariita chishamiso nechinhu chinoridzirwa muridzo; mumwe nomumwe unopfuura napo uchashamiswa achiridza muridzo nokuda kwamadambudziko aro ose.

⁹Ndichavadyisa nyama yavanakomana vavo nenyama yavanasikana vavo; mumwe nomumwe uchadya nyama yeshamwari yake pakukombwa kwaro napakumanikidzwa kwavachamanikidzwa nako navavengi vavo navanotsvaka kuvauraya.”

¹⁰Zvino unofanira kuputsa chirongo pamberi pavarume vakaenda newe,

¹¹ugoti kwavari, “Zvanzi naJehovha wehondo, ‘Saizvozvo ndichaputsa vanhu ava neguta rino, sezvinoputswa mudziyo womuumbi wehari, usingabviri kuzogadzirwazve; zvino vachaviga vakafa paTofeti nokuti kuchashaikwa imwe nzvimbo.

¹²Ndizvo zvandichaitira nzvimbo ino navagerepo, ndiite guta rino seTofeti ndizvo zvinotaura Jehovha.

¹³Dzimba dzeJerusaremu, nedzimba dzamadzimambo aJudha, dzakasvibiswa, dzichaita senzvimbo yeTofeti, idzo dzimba dzose dzavakapisira pamatenga adzo zvinonhuwira kuhondo dzokudenga, nokudururira vamwe vamwari zvipiriso zvinodururwa.’ ”

¹⁴Ipapo Jeremiya wakabva Tofeti, kwaakanga atumwa naJehovha kundoporofita; akandomira muruvazhe rweimba yaJehovha, akati kuvanhu vose,

¹⁵“Zvanzi naJehovha wehondo, Mwari waIsiraeri, ‘Tarirai, ndichauyisa pamusoro peguta rino napamusoro pemisha yaro yose, zvakaipa zvose zvandakataura pamusoro paro; nokuti vakaomesa mitsipa yavo, kuti varege kunzwa mashoko angu.’ ”