Read Shona Union Version 2002 Jeremia 2 Bible Online

Jeremia 2 - Shona Union Version 2002 bible

Jeremia 2

¹Zvino shoko raJehovha rakauya kwandiri, richiti,

²“Enda, undodana munzeve dzaveJerusaremu, uti zvanzi naJehovha, ‘Ndakarangarira pamusoro pako hunyoro hwohuduku hwako norudo rwenguva yokuwanikwa kwako, kuti wakanditevera murenje, munyika yakanga isina kudyarwa.

³Isiraeri vakanga vari rudzi rutsvene kuna Jehovha, zvibereko zvitsva zvaakazviwanira; vose vanomudya vachava nemhosva; vachawirwa nezvakaipa’ ” ndizvo zvinotaura Jehovha.

⁴Inzwai shoko raJehovha, imi imba yaJakobho, nemhuri dzose dzeimba yaIsiraeri,

⁵Zvanzi naJehovha, “Madzibaba enyu akawana zvisakarurama zvipiko kwandiri, zvavakaenda kure neni, zvavakatevera zvisina maturo, ivo vamene vakava vasina maturo?

⁶Uye havana kureva, vachiti, ‘Uripiko Jehovha wakatibudisa panyika yeIjipiti, akatifambisa murenje, munyika ina masango namakomba, munyika yakaoma neyomumvuri worufu, munyika isingafambi nomunhu achipfuurapo, musingagari munhu?’

⁷Ndakakusvitsai munyika ineminda yakaorera, kuti mudye zvibereko zvayo nezvakanaka zvayo; asi makati mapinda, mukasvibisa nyika yangu, mukaita nhaka yangu chinhu chinonyangadza.

⁸Vapristi havana kuti, ‘Jehovha uripiko?’ Vaifambisa mirairo vakanga vasingandizivi, vafudzi vaindidarikira, vaporofita vaiporofitera Bhaari, vachitevera zvinhu zvisingabatsiri.

⁹“Saka zvanzi naJehovha, ‘Ndicharamba ndichikakavara nemi, ndichakakavara navana vavana venyu.’

¹⁰Nokuti yambukirai kuzviwi zveKitimi, muone; tumai vanhu Kedhari, mufungisise zvakanaka, muone kana kwakambovapo chinhu chakadai.

¹¹Ko rudzi ruripo rwakatsinhanhisa vamwari varwo, ivo vasati vari vamwari here? Asi vanhu vangu vakatsinhanisa kukudzwa kwavo nezvinhu zvisingabatsiri.

¹²Shamiswa nechinhu ichi, iwe denga rose, utye zvikuru, uvhunduswe kwazvo ndizvo zvinotaura Jehovha.

¹³Nokuti vanhu vangu vakaita zvinhu zviviri zvakaipa. Vakandisiya, ini tsime remvura mhenyu, vakazvivezera zvirongo, zvirongo zvakaputsika, zvisingagoni kuchengeta mvura.

¹⁴Isiraeri muranda here? Ko ndiye muranda wakaberekerwa mumba matenzi wake here? Ko zvino wapambwa seiko?

¹⁵Vana veshumba vakamuombera, vakarira, nokuparadza nyika yake; maguta ake akapiswa, hakuna unogaramo.

¹⁶Vana veNofi naveTapanesi vakapedza vhudzi romusoro wako.

¹⁷Ko hauna kuzvitsvaira izvozvo, zvawakasiya Jehovha Mwari wako panguva yaakakufambisa panzira yake here?

¹⁸Zvino unondotsvakei panzira inoenda Ijipiti, kundonwa mvura yeSihori here? Unondotsvakei panzira inoenda Asiria, kundonwa mvura yoRwizi here?

¹⁹Zvakaipa zvako zvinokurova, kudzokera kwako shure kunokutuka; naizvozvo zvanzi naIshe Jehovha wehondo, ‘Ziva, uone kuti chinhu chakaipa chinovava kuti wakasiya Jehovha Mwari wako, uye kuti haundityi.’

²⁰“Nokuti yatova nguva huru yawakavhuna joko, nokudambura zvisungo zvako, ukati, ‘Handidi kubatira;’ nokuti wakapfugama pachikomo chipi nechipi chakakwirira napasi pomuti upi noupi mutema uchifeva.

²¹Kunyange zvakadaro ndakanga ndakusima uri mudzambiringa wakaisvonaka, mbeu kwayo yazvokwadi; zvino wandishandukira sei ukava matavi akaipa omudzambiringa worumwe rudzi?

²²“Nokuti kunyange ukashamba nesoda, ukatora sipo zhinji, kunyange zvakadaro zvakaipa zvako zvakaita segwapa pamberi pangu; ndizvo zvinotaura Ishe Jehovha.

²³“Ungareva seiko, uchiti, ‘Handina kusvibiswa, handina kutevera vaBhaari?’ Cherekedza nzira yako pamupata, uzive chawakaita; uri hadzi yekamera inomhanya, inofamba nenzira dzayo;

²⁴uri hadzi yembizi yakarovera renje, inofembedza mhepo nokushuva kwayo; ndiani ungaidzora pakuviga kwayo? Dzose, dzinoitsvaka, hadzinganeti; pamwedzi wayo dzinoiwana.

²⁵Usatendera rutsoka rwako kufamba usina shangu, nehuro dzako kuva nenyota. Asi iwe wakati, ‘Hazvina maturo; kwete, nokuti ndakada vatorwa, ndivo vandichatevera.’ ”

²⁶Mbavha sezvainonyadziswa kana yaonekwa, saizvozvo imba yaIsiraeri yanyadziswa, ivo, namadzimambo avo, namachinda avo, navapristi vavo, navaporofita vavo;

²⁷ivo, vanoti kudanda, “Uri baba vangu;” nokubwe, “Ndiwe wakandibereka;” nokuti vakandifuratira, havana kunditarira nezviso zvavo; asi panguva yokutambudzika kwavo vachati, “Simukai, mutiponese.”

²⁸“Zvino varipiko vamwari venyu vamakazviitira? Ngavasimuke kana vachigona kukuponesai panguva yokutambudzika; nokuti kuwanda kwavamwari vako, iwe Jakobho, kwakaenzana namaguta ako.

²⁹“Munokakavara neni neiko? Imi mose makandidarikira ndizvo zvinotaura Jehovha.

³⁰Ndakarova vana venyu pasina, havana kuterera kurangwa; munondo wenyu ndiwo wakauraya vaporofita venyu, seshumba inoparadza.

³¹Haiwa, imi rudzi rwakadai! Wonai shoko raJehovha. Ko ini ndakanga ndiri renje kuna Isiraeri here? Kana nyika yerima guru here? Vanhu vangu vanorevereiko vachiti, ‘Tinotekeshera hedu, hatichazouyizve kwamuri?’

³²Ko mhandara ingakanganwa zvishongo zvayo, kana mwenga mukonde wake here? Asi vanhu vangu vakandikanganwa mazuva asingaverengwi.

³³Haiwa, unoziva zvakanaka sei kunatsa nzira yako, kuti utsvake kudikanwa! Saka wakadzidzisa navakadzi vakaipawo nzira dzako.

³⁴“Pamipendero yenguo dzako pakawanikwawo ropa ravarombo vasina mhaka; handina kuriwana pakapaziwa imba, asi pane zvizvi zvose.

³⁵Kunyange zvakadaro iwe wakati, ‘Handina mhaka; zvirokwazvo kutsamwa kwake kwakadzorwa kwandiri.’ Tarira, ndichakutonga, zvaunoti, ‘Handina kutadza.’

³⁶Unofambireiko pose-pose, uchishandura nzira yako? Uchanyadziswa neIjipiti, sezvawakanyadziswa neAsiria.

³⁷Naipapowo uchabva wakaisa maoko ako pamusoro wako; nokuti Jehovha wakaramba vaunovimba navo, newe haungabatsirwi navo.”