Read Shona Union Version 2002 Jeremia 22 Bible Online

Jeremia 22 - Shona Union Version 2002 bible

Jeremia 22

¹Zvanzi naJehovha, “Burukira kumba kwamambo waJudha, undotaurapo shoko iri,

²uti, ‘Inzwa shoko raJehovha, iwe mambo waJudha, ugere pachigaro choushe chaDhavhidhi, iwe navaranda vako, navanhu vako vanopinda napamasuo awa.’

³“Zvanzi naJehovha, ‘Tongai zvakarurama nezvakatendeka, murwire wakabirwa muruoko rwounomumanikidza; mutorwa, nenherera, nechirikadzi, regai kuvaitira zvisakarurama, regai kuvaitira nesimba; uye musateura ropa risina mhosva panzvimbo ino.’

⁴Nokuti kana muchiita chinhu ichi nomwoyo wose, pamasuo eimba iyi pachapinda madzimambo, achagara pachigaro choushe chaDhavhidhi, achifamba nengoro nokutasva mabhiza, iye navaranda vake navanhu vake.

⁵Asi kana mukaramba kunzwa mashoko awa, ndinopika neni ndimene, kuti imba ino ichava dongo ndizvo zvinotaura Jehovha.

⁶“Nokuti zvanzi naJehovha, ‘Uri Gireadhi kwandiri, nomusoro weRebhanoni; asi zvirokwazvo ndichakuita renje, namaguta asingagarwi navanhu.’

⁷Ndichakugadzirira vaparadzi, mumwe nomumwe ane nhumbi dzake dzokurwa; vachatema misidhari yenyu inodikanwa, vachiikandira mumoto.

⁸Marudzi mazhinji avanhu achapfuura napaguta rino, mumwe nomumwe uchati kunowokwake, ‘Jehovha wakaitireiko guta rino guru zvakadaro?’

⁹“Ipapo vachapindura, vachiti, ‘Nokuti vakasiya sungano yaJehovha, Mwari wavo, vakanamata vamwe vamwari, vachivashumira.’ ”

¹⁰Musachema wakafa, kana kumuwungudzira; asi mucheme kwazvo iye unoenda, nokuti haangadzokizve, kana kuonazve nyika yake yaakaberekerwa.

¹¹Nokuti zvanzi naJehovha pamusoro paSharumi, mwanakomana waJosia, mambo waJudha, wakabata ushe panzvimbo ino, “Iye haangadzokeripozve;

¹²asi kwaakatapirwa, ndiko kwaachandofirako; haangazoonizve nyika ino.”

¹³Une nhamo iye unovaka imba yake nokusarurama, namakamuri ake okumusoro achiita zvisakarurama; unobatisa wokwake asingamupi chinhu, asingamupi mubayiro wokubata kwake;

¹⁴iye, unoti, “Ndichazvivakira imba huru namakamuri okumusoro akafara, achizviitira mahwindo; zvino yoitirwa denga romusidhari, ichizodzwa muti mutsvuku.”

¹⁵“Ko ungabata ushe, zvaunotsvaka kupfuura vamwe nemisidhari here? Ko baba vako havana kudya nokunwa, vachiita zvakarurama nezvakatendeka here?” Ipapo vakagara nomufaro.

¹⁶Vaitamba mhaka dzavarombo navanoshaiwa; ipapo vaiva nomufaro. “Ko izvozvi hakuzi kundiziva here? Ndizvo zvinotaura Jehovha.

¹⁷Asi meso ako nomwoyo wako hazvirangariri zvimwe, asi kuchiva kwako nokuteura ropa risina mhosva, nokumanikidza, nokuita nesimba; kuti uzviite.

¹⁸Naizvozvo zvanzi naJehovha pamusoro paJehoiakimu mwanakomana waJosia, mambo waJudha, ‘Havangamuchemi,’ vachiti, ‘Haiwa, munun'una wangu!’ Kana, ‘Haiwa, hanzvadzi!’ Havangachemi, vachiti, ‘Haiwa, ishe!’ Kana, ‘Haiwa, hukuru hwake!’

¹⁹“Uchavigwa sokuvigwa kwembongoro, uchakweverwa nokurashwa kunze kwamasuo eJerusaremu.”

²⁰Kwirai Rebhanoni, mudanidzire; danidzirai nenzwi renyu paBhashani; danidzirai muri paAbharimi; nokuti vadikani venyu vose vakaparadzwa.

²¹Ndakataura newe pakufara kwako; asi iwe wakati, “Handidi kunzwa.” Ndiwo wakanga uri mutoo wako kubvira pahuduku hwako, kuti hauna kuterera inzwi rangu.

²²Mhepo ichaparadza vafudzi vako vose, navadikani vako vachatapwa; zvirokwazvo nenguva iyo uchanyadziswa nokukanganiswa nokuda kwezvakaipa zvako zvose.

²³Haiwa, iwe, ugere Rebhanoni, unovaka dendere rako mumisidhari, uchanzwisisa hurombo kwazvo sei kana uchizowirwa nokurwadziwa, sokurwadziwa kwomukadzi unosurumuka!

²⁴“Nohupenyu hwangu ndizvo zvinotaura Jehovha kunyange Konia, mwanakomana waJehoiakimu, mambo waJudha, aiva chindori chokutsikisa nacho paruoko rwangu rworudyi, kunyange zvakadaro ndaikubvisa ipapo.

²⁵Ndichakuisa murwoko rwavanotsvaka kukuuraya, nomuruoko rwaivo vaunotya, muruoko rwaNebhukadhirezari mambo weBhabhironi, nomumaoko avaKaradhea.

²⁶Iwe namai vako vakakubereka ndichakudzingirai kuneimwe nyika kwamusina kuberekerwa; ipapo muchandofirapo.

²⁷Asi kunyika kunopanga mwoyo yavo kudzokera, havangadzokeriko.

²⁸“Ko munhu uyu Konia mudziyo wakaputsika unozvidzwa here? Iye mudziyo usingafadzi munhu here? Vakadzingirweiko, iye navana vake, vakadzingirwa kunyika yavasingazivi?”

²⁹Iwe nyika, nyika, nyika, inzwa inzwi raJehovha.

³⁰Zvanzi naJehovha, “Nyora kuti munhu uyu haana vana, munhu usingazofari pamazuva ake; nokuti hakuchina murume pakati pavana vake uchava nomufaro, uchagara pachigaro choushe chaDhavhidhi, achibata ushe hwaJudha.”