Read Shona Union Version 2002 Jeremia 23 Bible Online

Jeremia 23 - Shona Union Version 2002 bible

Jeremia 23

¹Vane nhamo vafudzi vanoparadza nokuparadzira makwai amafuro angu! Ndizvo zvinotaura Jehovha.

²Naizvozvo zvanzi naJehovha, Mwari waIsiraeri, pamusoro pavafudzi vanofudza vanhu vangu, “Makaparadzira makwai angu, mukaadzinga, mukasaatarira; tarirai, ndichakurovai nokuda kwezvakaipa zvamabasa enyu ndizvo zvinotaura Jehovha.

³Ndichaunganidza vakasara vamakwai angu kunyika dzose kwandakanga ndaadzingira, ndichaadzosera kumafuro awo; achaberekana nokuwanda.

⁴Ndichaagadzira vafudzi vanoafudza; haangazotyi kana kuvhunduswa, hakuna nerimwe ringashaikwa ndizvo zvinotaura Jehovha.”

⁵“Tarirai,” ndizvo zvinotaura Jehovha, “Mazuva achauya, andichamutsira Dhavhidhi bukira rakarurama, iye uchabata ushe ari mambo, uchaita nohuchenjeri nokururama achiita zvakarurama panyika.

⁶“Pamazuva ake Judha vachaponeswa, naIsiraeri vachagara vakachengetwa; zita rake raachatumidzwa ndireri, ‘Jehovha ndiye kururama kwedu.’

⁷“Naizvozvo, tarirai, ndizvo zvinotaura Jehovha mazuva anouya, avasingazoti, ‘NaJehovha mupenyu, wakabudisa vana vaIsiraeri munyika yeIjipiti;’

⁸asi, ‘NaJehovha mupenyu, wakabudisa rudzi rweimba yaIsiraeri munyika yokumusoro, achivaperekedza, nomunyika dzose kwandakanga ndavadzingira. Ivo vachagara munyika yavo.’ ”

⁹Kana vari vaporofita, mwoyo wangu wakaputsika mukati mangu; mapfupa angu ose anozununguka, ndakaita somunhu wakabatwa, somunhu wakundwa newaini, nokuda kwaJehovha, uye nokuda kwamashoko ake matsvene.

¹⁰Nokuti nyika izere nemhombwe; nokuti nyika inochema nemhaka yokutuka; mafuro erenje akaoma; zvavanovavarira zvakaipa, simba ravo harizakarurama.

¹¹“Nokuti vaporofita navapristi vose vanomhura Jehovha; zvirokwazvo, mumba mangu ndakawana zvakaipa zvavo, ndizvo zvinotaura Jehovha.

¹²“Naizvozvo nzira yavo ichava kwavari senzvimbo dzinotedza murima; vachatinhwa, ndokuwiramo; nokuti ndichavauyisira zvakaipa pagore rokurohwa kwavo, ndizvo zvinotaura Jehovha.

¹³Ndakaona hupenzi kuvaporofita veSamaria; vakaporofita naBhaari, vakarashisa vanhu vangu Isiraeri.

¹⁴Kuvaporofita veJerusaremu ndakaonawo chinhu chinonyangadza, vanoita hupombwe, nokufamba nenhema; vanosimbisa maoko avanoita zvakaipa, naizvozvo hakuna nomumwe unodzoka pazvakaipa zvake; vose vava kwandiri seSodhoma, navagerepo seGomora.

¹⁵“Naizvozvo zvanzi naJehovha wehondo pamusoro pavaporofita, ‘Tarirai, ndichavadyisa gavakava, ndichavanwisa mvura yenduru; nokuti kumhura Jehovha kwakabuda kuvaporofita veJerusaremu kukaenda kunyika yose.’ ”

¹⁶Zvanzi naJehovha wehondo, “Regai kuterera mashoko avaporofita vanokuporofiterai; vanokudzidzisai zvisina maturo, vanotaura zvavakaona pamwoyo yavo, zvisati zviri izvo zvinobuda mumuromo waJehovha.”

¹⁷Vanoramba vachiti kuna vanondizvidza, Jehovha wakati, “Muchava norugare; uye kunomumwe nomumwe unofamba nohukukutu hwomwoyo wake, vanoti, ‘Hakune chakaipa chingakuwira.’

¹⁸“Nokuti ndiani wakamira parangano yaJehovha, akaona nokunzwa shoko rake? Ndiani wakaterera akanzwa shoko rake?

¹⁹Tarirai, dutu remhepo raJehovha, iko kutsamwa kwake, rabuda, zvirokwazvo dutu rechamupupuri; richamonereka pamisoro yavakaipa.

²⁰Kutsamwa kwaJehovha hakungadzoki, kusvikira azviita, apedza ndangariro dzomwoyo wake; pamazuva okupedzisira muchazvinzwisisa kwazvo.”

²¹“Ini handina kutuma vaporofita ava, kunyange zvakadaro vakamhanya; ini handina kutaura navo, kunyange zvakadaro vakaporofita.

²²“Asi dai vakanga vamira parangano yangu, vangadai vakanzwisa vanhu vangu mashoko angu, vakavadzora panzira yavo yakaipa, napazvakaipa zvamabasa avo.

²³“Ko ini ndiri Mwari uri pedyo, ndisati ndiri Mwari uri kure here? Ndizvo zvinotaura Jehovha.

²⁴Ko munhu uripo ungavanda panzvimbo dzisingazikanwi, ini ndikasamuona here? Ndizvo zvinotaura Jehovha. Ko ini handizadzi denga nenyika here? Ndizvo zvinotaura Jehovha.

²⁵Ndakanzwa zvakarehwa navaporofita, vanoporofita nhema muzita rangu, vachiti, ‘Ndarota hope, ndarota hope.’

²⁶Ko izvi zvichavapo pamwoyo yavaporofita vanoporofita nhema kusvikira rini, ivo vaporofita vezvinonyengera zvemwoyo yavo?

²⁷Ivo, vanofunga kukanganisa vanhu vangu zita rangu nokurota kwavo, kwavanoudza mumwe nomumwe hama yake, madzibaba avo sezvavakakanganwa zita rangu nokunamata Bhaari.

²⁸Muporofita, wakarota, ngaaudze kurota kwake; uneshoko rangu, ngaataure shoko rangu nokutendeka. Mashanga nezviyo zvakaenzana pai? Ndizvo zvinotaura Jehovha.

²⁹“Shoko rangu harina kufanana nomoto here? Ndizvo zvinotaura Jehovha; uye senyundo inoputsanya dombo here?

³⁰Naizvozvo, tarirai, ndizvo zvinotaura Jehovha, handina hukama navaporofita, vanoba mashoko angu mumwe nomumwe kunowokwake.

³¹Tarirai, ndizvo zvinotaura Jehovha, handina hukama navaporofita, vanoreva namarimi avo, vachiti, ‘Ndiye unodaro.’

³²Tarirai, ndizvo zvinotaura Jehovha, handina hukama navanoporofita kurota kwavo kwenhema, vachiudza vamwe, vachirashisa vanhu vangu nenhema dzavo uye nokuzvirumbidza kwavo kusina maturo; kunyange zvakadaro handina kuvatuma, kana kuvaraira; uye havatongobatsiri vanhu ava, ndizvo zvinotaura Jehovha.

³³“Zvino kana vanhu ava, kana muporofita kana mupristi, vakakubvunza, vachiti, ‘Chirevo chaJehovha ndechipiko?’ Ipapo uti kwavari, ‘Chirevo chei!’ Ini ndichakurasai, ndizvo zvinotaura Jehovha.

³⁴Kana ari muporofita, kana mupristi, kana vanhu, kana vachiti, ‘Chirevo chaJehovha; ndicharova munhu uyo neimba yake.’

³⁵Ndizvo zvamunofanira kuti, mumwe nomumwe kunowokwake, nomumwe nomumwe kuhama yake, ‘Jehovha wakapindurei? Jehovha wakataurei?’

³⁶Musazoti chirevo chaJehovha; nokuti shoko romunhu mumwe nomumwe ndicho chirevo chake; nokuti makakanganisa mashoko aMwari mupenyu, aJehovha wehondo, Mwari wedu.

³⁷“Uti kumuporofita, ‘Jehovha wakakupindurei? Jehovha wakataurei?’

³⁸Asi kana mukati, ‘Chirevo chaJehovha;’ zvanzi naJehovha, ‘Zvamunoreva shoko iri, muchiti, chirevo chaJehovha,’ ini zvandakatuma shoko kwamuri ndichiti, ‘Musati, chirevo chaJehovha;’

³⁹naizvozvo tarirai, ndichakukanganwai chose, ndichakurashai kure neni, imi, neguta randakakupai imi namadzibaba enyu;

⁴⁰ndichauyisa pamusoro penyu kushoorwa kusingaperi, nokunyadziswa kusingaperi, zvisingazokanganikwi.”