Read Shona Union Version 2002 Jeremia 33 Bible Online

Jeremia 33 - Shona Union Version 2002 bible

Jeremia 33

¹Zvino shoko raJehovha rakasvikazve rwechipiri kuna Jeremiya, achakapfigirwa muruvazhe rwavarindi, richiti,

²“Zvanzi naJehovha, iye unozviita, iye Jehovha unozviumba nokuzvisimbisa, Jehovha ndiro zita rake,

³‘Danai kwandiri, ndichakupindurai, ndichakuratidzai zvinhu zvikuru zvakavanzika, zvamusingazivi.’

⁴Nokuti zvanzi naJehovha Mwari waIsiraeri pamusoro pedzimba dzeguta rino, napamusoro pedzimba dzamadzimambo aJudha, dzakakoromorwa kuzorwa nemirwi yokurwa neminondo,

⁵‘Vanouya havo kuzorwa navaKaradhea, asi vanodzizadza nezvitunha zvavanhu vandakauraya nokutsamwa kwangu nehasha dzangu, ndikavanzira guta rino chiso changu nokuda kwokuipa kwavo kwose.’

⁶Tarirai, ndichavavigira mufaro pamuviri nokupora, ini ndichavaporesa; ndichavaratidza rugare rwakawanda nezvokwadi yakawanda.

⁷Ndichadzosa kutapwa kwaJudha nokutapwa kwaIsiraeri, ndichavavaka sapakutanga.

⁸“Ndichavanatsa pazvakaipa zvavo zvose zvavakanditadzira nazvo, ndichakanganwira zvakaipa zvavo zvose zvavakanditadzira nazvo, nezvavakandidarikira nazvo.

⁹Guta rino richava kwandiri mbiri yomufaro, nokurumbidzwa nokukudzwa, pamberi pamarudzi ose enyika, achanzwa zvakanaka zvose zvandichavaitira; vachatya nokudedera pamusoro pezvakanaka zvose norugare rwose zvandicharivigira.”

¹⁰Zvanzi naJehovha, “Panzvimbo ino yamunoti yakaparadzwa, haina vanhu kana zvipfuo, imo mumaguta aJudha, nomunzira dzomuJerusaremu, mangova nedongo, musina vanhu vageremo, kana zvipfuo, pachanzwikazve

¹¹inzwi romufaro nokufarisisa, inzwi rechikomba nenzwi romwenga, nenzwi ravanoti, ‘Wongai Jehovha wehondo,’ nokuti Jehovha wakanaka, nokuti ngoni dzake dziripo nokusingaperi; uye neravanouya nezvipiriso zvokuwonga mumba maJehovha. Nokuti ndichadzosa kutapwa kwenyika zvive sapakutanga ndizvo zvinotaura Jehovha.”

¹²Zvanzi naJehovha wehondo, “Panzvimbo ino yakaparadzwa, isina vanhu kana zvipfuo, napamaguta aripo, pachavazve namafuro avafudzi, vanovatisa makwai avo pasi.

¹³Mumaguta enyika yamakomo, mumaguta amapani, mumaguta orutivi rwezasi, napanyika yaBhenjamini, napanzvimbo dzakapoteredza Jerusaremu, nomumaguta aJudha, makwai achapfuurazve pasi poruoko rwounoaverenga, ndizvo zvinotaura Jehovha.”

¹⁴“Tarirai, mazuva anouya, ndizvo zvinotaura Jehovha, andichaita shoko iro rakanaka randakataura pamusoro peimba yaIsiraeri napamusoro peimba yaJudha.

¹⁵“Namazuva iwayo, nenguva iyo, ndichamedzera Dhavhidhi davi rokururama; iye ucharuramisira vanhu nokuita zvakarurama panyika.

¹⁶Namazuva iwayo Judha vachaponeswa, Jerusaremu richagara rakachengetwa; zita rarichatumidzwa ndireri, ‘Jehovha ndiye kururama kwedu.’

¹⁷“Nokuti zvanzi naJehovha, ‘Dhavhidhi haangatongoshaiwi munhu unogara pachigaro choushe cheimba yaIsiraeri;

¹⁸navapristi vaRevhi havangashaiwi munhu pamberi pangu ungapisa zvipiriso zvinopiswa nokupisa zvipiriso zvoupfu, nokugara achibayira.’ ”

¹⁹Zvino shoko raJehovha rakasvika kuna Jeremiya, richiti,

²⁰“Zvanzi naJehovha, ‘Kana mungagona kuputsa sungano yangu yamasikati nesungano yangu yousiku, kukarega kuva namasikati nohusiku nenguva yazvo;

²¹ipapo sungano yangu naDhavhidhi muranda wangu ingaputswawo, akasava nomwanakomana ungabata ushe pachigaro chake choushe; saizvozvowo navaRevhi, vapristi, vashumiri vangu.’ ”

²²Hondo yokudenga sezvaisingabviri kuverengwa, kana jecha regungwa kuyerwa, saizvozvo ndichawanza vana vaDhavhidhi muranda wangu, navaRevhi vanondishumira.

²³Ipapo shoko raJehovha rakasvika kuna Jeremiya, richiti,

²⁴“Haurangariri zvakataurwa navanhu ava, zvavakati, ‘Marudzi maviri akatsaurwa naJehovha, akarashwa naye?’ Saizvozvo vanozvidza vanhu vangu, vachiti havachiri rudzi pamberi pavo.

²⁵Zvanzi naJehovha, ‘Kana sungano yangu yamasikati nohusiku isipo, kana ndisina kutemera denga napasi mirairo;

²⁶ipapo ndicharashawo vana vaJakobho, navaDhavhidhi muranda wangu, kuti ndirege kutora vamwe vavana vake vave vabati vavana vaAbhurahamu naIsaka naJakobho; nokuti ndichadzosa kutapwa kwavo nokuvanzwira nyasha.’ ”