Read Shona Union Version 2002 Jeremia 38 Bible Online

Jeremia 38 - Shona Union Version 2002 bible

Jeremia 38

¹Zvino Shefatia mwanakomana waMatani, naGedharia mwanakomana waPashuri, naJukari mwanakomana waSheremiya, naPashuri mwanakomana waMarikija, vakanzwa mashoko akataurwa naJeremiya kuvanhu vose, achiti,

²“Zvanzi naJehovha, ‘Ani naani unorambira muguta rino uchaurawa nomunondo, nenzara, uye nehosha yakaipa, asi unobuda akaenda kuvaKaradhea uchararama, hupenyu hwake huchava kwaari chinhu chakapambwa, uchararama.’ ”

³“Zvanzi naJehovha, ‘Zvirokwazvo guta rino richaiswa mumaoko ehondo yamambo weBhabhironi, iye acharikunda.’ ”

⁴Ipapo machinda akati kuna mambo, “Tinokumbira kuti munhu uyu aurawe, nokuti unoshaisa simba maoko avarwi vakasara muguta rino, namaoko avanhu vose nokutaura kwake mashoko akadai kwavari; nokuti munhu uyu haatsvaki mufaro wavanhu ava asi kuti vave nenjodzi.”

⁵Mambo Zedhekia ndokuti, “Tarirai, uri pamaoko enyu, nokuti mambo haangaiti chinhu chamusingadi.”

⁶Ipapo vakatora Jeremiya, vakamukandira mugomba raMarikija mwanakomana wamambo, rakanga riri muruvazhe rwavarindi; vakaburusa Jeremiya namabote. Mugomba makanga musina mvura asi matope; Jeremiya akanyura mumatope.

⁷Zvino muItiopia Ebhedhimereki, waiva muranda mumba mamambo, wakati anzwa kuti vakaisa Jeremiya mugomba (zvino mambo wakanga agere musuo raBhenjamini).

⁸Ebhedhimereki akabuda mumba mamambo, akataura namambo, achiti,

⁹“Ishe wangu mambo, vanhu ava vakaita zvakaipa pazvose zvavakaitira muporofita Jeremiya, wavakakandira mugomba; zvino iye unenge uchafira panzvimbo iyo paari, nemhaka yenzara; nokuti hakuchina chingwa muguta.”

¹⁰Ipapo mambo akaraira muItiopia Ebhedhimereki, akati, “Tora pano vanhu vana makumi matatu, unobudisa muporofita Jeremiya mugomba asati afa.”

¹¹Ipapo Ebhedhimereki akatora vanhu ivavo, akaenda navo mumba mamambo pasi pechivigiro chepfuma, akatorapo mamvemve nenguo dzakasakara, akazviburusira namabote mugomba kuna Jeremiya.

¹²MuItiopia Ebhedhimereki akati kuna Jeremiya, “Zvino chiisai mamvemve awa nenguo dzakasakara muhapwa dzenyu munyasi mamabote.” Jeremiya akaita saizvozvo.

¹³Naizvozvo vakakwidza Jeremiya namabote, vakamubudisa mugomba, Jeremiya akagara muruvazhe rwavarindi.

¹⁴Ipapo mambo Zedhekia akatuma nhume akauyisa muporofita Jeremiya kwaari pamukova wechitatu uri mumba maJehovha; mambo akati kuna Jeremiya, “Ndichakubvunza shoko; usandivanzira chinhu.”

¹⁵Ipapo Jeremiya akati kuna Zedhekia, “Kana ndikakuzivisai izvozvo, hamungatongondiurayi here? Kana ndikakupai zano, hamunganditereri.”

¹⁶Naizvozvo mambo Zedhekia wakapikira Jeremiya chinyerere, akati, “NaJehovha mupenyu, wakatipa hupenyu uhwu, handingakuurayi, kana kukuisa mumaoko avanhu ava vanotsvaka kukuuraya.”

¹⁷Ipapo Jeremiya akati kuna Zedhekia, “Zvanzi naJehovha, Mwari wehondo, Mwari waIsiraeri, ‘Kana mukatenda kuenda kumachinda amambo weBhabhironi, mweya wenyu uchararama, neguta rino haringapiswi nomoto; imi muchararama, neimba yenyu.’

¹⁸Asi kana mukaramba kuenda kumachinda amambo mumaoko avaKaradhea, ivo vacharipisa nomoto, nemi hamungapukunyuki pamaoko avo.”

¹⁹Ipapo mambo Zedhekia akati kuna Jeremiya, “Ndinotya vaJudha, vakatishandukira vakaenda kuvaKaradhea, zvimwe vangandiisa mumaoko avo, ivo vakandiseka.”

²⁰Asi Jeremiya wakati, “Havangakusiyi kwavari. Chitererai henyu inzwi raJehovha, sezvandinokuudzai; ipapo muchava nomufaro, nomweya wenyu uchararama.

²¹Asi kana mukaramba kuenda, heri shoko randakaziviswa naJehovha,

²²‘Tarirai, vakadzi vose vakasara mumba mamambo waJudha, vachabudisirwa kumachinda amambo weBhabhironi;’ zvino vakadzi avo vachati, ‘Shamwari dzenyu dzinodikanwa nemi ndidzo dzakakunyengerai, dzikakukundai; zvino tsoka dzenyu zvadzanyura mumatope, vokufuratirai.’

²³Vachabudisira vakadzi venyu vose navana venyu kuvaKaradhea; nemiwo hamungapukunyuki pamaoko avo asi muchabatwa noruoko rwamambo weBhabhironi; imi muchapisisa guta rino nomoto.”

²⁴Ipapo Zedhekia akati kuna Jeremiya, “Ngakurege kuva nomunhu unoziviswa mashoko awa, ipapo iwe haungaurawi.

²⁵“Asi kana machinda akanzwa kuti ndakataura newe, vakauya kwauri, vachiti, ‘Chitizivisa zvino zvawaudza mambo; usativanzira izvozvo, isu tigosakuuraya; uyewo zvose zvawakaudzwa namambo.’

²⁶“Ipapo uti kwavari, ‘Ndakasvitsa munyengetero wangu kuna mambo, kuti arege kundidzosa kumba kwaJonatani, kuti ndifireko.’ ”

²⁷Zvino machinda ose akauya kuna Jeremiya, akamubvunza, akavaudza mashoko awa ose sezvakanga zvarairwa namambo. Naizvozvo vakarega kuzotaura naye, nokuti shoko rakanga risina kuzikanwa.

²⁸Naizvozvo Jeremiya wakaramba agere muruvazhe rwavarindi kusvikira zuva rakakundwa Jerusaremu.